1 Setan amaadakka ada anam ikọ ye nditọ Isrel anyʌñ anyịk Defid nọ anam ubadawo ke Isrel. 2 Ndin Defid amaabo Yoab ye mme adaiso mbon ekọñ ate, "Ikaa ikibat mbon Isrel tọọñọ ke Beeseba tutu akewuọ Daan. Ndin inyọñ idindọkkọ miin nọ ami ndiọọñọ me ammọ ewak die."

3 Ado Yoab amaabọọrọ, "Abọọñ akpekap anam udịmekọñ amọ awak ke itie ikie (100) akan naña akedo. Abọọñ mmi ye adidem mmi, nte ammọ idooho ikọd mfo? Nsoo inam nọ abọọñ mmi ayem adinam utọ ñkpọ ami? Nsoo inam yak anye akpeben ndudue anọ Isrel?"

4 Ado uyio adidem amaasọñ akan uyio Yoab; ndin Yoab amaadakka anyʌñ asaaña ke afịd Isrel akem atịmme anyọñ adi Yeruselem. 5 Yoab amaakedọkkọ Defid ibad mme anwana ekọñ se iba: Ke afịd isọñ Isrel akedo ideen miliọn keed mme tọsịn ikie keed (1,100,000) ekeba se ikikan adikama akañkañ, adiana ye awo tọsịn ikie inaañ mme ata mme duob (470,000) ke Yuda.

6 Ado Yoab ikisịnne mbon Lifai ye mbon Benyamin ke ibad ami, sia ewʌhọ adidem amaadiọọk anye esịd. 7 Ewʌhọ ami ñko akedo idiọọkñkpọ ke iso Abasi; ndin anye amaamia Isrel ufen.

8 Akem Defid amaabo Abasi, "Ami mmenam ekamba idiọọkñkpọ ke adinam ami. Idahami, ami mmuukpeiye fiin, ben ndudue awo mfo fep. Ami mmenam ataa ndisịme ñkpọ."

9 Abọọñ amaabo Kad, akịdñkukịd nnọọ Defid, 10 "Kaa kedọkkọ Defid, ‘Ami ado se Abọọñ atañ: Ami unọ fiin usʌñ ñkpọ ita. Mek keed ke atu ammọ sio se ami mben umia fiin ufen.’ "

11 Ndin Kad amaakaa abịne Defid akebo anye, "Ntom ke Abọọñ abo: ‘Mek se afo ama: 12 akañ isua ita, me edikwọọk ndufo nduọọk ke iso mme asua ndufo ke afiọñ ita, ndin akañkañ ammọ ikanna ndufo ekʌk, me eduad Abọọñ, ye mme usen idiọọk udọñọ ke abio, ye enyere Abọọñ adisobo afịd itʌñ ye inuuk ke Isrel ke usen ita.’ Ndin idahami, biere naña ami mbo ñkedọkkọ awo a-akendọññọ miin."

13 Defid amaabo Kad, "Ami mba ke ataa ekamba mfʌhọ. Yak ami nduọ ndʌk ubọk Abọọñ, sia mbọm amọ anekke akpon; ado kuuyak ami nduọ ndʌk ubọk awo."

14 Ndin Abọọñ amaadọñ udọñọ nsobo asịn ke Isrel, ndin ideen Isrel tọsịn ata mme duob (70,000) emaeduọññọ ekpañña. 15 Ndin Abasi amaadọñ enyere akesobo Yeruselem. Ado naña enyere akenamma ntoro, Abọọñ amaakịt anyʌñ asịññe idem akpọñ nsobo ami anyʌñ abo enyere a-akesoboke mme awo, "Akem! Sio ubọk mfo." Enyere Abọọñ mmọdo akeda ke iso afe ubeek abakpa Arauna* awo Yebus.

16 Defid amaadịppe anyen anyʌñ akịt enyere Abọọñ naña ada ke ufọọd hefịn ye ederimbod, ye akañkañ ke ubọk amọ ase afịd Yeruselem. Ndin Defid ye mme ñkpisọñ, emaesịne ntaha afọñ, enyʌñ eduọñọ efʌk iso ke isọñ.

17 Defid amaabo Abasi, "Nte idooho ami ñkenọọ uyio mbo ebat mme anwana ekọñ? Ami, akpemeedọñ, mmenam idiọọkñkpọ ñnyʌñ ndue. Mbon ami edoñño mme edọñ. Nsoo ke ammọ enam? Abọọñ Abasi mmi, yak ubọk mfo andoro miin ye ufọk mmi ikpọọñ ke idem, ado kuuyak udọñọ ami asʌhọ ye ikọd mfo."

18 Ndin enyere Abọọñ amaanọ Kad uyio ewʌhọ ate adọkkọ Defid yak anye adakka adọọk akebọp akpokoro uwa anọ Abọọñ ke ñkañ ntondʌk afe ubeek abakpa Arauna awo Yebus. 19 Ndin Defid amaadọọk akaa ke ñkobitem naña Kad aketañ anọ anye ke anyịñ Abọọñ.

20 Ke ini Arauna asʌkkọ asaat mfịd, anye amaakanna anyen anyʌñ akịt enyere; nditọ ideen amọ inaañ e-ekebaaha mme anye emaekedịp idem ammọ. 21 Akem Defid amaasaña akpere, ndin ke ini Arauna akedịppeke iso anyʌñ akịt anye, Arauna amaakpọñ afe ubeek abakpa anyʌñ afʌk isọ ke isọñ atuak iwuod amọ anọ Defid.

22 Defid amaabo Arauna ate, "Nnọ miin afe ubeek abakpa mfo yak ami ndat mbọp akpokoro uwa nnọ Abọọñ, mbaak udọñọ nsobo ami atre. Nyam anye nnọ miin ke ayọhọ ekọmudua amọ."

23 Arauna amaabo Defid ate, "Dat! Yak abọọñ mmi adidem anam se adodo anemme anye esịd. Se, ami ñyaanọ ayaaraenañ ke ñkpọ uwa, mme akpeti ubeek abakpa nte ifia, ye abakpa nte enọ ñkpasi. Ami ñyaanọ afịd mme ñkpọ ami."

24 Ado adidem Defid amaabọọrọ Arauna ate, "Iyoo, ami mmeyịre ntañ ke ana ñkpe afịd ekọmudua. Ami ndiibenne nnọ Abọọñ se ido ake mfo, me adiwa ufọfọb uwa ake imiñkpaaha miin ñkpọ ndomokeed."

25 Ndin Defid amaakpe Arauna sekel kold ikie itiokeed (600)* ke itie isọñ ado. 26 Defid amaabọp akpokoro uwa ke ndo anọ Abọọñ anyʌñ awa mme ufọfọb uwa ye uwa adiwuanakeed. Anye amaakoot Abọọñ, ndin Abọọñ amaayie anye ke ikañ aketooho anyọñ adiduọ ke akpokoro uwa ufọfọb uwa.

27 Akem Abọọñ amaatañ ikọ ye enyere, ndin anye amaasịn afịd amọ ke efọk. 28 Ke idaha ado, ke Defid amaakekịt ke Abọọñ amaabọọrọ anye ke afe ubeek abakpa Arauna awo Yebus, anye amaanam mme uwa ke ndo. 29 Itie tabanakịd Abọọñ, ake Moses akebọppọ ke anaan, ye itie ufọb uwa ekebañña idaha ado ke anyọñ-anyọñ ukan Kibiọn. 30 Ado Defid ikikanna ika ke iso amọ adikibịp nto Abasi, sia anye amaakop ndịk abaña eduad enyere Abọọñ.