1 Ammọ emaeben akebe edioomo Abasi edʌk edinịm ke esịd atayad ake Defid akewuuhọ anọ anye, ndin ammọ emaenyʌñ ewa ufọfọb uwa ye uwa adidiana keed ke iso Abasi. 2 Ke Defid amaakema ufọfọb uwa ye uwa ewuana, anye amaadiọñ mbon awo ke anyịñ Abọọñ. 3 Ndin anye amaanọ eboho uyo keed, ye eboho uyo enwannanwan ye eboho nsaad ndomuyo, edeeme enọ afịd mbon Isrel, ibaan ye ideen.

4 Anye amaamek ubaak mbon Lifai adinam utom ke itie akebe edioomo Abọọñ, adinọ anye ubọọñ, ñkọọm, ñnyʌñ ntooro Abọọñ, Abasi Isrel: 5 Asaf akedo abọọñ, ndin udiana amọ ke ndaha ekedoñño Sakaraiya, ndin Yaasiel, Semiramod, Yehiel, Matitia, Eliab, Benaiya, Obed-Edom ye Yeiyel. Akena nte ammọ ebre mme ndidoudʌk ye mme ekpa, Asaf akena nte anyeghe mme simbal, 6 ndin mme aku Benaiya ye Yahasiel ekena nte efịt mme adukpoñ ndin-ndin ke iso akebe edioomo Abasi.

7 Ke usen ado Defid amaamek Asaf ye mbon nsaña amọ adinọ Abọọñ itooro ke usʌñ ami:

8 Nọ Abọọñ itooro, koot anyịñ amọ;

ben se anye anam tañ nọ afịd mme idịd.

9 Ikwọ inọ anye, ikwọ itooro inọ anye;

itañ ibaña afịd mme utịppe adinam se anye anam.

10 Ubọọñ anie adisana anyịñ amọ;

yak esịd mbon e-eyemme Abọọñ edaara.

11 Iwuuk anyen ise Abọọñ ye adudu amọ;

iyem iso amọ afịd-afịd ini.

12 Itoiyo mme utịppeñkpọ se anye anam,

mme utịppeñkpọ amọ, ye mme ubiideikpe a-anye akenọọhọ,

13 ndufo mme isʌñutom amọ, mme ntịppe ubon Isrel,

mme andimek amọ, mme nditọ Yekọb.

14 Anye ado Abọọñ Abasi ñnyịn;

ubiideikpe amọ aba ke afịd ederimbod.

15 Anye atoiyo edioomo amọ ke nsi-nsi,

enwọñọ anye akenamma ke tọsịn emana,

16 edioomo a-anye akenamma ye Ebraham,

enwọñọ a-anye akenwọñọke anọ Aisik.

17 Anye amaasọọñọ ami anọ Yekọb nte ewʌhọ

anyʌñ anọ nditọ Isrel nte nsi-nsi edioomo:

18 "Ami ñyainọ ndufo isọñ Kenan

nte udeeme ndufo."

19 Ke idaha ammọ imiikiwakka ke ibad,

enekke esịp, enyʌñ edo isenawo ke esịd,

20 ammọ emaeyooñ eto idịd keed esịm idịd mfen,

etọọñọ ke abio keed tutu esịm mfen.

21 Anye ikiyakka awo ndomokeed afiik ammọ;

ke ntak ammọ anye amaasua anọ mme ndidem:

22 "Ikiituuk mbon se ami mmaakeyet adan;

ikiinam mme prọfed mmi idiọọkñkpọ."

23 Ikwọ inọ Abọọñ, afịd ederimbod;

ikwọrọ adinyaaña amọ ke usen ke usen.

24 Itañ ubọọñ amọ ke atu mme idịd,

mme utịppeñkpọ amọ ke atu afịd mme awo.

25 Sia Abọọñ akpon anyʌñ anekke adot itooro;

anye ado se ebaak ekan afịd mme abasi.

26 Sia afịd mme abasi mme idịd edoñño ubobodñkpọ,

ado Abọọñ akenam mme hefịn.

27 Uyai ye ukpono eba anye ke iso;

adudu ye idadesịd enyʌñ eba ke itie idʌñ amọ.

28 Inọ Abọọñ, afịd ndufo mme ubon ke idịd,

inọ Abọọñ ubọọñ ye adudu.

29 Ndufo inọ Abọọñ ubọọñ a-adotto ye anyịñ amọ,

iben enọ idi ke iso amọ.

Ikpono Abọọñ ke uyai adisana itie amọ.

30 Inie ndịk ke iso amọ, afịd mme idịd!

Ederimbod asọọñọ ada; ikemeke adifemme.

31 Yak mme anyọñ edaara, yak mme isọñ enyʌñ enem esịd;

yak ammọ etañ ke atu mme idịd, "Abọọñ akaara!"

32 Yak inyañ ibom afuut, ye afịd se iba anye ke esịd;

yak mme akpa inwañ eba ke idaara, ye afịd ñkpọ se iba anye ke esịd.

33 Yak mme eto ke akai ekwọ,

yak ammọ ekwọ ke idadesịd ke iso Abọọñ,

sia anye adi adikpe ikpe ederimbod.

34 Inọ Abọọñ ekọọm, sia anye afọn;

ima amọ ado ke nsi-nsi.

35 Isio ñkpo, "Inyaaña ñnyịn, Abasi Andinyaaña ñnyịn;

tañ ñnyịn bok nyʌñ isio ñnyịn fep ke mme idịd,

nọ ñnyịn inọ adisana anyịñ mfo ekọọm,

inyʌñ ibọ ubọọñ ke itooro mfo."

36 Itooro anie Abọọñ, Abasi Isrel,

ke nsi-nsi tutu ke nsi-nsi.

Ndin afịd awo emaebọọrọ, "Amen" ye "Itooro Abọọñ."

37 Ndin Defid amaakpọñ abio Asaf ye mme nsaña amọ mbemiso akebe edioomo Abọọñ adinam ñkpọ do ndin-ndin, akeene mme ndutʌm usen keedekeed. 38 Anye amaanyʌñ akpọñ Obed-Edom ye mme nsaña amọ awo ata mme itiaita adinam ñkpọ do ye ammọ. Obed-Edom ayịn Yedutun, ñko ye Hosaa, ekedoñño mme akpeme inuaatob.

39 Defid amaakpọñ Sadọk, aku ye mme aku ammọ mfen ke iso tabanakịd Abọọñ ke ñkoñ-ñkoñ itie ke Kibiọn 40 adinọ Abọọñ ufọfọb uwa ke akpokoro ufọp uwa ndin-ndin, ke ubakusen ye ndubiayio, ukem-ukem ye afịd se ewet ke Mbed Abọọñ, anye akenọọhọ Isrel. 41 Mbon se ikiba ye ammọ ekedoñño Heman ye Yedutun ye mbon mfen ekemekke enyʌñ esiak anyịñ adinọ Abọọñ ekọọm, "sia ima amọ aba ke nsi-nsi." 42 Heman ye Yedutun ekenie ubiọñutom adifịt adukpoñ ye simbal ñko ye adibre mme ndido mfen nnọọ adisana ikwọ ukpono. Ekedaaha nditọ ideen Yedutun ke inuaatob.

43 Ndin afịd awo emaenyʌñ enyọñọ ufọk ammọ keedekeed, ndin Defid amaatịmme anyọñ akaa adikidiọñ ufọk amọ.