1 Mme ideen se ikidi ibịne Defid ke Siklak ekedom, ke ini ekebịneke anye esio ke iso Sọọl ayịn Kisi (ammọ ekesịne ke atu ñkpọsọñ mbon ekọñ se ikinwam anye ke ekọñ; 2 ammọ emaekama mme utịgha emaenyʌñ enie ukeme editịgha idañ me editop ñkwaitiad ke ubọk ufiin me ke nnasia; ammọ ekedoñño aduuk Sọọl e-eketooho ubon Benyamin):

3 Ahiesa abọọñ ammọ ye Yoas ayịn Semaa awo Kibie;

Yesiel ye Pelet nditọ Asmafed;

Beraka, Yehu awo Anatod, 4 ye Ismaiya awo Kibiọn, ekamba awo ekọñ ke atu mme Edịb mme Duob, a-akedooho adaaha ke atu Edịb mme Duob;

Yerimaiya, Yahasiel, Yohanan, Yoosabad awo Kedera*, 5 Elusai, Yerimọd, Belia, Semaria ye Sefatia awo Haruf;

6 Elkana, Isia, Asarel, Yoesa ye Yasobiim awo Kora;

7 ye Yuela ye Sebadaiya ayịn Yeroham aketooho Kedọ.

8 Ubaak mbon Kad emaewuọñọ ebịne Defid ke akpọsọñ itieudịbe amọ ke anaan. Ammọ ekedo mme akop adudu mbon anwan, ekebaaha ke mbeeñeidem ekọñ enyʌñ enie ukeme adikama atuekọñ ye eduad. Iso ammọ ekedoñño iso mme ekpe, ndin ammọ emaenyʌñ esọp usọb nte edob ke mme anyọñ abod.

9 Esaa akedo abọọñ,

Obadaiya akedo udiana adadusʌñ, Eliab ado ayọhọ ita,

10 Mismana ayọhọ inaañ, Yerimaiya ayọhọ ition,

11 Atai ayọhọ itiokeed, Eliel ayọhọ itiaba,

12 Yohanan ayọhọ itiaita, Elsabad ayọhọ usʌkkeed,

13 Yerimaiya ayọhọ duob ye Makbanai ayọhọ duob mme keed.

14 Mbon Kad ami ekedoñño ikpọ mme adaiso ekọñ; andisịb ñkan amaanie ukeme adinwana awo ikie (100), ñko andikpon ñkan amaanie ukeme adinwana awo tọsịn keed (1,000). 15 Ammọ ekesaña eboiyo inyañ Yọdan ke akpa afiọñ ke ini mmọọñ aketọọhọ afiọrọ afịd mben amọ, ndin enyʌñ enam afịd awo se ikidʌñ ke unaisọñ efeghe, enyọñ usakkautịn ye usobutịn.

16 Ubaak mbon Benyamin ye ubaak ideen Yuda emaenyʌñ edi ebịne Defid ke akpọsọñ itieudịbe amọ. 17 Defid amaawuọ akesoobo ammọ anyʌñ abo ammọ ate, "Adieke ndufo ediighe ke emem ediñnwam miin, ami mmebeeñe idem nọ ndufo edisaña ye ami. Ado adieke ndufo ediighe edintap miin nnọọ mbon usua mmi ke ini ubọk mmi imiiyemme afai, yak Abasi mme eteete ñnyịn akịt anyʌñ akpe ikpe inọ ndufo."

18 Akem sịbidịd amaadi adidoro Amasai ke idem, andikido abọọñ ke ikpeghe Edịb mme Duob, ndin anye amaabo:

"Defid, ñnyịn ido ake mfo!

Ñnyịn ida ye afo, ayịn Yesi!

Uforo unie fiin,

uforo anyʌñ anie afịd mbon se unwam fiin,

sia Abasi mfo ayaunwam fiin."

Ndin Defid amaadaara ammọ anyʌñ anam ammọ mme adadusʌñ ke atu mbon ekọñ se itañ mbịme amọ.

19 Ubaak mbon Manase emaewuọñọ ekeene Defid ke idaha anye akesañake ye mbon Filistia adinwana Sọọl. (Anye ye mbon amọ ikinwamma mbon Filistia sia, ke emaekedọñọ adu, mme adaukara ammọ emaebịne anye esio. Ammọ emaebo ete, "Ayaadat iwuod ñnyịn adieke anye afegheke abịne eteufọk amọ Sọọl.") 20 Ke ini Defid akekaaha Siklak, mme ideen Manase se ikiwọññọ ikeene anye ekedo ami: Adna, Yoosabad, Yediayel, Maikel, Yoosabad, Elihu ye Siletai, adaiwuod ke ikpeghe tọsịn keed ke Manase. 21 Ammọ emaenwam Defid adinwana ye mbon esiyịppe ñkpọ, sia afịd ammọ ekedo mme anie adudu mbon anwan, ndin ammọ ekedo mme adaiso ekọñ. 22 Ke usen ke usen, mme awo emaedi edinwam Defid, tutu anye anie ataa ekamba udịmekọñ, nte udịmekọñ Abasi.

23 Ibad ideen se ikidi ibịne Defid ke mbeeñe idem ekọñ ke Hibrọn edikappa abio Sọọl nsịn anye ke ubọk, naña Abọọñ aketañ ake adom:

24 tọọñọ ke Yuda awo tọsịn itiokeed mme ikie itiaita (6,800) ekama atuekọñ ye eduad eba ke mbeeñeidem ekọñ;

25 tọọñọ ke Simiọn, mbon anwan awo tọsịn itiaba mme ikie keed (7,100) eba ke mbeeñeidem anwan;

26 tọọñọ ke Lifai awo tọsịn inaañ mme ikie itiokeed (4,600), 27 adiana ye Yehoiyada, adadusʌñ ufọk Erọn, ye ideen tọsịn ita mme ikie itiaba (3,700), 28 ndin Sadọk, uko akparawa ekọñ, ye ikpọawo edịb mme iba (22) e-eketooho ufọk amọ;

29 tọọñọ ke ñkan Benyamin, ntịppe ubon Sọọl, awo tọsịn ita (3,000), ataa uwak ammọ emaesọọñọ eda ye ufọk Sọọl tutu idaha ado;

30 tọọñọ ke Ifrem, mme asọñ adudu mbon ekọñ, ewuọhọ etob ke ñkañ idʌñ ammọ ekedo awo tọsịn edịb mme ikie itiaita (20,800);

31 tọọñọ ke ubaak ubon mbon Manase, awo tọsịn duob mme itiaita (18,000) ke ekesio ke anyịñ ke anyịñ yak edi edinam Defid abọọñ;

32 tọọñọ ke Isaka, ideen se ikidiọọñọ ini ado enyʌñ ediọọñọ se Isrel akpena anam ye mme mbọọñ ikie iba (200), ye afịd mme ekpək ammọ ke idak ukara ammọ;

33 tọọñọ ke Sebulọn, mme anie ifiọk mbon ekọñ emaekebeeñe idem anwan ye afịd mme ñkpọ ekọñ, adinwam Defid ye ayọhọ ndukoppo keed ekedo awo tọsịn aba mme duob (50,000);

34 tọọñọ ke Naftali ikpọawo ekọñ tọsịn keed, ediana mme ideen tọsịn edịb mme duob mme itiaba (37,000) ekama mme atuekọñ ye mme eduad;

35 tọọñọ ke Daan, awo tọsịn edịb mme itiaita mme ikie itiokeed (28,600) emaeba ke mbeeñeidem ekọñ;

36 tọọñọ ke Asaa, awo tọsịn aba (40,000) ekenieghe ifiọk unwana ekọñ emaebeeñe idem ekọñ;

37 tọọñọ ke edem usakkautịn ñkan Yọdan, atọọñọke ke Rubịn, Kad ye ubaak esiin Manase, mme awo tọsịn ikie mme edịb (120,000) emaebeeñe idem ye afịd ñkpọekọñ.

38 Afịd ibon ami ekedo mbon unwana ekọñ e-ekenyịmmeke adinwam ke mme ndaha ami.

Ammọ emaedi Hibrọn ye ayọhọ unyịmme ye mbeeñeidem adinam Defid ado adidem anọ afịd Isrel. Afịd mbon Isrel mfen ñko ekenyʌñ enie esịd keed adinam Defid ado adidem. 39 Mme ideen ami ekeba ye Defid usen ita, edia enyʌñ enwọñ, sia mbon ubon ammọ emaenọ ammọ afịd se ammọ ekpeyem. 40 Ñko, mme mbọhọidʌñ ammọ e-eketooho ataa anyan usʌñ nte Isaka, Sebulọn ye Naftali emaedi ekoono ndidia ammọ ke anyọñ dọñki, kamel, ñwaahadọñki ye mme abaakenañ utominwañ. Mme ñkpọ emaeba uwak-uwak nte ndomuyo, mme eboho fik, nsaad kreb, ukọd, adan ọlif, mme enañ ye mme edọñ, sia idaara amaaba ke Isrel.