Jọn 15

Ata Vain

1 "Ami ndi ata Vain, ndien Ete Mi edi ese iñwañ. 2 Enye eyesibe kpukpru ñkọk ke Ami, emi miñwumke mfri efep, ndien Enye eyekpọñ kpukpru ñkọk emi oñwumde mfri. 3 Mbufo ema esasana oto ke ikọ emi Ami ñketiñde nnọ mbufo. 4 Ediana kiet ye Ami, ndien Ami ñyediana kiet ye mbufo. Baba ñkọk kiet ikemeke ndiñwum mfri ke idem esie, ibọhọke eyire ke idem eto Vain. Ke ntre mbufo ikemeke ndiñwum mfri ibọhọke mbufo esine ke Ami."

5 "Ami ndi eto Vain, mbufo edi mme ñkọk. Edieke owo odude ke Ami, ndien ami ñko ndu ke enye, enye eyeñwum ediwak mfri; ke esiode Mi efep mbufo idikemeke ndinam ñkpọ ndomokiet. 6 Edieke owo ekededi miduhọ ke Ami, enye ebiet ñkọk emi ema eketop eduọk ndien onyuñ asat, mme utọ ñkọk oro ke etañ enyuñ edọñ ke ikañ efọp. 7 Edieke mbufo edude ke Ami, ndien mme ikọ Mi eduñ mbufo ke esit, ebup sededi emi mbufo emade, ndien eyenọ mbufo. 8 Emi owut ubọñ Ete Mi edieke mbufo eñwumde ediwak mfri, ke usuñ emi ke mbufo ekeme ndiwut idem nte edi mme mbet Mi."