1 Defid amaakoot afịd mme adaaha ke Isrel ate esoobo ke Yeruselem: mme ikpọawo e-ekeseeghe ñkpọ ebaña mme esiin Isrel, mme adaiso ekọñ e-ekeseeghe ñkpọ ebaña ikpeghe mbon utom adidem, mme adaiso ekọñ ke mme tọsịn (1,000) ye mme adaiso ekọñ ke mme ikie (100), ye mme adaaha e-ekeseeghe ñkpọ ebaña afịd inie ye ufene e-ekenieghe adidem ye nditọ amọ ideen, adiana ye mme ikpọawo ufọk ubọọñ, mbon ekọñ ye afịd ideen uko mme anwana anwan.

2 Adidem Defid amaadakka ada ke ukod amọ abo ate: "Ikpañ utọñ innọ miin, ikọd mmi Isrel. Ami mmaanie ke esịd mmi adibọp ufọk nte itie nduọkadudu nnọ akebe edioomo Abọọñ, nte udodukod Abasi ñnyịn, ndin ami mmaanam uduak adibọp anye. 3 Ado Abasi amambo miin ate, ‘Inaaha afo abọp ufọk anọ Anyịñ mmi, sia afo ado awo anwanaekọñ ñko amenyʌñ aduọk iyiib.’

4 "Ado Abọọñ, Abasi Isrel, amammek miin asio ke afịd ufọk ñnyịn adido adidem nnọ Isrel ke nsi-nsi. Anye amaamek Yuda nte adaiwuod, ndin ato ke ubon Yuda anye amek ubon mmi, ndin ato ke atu nditọ ideen ete mmi anye amaanem esịd adimmek miin adidem nnọọ Isrel. 5 Ke afịd nditọ ideen mmi, Abọọñ annọ miin uwak, anye amaamek Sọlọmọn ayịn mmi aditie ke ifịm ubọọñ ebekpo Abọọñ nnọ Isrel. 6 Anye amambo miin ate: ‘Sọlọmọn ayịn mfo ado awo ansidiibọp ufọk mmi ye mme akwere mmi, sia ami mmemek anye adido ayịn mmi, ndin ami ñyaado ete amọ. 7 Ami ñyaawuuk ebekpo ubọọñ amọ ke nsi-nsi adieke anye adiituak ida ke adinam ewʌhọ mmi ye mme mbed mmi, nte naña enam ke ini ami.’

8 "Ke ntoro idahami ami mmidʌt ndufo utọñ ke iso afịd Isrel ye ke esob Abọọñ, ndin ñko nọ Abasi ñnyịn akop: Ikpeme adinịm afịd mme ewʌhọ Abọọñ Abasi ndufo, nọ ndufo edat eti isọñ ami enie enyʌñ eyaak enọ mbon mfen nte ñkpọ adiaakpa ke nsi-nsi.

9 "Ndin afo, ayịn mmi Sọlọmọn, nịm Abasi ete mfo ke akpanikọ, nyʌñ nam ñkpọ nọ anye ye ukpono ke uyọhọesịd, sia Abọọñ aduuñọ afịd esịd anyʌñ adiọọñọ afịd akikere. Adieke afo ayemme anye, afo ayaakịt anye; ado adieke afo asịnne anye, anye ayausịn fiin ke nsi-nsi. 10 Diọọñọ ndin, ke Abọọñ amaumek fiin ate yak abọp itieukpono. Sọñ idem nyʌñ nam utom ado."

11 Ndin Defid amaanọ ayịn amọ Sọlọmọn ñwed mbeeñeidem ubọp tembịd, ufọk amọ, ubeed udọñ ñkpọ amọ, ñkañ anyọñ-anyọñ, mme ñkañ esịd ubeed ye itie unam ñkpeubọk. 12 Anye amaanọ anye afịd ñkpọ mbeeñeidem se Sịbidịd akesịn ke esịd amọ ke abaña tembịd Abọọñ ye afịd mme ñkanñkʌk ubeed, ake itie unịm akʌk tembịd Abasi ye ake itie enịmme enọ ndisana ñkpọ tembịd. 13 Anye amaanọ item abaña mme ikpeghe mme aku ye mbon Lifai, ye afịd utom e-enamma ke tembịd Abọọñ, ukem ado ye afịd mme ñkpoduoho e-ekamake enam utom. 14 Anye amaanịm kold se inie udob anọ afịd ñkpọ kold nọ ekama enam mme nsio-nsio utom, ndin ye udob silfa anọ afịd ñkpọ silfa nọ edat enam nsio-nsio utom: 15 udob kold ke ñkpọ udod utuenikañ kold ye mme ikañ ammọ, ye udob udodikañ keedekeed ye mme utuenikañ amọ, ye udob silfa ke udodikañ silfa keedekeed ye mme ikañ amọ akeene se ido utom udodikañ keedekeed; 16 udob kold akpokoro adisana akpokoro uyo keedekeed; udob silfa ake mme akpokoro silfa; 17 udob eti kold e-enọọhọ mme ikpañ ukịmñkpọ, mme besịn usiime mmọọñ ye udodñkpọ; udob kold anọ usan kold keedekeed; udob silfa anọ usan silfa keedekeed; 18 ndin udob kold e-emaeketem anie akpokoro uwa insensi. Anye ñko amaanyʌñ anọ anye ndadusʌñ ke abaña sariọd, ado awuọñọ, serubim ake kold etaarake mba ammọ efʌk akebe edioomo Abọọñ.

19 Defid aketañ abo, "Afịd ñkpọ ami mmewet nsịn ke ñwed akeene ubọk Abọọñ ke idem mmi, ndin anye anam ami ndiọọñọ afịd ntotəño uduak ami."

20 Defid ñko amaadọkkọ Sọlọmọn ayịn amọ ate, "Sọñ idem nyʌñ kop uko, nyʌñ nam utom ami. Kuukop ndịk kuunyʌñ ukpa mba, sia Abọọñ Abasi, Abasi mmi, mmọdo aba ye afo. Anye idiikpuuho, idiinyʌññọ ifeghe ukpọñ fiin tutu afịd utom ke abaña tembịd Abọọñ akweeñe. 21 Mme ikpeghe mme aku ye mbon Lifai ebañña ke mbeeñeidem adinam afịd utom ke tembịd Abasi, ye afịd mbon se ikinyịmme e-enieghe ifiọk nsio-nsio ubọkutom eyaunwam fiin ke afịd mme utom ami. Mme adaaha ye afịd awo eyaekpono afịd ewʌhọ mfo."