1 Defid amaaneme ye ikpọ mbon ukara amọ keedekeed, mme adaiso udịmekọñ tọsịn (1,000) ye mme adaiso udịmekọñ ikie (100). 2 Akem Defid amaadọkkọ afịd esob ufọk Isrel, "Akpedo afọn ye ndufo ñko akpedo ado uduak Abọọñ Abasi, yak ñnyịn inọ etob esọk ikọd ñnyịn ke anyan usʌñ ye ke ñkped-ñkped ke afịd ñkanñkʌk abio Isrel, ñko ye mme aku mme Lifai e-ebaaha ye ammọ ke mme abio ammọ ye ke mme inwañ ubọọk ufene, nọ ediwuana ye ñnyịn. 3 Yak ñnyịn imaana iben akebe edioomo Abasi ñnyịn idi, sia ñnyịn ikibịppe ibaña anye ke idaha Sọọl akedaaha ukara." 4 Afịd esob ufọk Isrel emaenyịmme adinam ami, sia akedo ñkpọ se ifọn ke anyen afịd awo.

5 Ndin Defid amaabono afịd Isrel, tọọñọ ke Inyañ Sihọ ke Iyib tutu akewuọ Lebo Hamad, adiben akebe edioomo Abasi nto Kiriad Yerịm. 6 Defid ye afịd Isrel emaekaa ke Baala ake Yuda (Kiriad Yerịm) edikiben akebe edioomo Abasi Abọọñ, do nto ndi, e-edotto ke ufọọd ikpeghe serubim, akebe edioomo e-ekoodo ke Anyịñ ado.

7 Ammọ emaeben akebe edioomo Abasi esio ekpọñ ufọk Abinadab ke ufa ukpadñkpọ, Usa ye Ahio eba ekpeme anye. 8 Defid ye afịd nditọ Isrel emaenam idaara ke afịd ukeme ammọ enọ Abasi, ye mme ikwọ ye mme ekpa, mme ndidoudʌk, mme ibịdubọk, nsak, mme simbal ye mme adukpoñ.

9 Ke ammọ emaekediwuọ itie ukọkñkpọ Kidọn, Usa amaanyan ubọk amʌm akebe edioomo, sia mme enañ emaetuak ukod eteññe. 10 Ikañ iyadesịd Abọọñ amaabịppe ata Usa, ndin anye amaamia anye anịm ke isọñ sia anye amaaben ubọk amọ aketuuk akebe edioomo Abasi. Anye amaakpa ke ndo ke iso Abasi.

11 Ndin Defid amaayat esịd sia iyadesịd Abọọñ amaasịm Usa, ndin tutu usen mfịn ami ekoot itie ado Peres Usa.

12 Defid amaakop ndịk abaña Abasi usen ado, ndin amaanyʌñ abịp ate, "Ndiinam die mben akebe edioomo Abasi yak adiba ye ami?" 13 Anye ikibenne akebe edioomo ami nọ adiba ye anye ke abio Defid. Utu ke ado, anye akeben aka ufọk Obed-Edom awo Kad. 14 Akebe edioomo Abasi amaaba ye ubon Obed-Edom ke ufọk amọ ke afiọñ ita, ndin Abọọñ amaadiọñ afịd ufọk amọ ye afịd ñkpọ se anye akenie.