1 Ke ini Defid amaaketie ke ufọk ubọọñ amọ, anye amaabo prọfed Natan ate, "Se miin mi, ndʌñ ke ufọk sida, ke ini akebe edioomo Abọọñ asịneke ke idak atayad."

2 Natan amaabọọrọ Defid ate, "Se adodo a-afo anieghe ke esịd, nam, sia Abasi mmọdo aba mme afo."

3 Ado ke akonayio ado, uyio Abasi amaabo Natan, ate:

4 "Kaa kedọkkọ isʌñutom mmi Defid, ‘Se Abọọñ atañ ado ami: Idooho afo uduubọp ufọk ake ami ndiidʌñ ke esịd. 5 Ami ndʌññọ ke ufọk tọọñọ ke usen ami ñkebenne Isrel nsio ke Iyib tutu usen mfịn ami. Ami mmesaña tọọñọ ke atayad keed tutu ñkesịm mfen, tọọñọ ke itie idʌñ keed kaa kewuọ mfen. 6 Ke afịd usʌñisañ mmi ye nditọ Isrel, akenam ami mmaadọkkọ keed ke atu mme andikara* ammọ ami ñkenọọhọ mbo ebọọk ikọd mmi Isrel nte, "Nsoo ido ke ndufo ekama sida ebọp ufọk ennọ miin?" ’

7 "Idahami ndin, dọkkọ isʌñutom mmi Defid, ‘Se Abọọñ Andikponñkan atañ ado ami: ami ñkuben fiin ñkpọñ itie ubọọk ufene, uben nsio ke ukpeme ufene, ñnyʌñ umek fiin andikara ikọd mmi Isrel. 8 Ami mmeba ye afo ke itie nte afo akaaka, ndin ami mmediañña afịd mme asua mfo mfep ke iso mfo. Idahami ami ñyaanam anyịñ mfo aba nte anyịñ mme ñkpọsọñ awo ke ederimbod. 9 Ami ñyaanịm itie nnọ ikọd mmi Isrel ñnyʌñ nsọọñọ ammọ nnịm nọ ammọ enie itieidʌñ ammọ, mbaak awo adifịna ammọ aba. Mbon ibak idiifiighe ammọ aba, nte naña ammọ ekenam ke aditọọñọ 10 nte e-enyʌññọ enam tọọñọ ko ke ini ami ñkemekke mme adaaha nnọ mme ikọd mmi Isrel. Ami ñyaanyʌñ nsuuk afịd mme usua mfo nnịm.

" ‘Ami mmenwọñọ unọ fiin nte ke Abọọñ ayaabọp ufọk unọ fiin: 11 Mme usen uwem mfo ke isọñ emaekweeñe ndin afo anyʌñ anyọñ aka akeba ye mme eteete mfo, Ami ñyaabenne mfịd mfo yak adat itie mfo, keed ke atu nditọ ideen mfo, ndin Ami ñyaanam ubọọñ amọ asọọñọ ada. 12 Anye ado awo adiibọp ufọk innọ miin, ndin Ami ñyaawuuk ebekpo ubọọñ amọ ke nsi-nsi. 13 Ami ñyaado ete amọ, ndin anye ayaanyʌñ ado ayịn mmi. Ami ndiibenne ima mmi nsio ñkpọñ anye tutu amama, naña ami ñkeben nsio ñkpọñ mbon ekebaaha mbemiso afo. 14 Ami ñyaanam anye akaara ke ufọk mmi ye abioubọọñ mmi ke nsi-nsi; ebekpo ubọọñ amọ ayaaba ke nsi-nsi.’ "

15 Natan amaakedọkkọ Defid afịd mme ikọ ñkukịd ami.

16 Ndin adidem Defid amaadʌk aketie ke iso Abọọñ, anyʌñ abo ate,

"Ami ndo anie awo, Abọọñ Abasi, ndin ubon mmi ado nsoo, ake afo ambenne miin adiwuọ utọ ekamba itie ami? 17 Ndin aba nte ami isʌkkọ ikekem ke anyen mfo, Abasi mmi, afo ametañ ikọ abaña ini iso ufọk isʌñutom mfo. Afo, Abọọñ Abasi, amenyʌñ anse miin nte ebo ke ami ndo ataa andikpon ñkan ke atu mme awo.

18 "Nsoo ñkpọ mfen ke Defid akeme aditañ unọọ fiin ke Afo adikpono isʌñutom mfo? Sia Afo amediọọñọ isʌñutom mfo, 19 Abọọñ. Ke ntak isʌñutom mfo ye ke uduak mfo, afo amenam afịd ikpọ ñkpọ ami anyʌñ anam ediọọñọ ebaña afịd mme ikpọ enwọñọ ami.

20 "Ibaaha anditie nte afo, Abọọñ, ñko inyʌññọ iba Abasi mfen kpa afo ikpọọñ, nte naña ñnyịn ikop ke utọñ ñnyịn. 21 Ndin mme anie iba nte ikọd mfo Isrel, idịd keed ke iso isọñ ake Abasi akekaaha akefak asio anọ idem amọ, anyʌñ anịm anyịñ anọ idem mfo, anyʌñ anam ñkpoon ye mme utịbe ñkpọ ke adibịne mme idịd ye mme abasi ammọ nsịññe ke iso ikọd mfo, ake afo akefakka asio ke isọñ Iyib? 22 Afo amaanam ikọd mfo Isrel edo asaña-asaña ake mfo ke nsi-nsi, afo ñko, Abọọñ, amaanyʌñ akappa ado Abasi ammọ.

23 "Ndin, Abọọñ, yak enwọñọ a-afo anamma abaña isʌñutom mfo ye ufọk amọ asọọñọ ada ke nsi-nsi. Nam naña afo akenwọñọ, 24 nọ anye asọọñọ ada ñko ma anyịñ mfo akpon ke nsi-nsi. Ndin mme awo eyaebo ete, ‘Ado Abọọñ Andikponñkan, Abasi andikara Isrel, ado Abasi Isrel!’ Ndin ufọk awo mfo Defid ayaasọọñọ ada ke iso mfo.

25 "Afo, Abasi mmi, ameyaara anọ afʌnadeen mfo ate ke afo ayaabọp ufọk anọ anye. Ntom ke afʌnadeen mfo anie uko adibọñ akam unọọ fiin. 26 Afo, Abọọñ, ado Abasi! Afo amaanwọñọ mme nti ñkpọ ami anọ awo mfo. 27 Idahami unem fiin esịd adidiọñ ufọk afʌnadeen mfo, nọ anye akaiso aba ke iso mfo ke nsi-nsi; sia afo, Abọọñ, amediọñ anye, ndin eyaediọñ anye ke nsi-nsi."