MALEKO 5

Yesu ombwikya oso Basombo babe

1 Ango Yesu la baeki bande ba saphwaki eliya e Galilaya. Baiye o wooni ba Gelaseni. 2 Yesu apasi e Kyombo, kako nkango, bonto ɔmɔɔ aimaki weebeli e baombo la manda mboosaŋanya. Ongo bonto aiki la basombo babe. 3 La wiiki atayale atei ba baombo. Koo onto ɔnɛ asana mbookemela la mbɔɔlɛma koonga la munyɔlɔlɔ bɔmɔɔ; 4 Aliko kila wiina banto baɔlɛmaki mbolo wee kolo la minyɔlɔlɔ waakasa, atenaki minyɔlɔlɔ la nkelola ingo mbolo. Koo bonto aiki la nkulu ya mbɔɔlɛmbya. 5 Ongo bonto aaŋangaki bocho la yaani, o baombo la bɛɔkɔ, la ata okoma la mbwi yɔtaya nɛmɛlɛ la abwɛ. 6 Ango aɛni ndako Yesu bɔɔ; achwe loango, nkɔma balwe otamboka lande, 7 La aokomi la nkulu: «Yesu atalange nke, Bɔna a Onto ole eliko bɔɔ? Mbokolɔmba elokombo, la Kanamombe, konduwanyake!» 8 Ongo bonto alɔndi ingo aliko Yesu aosimelaki: «Bosombo bobe pasa ele ɔnɛ bonto!» 9 Pa Yesu auumboli ongo bonto: «Lokombo labɛ nani?» Auchisa: «Lokombo lami ike»,*5.9 Boloi ba anto. Lokombo lɔnɛ lɔlɔndi lonkinɛ boloi ba Bakɔlɔbɔi 6000 la balɔndi ŋaanɛ wiike ba Basombo babe. legion ko nɔnda ike, aliko tolende ike. 10 La ongo a memeyaki nseya Yesu ataitake basombo babe anja la bongo booni.

11 Ango kaama kaiki nde boloi bɔmɔɔ ba nsombo balɛɛki sukɛlɛ la bokondi ɔmɔɔ. 12 Basombo bachwaki la maɔmbi baɔ ele Yesu: «Ototome o nsombo, ɔtɔya loosa tuingele kaɔ!» 13 Yesu abaɔyisa loosa. La bango basombo babe bapasi ele ongo bonto la baingeli wiingo nsombo. Boloi lalikuli baiyoki e eliya la babwe. Baiki ilango elefu iphee. 14 Pa bango banto baiki batachunge nsombo bachwe ntɔla besako e wooni la bɛsɛngɛ baandi mɛna bingo beeti. 15 Baiyisa mɛ la Yesu la mɛna bonto aiki la wiike baasombo babe: aiki atasɛlɛla atalɔtɛ bisenda la aiki la limanya jande lilɔti. Ɔmɛna bingo bake mbaema la wɔɔma. 16 Banɛ baɛni bikambwa lalikuli bieti engo, baasimeli banɛ baandi okongo bingo beiyisa ongo onto aiki laasombo aliko la ingo nsombo. 17 Laango baiki batasɛya Yesu: «Apase e wooni baɔ»! 18 La ango aiki Yesu ataulela e kyombo, ongo bonto aiki, aɔlɔmbi Yesu: «Nchu laɛ.» 19 Kinaki, Yesu koo mbo wiimeya, kinaki aosimeli: «Utola kabɛ oolunga babɛ, la oasimele binɛ lalikuli Bɔkɔta okiisa aliko labɛ la ŋango ombo kookela ndako ŋandi.» 20 Lonkinɛ ongo onto achwe la manja mbalaŋanya besao o booni ba Dekapoli*5.20.Dekapoli ko nɔnda nte wooni ba bɛsɛngɛ joomu.. Bingo lalikuli bikɛɛ Yesu aliko la ndako; la bango lalikuli baoki basebalali.