पांच़ 13

6 तेखअ खोज़अ तैहा आपणैं मर्ध मनोहा का इहअ, "बिधातो एक आदमी आअ मुंह सेटा लै, सह शुझिआ त बिधाते स्वर्ग दूता ज़िहअ ज़हा भाल़ी दर्छ़णअ छ़ुटा। नां हुंह तेऊ का पुछ़ी बोल़ी कि सह किधा का आअ अर नां तेऊ आपणअ नाअं खोज़अ। 7 पर तेऊ बोलअ मुल्है इहअ, ‘तूह हणीं सुंदी अर तेरअ हणअ एक शोहरू।’ संघा बोलअ तेऊ इहअ, ‘नां तूह दाखो रस झुटी, नां शूर-शराब झुटी अर नां तिन्‍नां च़िज़ा खाई ज़ुंण बधाने साबै छ़ोतली आसा, किल्हैकि सह हणअ हुऐ ज़ल्मां ओर्ही तेऊए ज़िऊंदी ज़िता बिधाता लै अर्पण किअ द बांधअ।’"

8 तेखअ किई मनोहै बिधाता सेटा एही अरज़, "बिधाता, मेरै मालक, ज़ीबाण, ज़ुंण आदमी तंऐं छ़ाडअ थिअ, तेऊ छ़ाड हाम्हां सेटा लै भिई बापस ताकि सह हाम्हां का खोज़े कि ज़ुंण सह शोहरू हणअ तेऊ लै हाम्हां किज़ै-किज़ै लागणअ करनअ।"