1 Ke Defid amaakesọñ anyʌñ ayọhọ ye isua, anye amaanam ayịn amọ Sọlọmọn adidem ke afịd Isrel.

2 Anye amaanyʌñ akoot mme adaaha ke afịd Isrel abon itie keed, ukem ado ñko ye mme aku ye mme Lifai. 3 Mme Lifai e-ekeyọhọke isua edịb mme duob me akanna ado ke ekebat, ndin afịd ibad ideen ammọ akedo awo tọsịn edịb mme duob mme itiaita (38,000). 4 Defid amaabo ate, "Ke atu ami, tọsịn edịb mme inaañ (24,000) ana nte ese ñkpọ ebaña utom ke tembịd Abọọñ ñko tọsịn itiokeed (6,000) ana eba nte mme adaaha ye mme abiideikpe. 5 Tọsịn inaañ (4,000) ana nte edo mme akpeme inuaatob, ndin tọsịn inaañ (4,000) ana nte etooro Abọọñ ye mme ñkukwak ami ñkenọọhọ ke ntak ami."

6 Defid amaabakka mbon Lifai adọñ ke nsio-nsio ikpeghe akemme ye nditọ Lifai: Kesọn, Kohad ye Merari.

7 Se ikinie mbon Kesọn:

Ladan ye Simei.

8 Nditọ ideen Ladan:

Yehiel akpan, Setam ye Yuel, ekedo ita ke afịd.

9 Nditọ Simei:

Selọmọd, Hasiel ye Haran ekedoñño ita ke afịd.

(Mbon se ikidoñño mme adaiwuod ufọk Ladan ekedom.)

10 Ndin nditọ ideen Simei:

Yahad, Sisa, Yeus ye Beria.

Mme nditọ ideen Simei ekedom, inaañ ke afịd.

11 (Yahad akedo akpa ndin Sisaa ado udiana, ado Yeus ye Beria ikinieghe uwak nditọ ideen; ke ntoro ekebat ammọ nte ubon keed ye ubiọñutom keed.)

12 Nditọ ideen Kohad:

Amram, Isaa, Hibrọn ye Usiel, ekedoñño inaañ ke afịd.

13 Nditọ ideen Amram:

Erọn ye Moses.

Emaesio Erọn enịm, anye ye ntịppe emana amọ ke nsi-nsi, adinam mme nsana ñkan ñkpọ esana, adifọp mme uwa ke iso Abọọñ, adinam ñkpọ ke iso amọ adinyʌñ nnọọ adidiọñ ke anyịñ amọ ke nsi-nsi. 14 Ekebat nditọ Moses awo Abasi nte ubaak esiin ake Lifai.

15 Nditọ ideen Moses:

Kesọm ye Eliesa.

16 Ntịppe ubon Kesọm:

Subeel akedo akpa.

17 Ntịppe Eliesa:

Rehabia akedo akpan.

(Eliesa ikinieghe nditọ ideen mfen, ado nditọ ideen Rehabia emaewak eti-eti.)

18 Nditọ ideen Isaa:

Selọmid akedo akpan.

19 Nditọ ideen Hibrọn:

Yeria akpa, Amaria ayọhọ iba,

Yahasiel ayọhọ ita ndin Yekameem ayọhọ inaañ.

20 Nditọ Usiel:

Maika akpan ye Isia udọ.

21 Nditọ ideen Merari:

Mahli ye Musi.

Nditọ ideen Mahli:

Eliasa ye Kisi.

22 (Eliasa amaakpa inieghe nditọ ideen ndomokeed: anye akenie nditọ ibaan ikpọọñ. Mme ayakka ammọ, nditọ ideen Kisi, emaedọi ammọ.)

23 Nditọ ideen Musi:

Mahli, Eda ye Yerimọd, ita ke afịd.

24 Mbon ntịppe ubon Lifai ke ufọk ammọ ekedoñño ami, mme mbọọñ ufọk naña ekesịn anyịñ ammọ enyʌñ ebat ammọ awo ke awo, a-adooho, mme anam utom emaekeyọhọ isua edịb me akanna ado ekesinamma ñkpọ ke tembịd Abọọñ. 25 Sia Defid amaabo ate, "Sia Abọọñ, Abasi Isrel, amaanọ mbon amọ nduọkadudu anye amaanyʌñ adidʌñ ke Yeruselem ke nsi-nsi, 26 mbon Lifai ikinieghe adibiom tabanakịd me mme ñkpoduoho esidatta enam utom amọ aba." 27 Ke abaña akpatre ikọitem Defid, ekebat mbon Lifai se ikiyọhọ isua edịb ke emana me akanna ado.

28 Utom mme Lifai akedo adinwam nditọ Erọn ke adinam ñkpọ ke tembịd Abọọñ: adise ñkpọ mbaña esịd akwere, mme esịd ubeed, adinam mme ndisana ñkpọ ukpono Abasi esana ye adinam mme utom mfen ke ufọk Abasi. 29 Ammọ ekese ñkpọ ebaña uyo esioho enịm ke akpokoro, asaña-asaña ndomuyo uwa, uyo se yiis imiisịneke, aditem ye adinuakka, ye afịd udomo ñkpọ ye ubom. 30 Ammọ ñko ekena nte esida afịd ubakusen ekọọm enyʌñ etooro Abọọñ. Akena nte ammọ enam ukem ami ke ndubiayio 31 ndin ini keed akeedodo e-efọppọ uwa enọ Abọọñ ke mme usen Sabad, ke mme usọrọ Ufa Afiọñ ye ke mme ndimek usọrọ. Ammọ ekenie adinam ñkpọ nnọ Abọọñ afịd-afịd ini ke ukem-ukem ibad ye ke usʌñ eketañña enọ ammọ.

32 Ndin mme Lifai emaenam mme ubiọñutom ammọ ke atayad mbono, ke Adisana Itie ndin, ke idak nditọete ammọ e-edooho ntịppe ubon Erọn, ke utom itie tembịd Abọọñ.