1 Ke Defid amaakebọp ufọk anọ idem amọ ke Abio Defid, anye amaatịm itie anọ akebe edioomo Abasi anyʌñ atuak afe anọ anye. 2 Akem Defid amaabo ate, "Inaaha awo ndomokeed ke imiibọhọke mme Lifai ikpọọñ enie adiben akebe edioomo Abasi, sia Abọọñ amek ammọ adiben akebe edioomo Abọọñ ndin adinyʌñ nnam utom ke iso amọ ke nsi-nsi."

3 Defid amaakoot afịd Isrel abok atọ keed ke Yeruselem adiben akebe edioomo Abọọñ ndi itie ekediọññọ enọ anye.

4 Defid amaakoot abon itie keed afịd ntịppe ubon Erọn ye mme Lifai:

5 Tọọñọ ke ubon Kohad,

Uriel adadusʌñ ye nditọete 120 (ikie keed mme edịb);

6 ke ubon Merari,

Asaiya adadusʌñ ye nditọete 220 (ikie iba mme edịb);

7 ke ubon Kesọn*,

Yuel adadusʌñ ye nditọete 130 (ikie keed mme edịb mme duob);

8 ke ubon Elisafan,

Semaiya adadusʌñ ye nditọete 200 (ikie iba);

9 ke ubon Hibrọn,

Eliel adadusʌñ ye nditọete 80 (anaañ);

10 ke ubon Usiel,

Aminadab adadusʌñ ye nditọete 112 (ikie keed mme duob mme iba).

11 Akem Defid amaasịn uyio akoot Sadọk ye Abiata andikido aku, ndin ye Uriel, Asaiya, Yuel, Semaiya, Eliel ye Aminadab awo Lifai. 12 Anye amaabo ammọ ate, "Ndufo edo mme iwuod ke ubon mme Lifai ami; ndufo ye mbon Lifai mfen ana nte enam idem ndufo esana enyʌñ eben akebe edioomo Abọọñ, Abasi Isrel, edi itie ami ñkebeeñeke nnịm nnọ anye. 13 Akedo sia ndufo, mme Lifai, ikibenne anye idi ke akpa ini Abọọñ Abasi ñnyịn akeyatta esịd ye ñnyịn. Ñnyịn ikibịppe anye ibaña naña ikpinam anye ke usʌñ a-afọnnọ." 14 Ndin mme aku ye mme Lifai emaenam idem ammọ esana mbaak ammọ ekeben akebe edioomo Abọọñ, Abasi Isrel. 15 Ndin mbon Lifai emaeben akebe edioomo Abasi ye mme ukwak ke afara ammọ, naña Moses aketemme ye naña asaña akekem ye ikọ Abọọñ.

16 Defid amaadọkkọ mme adadusʌñ mbon Lifai ate yak esio mbon Lifai ammọ enịm nte mbon ikwọ edikama mme ndido ikwọ nnam uyom idaara: mme ndidoudʌk, mme ekpa ye mme simbal.

17 Ndin mme Lifai emaemek Heman ayịn Yuel; ke ñkañ aduuk amọ, emek Asaf ayịn Berekia; ndin ke ñkañ nditọete ammọ, emek mbon Merari, Etan ayịn Kusaiya; 18 ndin ye mme nditọete ammọ mfen ekedianake ammọ ke ndaha: Sakaraiya, Yaasiel, Semiramod, Yehiel, Unni, Eliab, Benaiya, Maaseiya, Matitia Elifelehu, Mikneiya Obed-Edom ye Yeiyel mme akpeme inuaatob.

19 Mme mbon ikwọ Heman, Asaf ye Etan ekena nte efịt ndido ake brọns; 20 Akena Sakaraiya, Yaasiel*, Semiramod, Yehiel, Unni, Eliab, Maaseiya ye Benaiya ebre mme ndidoudʌk nte ake alamọd, 21 Ndin Matitia, Elifelehu, Mikneiya, Obed-Edom, Yeiyel ye Asasia ekena nte ebre mme ekpa nte ake Seminid. 22 Kenania andikido iwuod mbon Lifai akedo adadusʌñ ke ikwọ; ubiọñutom amọ akedo ado sia anye amaadiọọñọ anyʌñ anie asaña-asaña enọ.

23 Berekia ye Elkana ekena nte edo mme akpeme inuausʌñ nnọ akebe edioomo. 24 Sebania, Yosafad, Netanel, Amasai, Sakaraiya, Benaiya ye Eliesa aku ekena nte efịt adukpoñ ke iso akebe edioomo Abasi. Obed-Edom ye Yehia ñko ekena nte ekpeme inuausʌñ akebe edioomo.

25 Ndin Defid ye mme ñkpisọñ Isrel ye mme ikpọ mme adaiso udịmekọñ ake ikpeghe tọsịn keed emaekaa adikiben akebe edioomo Abọọñ ke ufọk Obed-Edom, ke idaara. 26 Sia Abasi amaakenwam mme Lifai ekebenne akebe edioomo Abọọñ, emaewa ñyaara enañ itiaba ye akukịmedọñ itiaba. 27 Ndin emaesịn Defid uyaiya afọñ linen, ukem naña ekesịn afịd mme Lifai e-ekebenne akebe edioomo ado, kpa ye mbon ikwọ, ye mbon Kenania, a-akeseeghe ñkpọ abaña ikwọ ye mbon ikwọ. Defid amaanyʌñ asịne afọñ aboditọñ ake linen. 28 Ndin afịd mbon Isrel emaeben akebe edioomo Abọọñ ye ñkpo, ye ufịt uyom nnʌk akukịmedọñ ye mme adukpoñ, ye ake mme simbal, ye adibre mme ndidoudʌk ye mme ekpa.

29 Idaha akebe edioomo Abọọñ akesʌkkọ adʌk Abio Defid, Maikal ayịn awonwaan Sọọl amaada ke ubenafịm ase. Ke anye amaakekịt Adidem Defid naña anek unek anyʌñ adaara, anye amaase anye ke ndek ke esịd amọ.