1 Ke ntọọñọ isua amaakebakka, ke ini ndidem esiwuọñọke eka ekọñ, Yoab amaadat mme udịmekọñ amọ awuọ. Anye amaanịm isọñ mbon Amọn ukpọk anyʌñ akaa ke Raba akekanna anye akʌk, ado Defid akeba ke Yeruselem. Yoab amaanwana ye isọñ Raba anyʌñ anịm anye ke nsobo. 2 Defid amaayaara anyanya ke iwuod adidem ammọ; udob amọ akedo talen kold keed*, ekenyʌñ enam anye ke nsọñudua itiad ndin emaenyʌñ eben anye edot Defid ke iwuod. Anye amaakoono ataa uwak ñkpọ mbịme ato abio ado 3 anyʌñ asịññe mme awo se ikiba do, adeeme ammọ anọ utom ye uyọọkñkpọ ye mme ukịmisọñ ñkọrọ mme ekịd. Defid akenam ami ke afịd mme abio Amọn. Akem Defid ye afịd udịmekọñ amọ emaenyọñọ ekaa Yeruselem.

4 Ke ini amaakeboiyo, ekọñ amaatịppe ye mbon Filistia, ke Kesa. Ke ini ado Sibekai awo Husa amaawot Sipai, awo keed ke atu ntịppe ubon mbon Refaim, ndin mbon Filistia emaeba ke idak ukara mbon Isrel.

5 Ke ekọñ mfen ye mbon Filistia, Elhanan, ayịn Yaiye amaawot Laami ayịneka awodeen Koloyad awo Kad, a-akekamake eduad e-esañ amọ akebaaha nte eto udọkafọñ.

6 Kpa ke iso ekọñ mfen, e-ekenwanake ke Kad, ekaa anyan awodeen keed amaaba a-akenieghe nnuunubọk itiokeed ke ubọk amọ naña iba ye nnuun ukod itiokeed ke ukod amọ naña iba, afịd akedo edịb mme inaañ. Anye ñko aketo ubon Rafa. 7 Ke ini anye akenọọhọ Isrel ñnyọọ, Yọnatan ayịn Simei, ayịneka awodeen Defid, amaawot anye.

8 Mbon ami ekedoñño mbon ubon Rafa ke Kad, ndin ammọ emaekpañña ke ubọk Defid ye ikọd amọ.