1 Samw 2

Hana jutenda kuloba

1 Ndienu Hana jaaloba nukupwaaga.

"Nuntogule Bambu Sapanga mwoju jangu.

Nundumbalii Bambu Sapanga jojuwe makili gangu

Naaheka abaja bangu;

ndaba ndogule kuwesa kwangu, ndaba Bambu Sapanga junyangati kwaawesa abaja bango!"

2 Ngajojubii jwa sapi ngati Bambu Sapanga;

ndaba ngajongi jojubii ngati jombi,

ngasejubii jongi jojaakomane bandu baki ngati Sapanga witu.

3 Nkotuka kulilumbali,

nkotuka kuba ni ing’omu.

Ndaba Sapanga ndi Bambu Sapanga jojumanya.

Jombi ndi jwagapema mahengu gaki goti.

4 Mipendi ya bana makili itei kutunyuka.

Lakini banga na makili aendale kupata makili.

5 Bababii pa mwandi abii na posu jingi,

ndienu ahenga lihengu ili apata posu.

Lakini bababii ni inzala,

ndienu ngaseabii ni inzala kabee.

Mmbomba jwanga kuwesa kupapa jubeliki bana saba.

Lakini mmbomba jojubii na bana bingi,

ndienu anndei sanga mwana.

6 Bambu Sapanga jukoma nukuyoa;

jombi jahulwii pai kwa bandu baawii,

najombi jaakelabuu kabee.

7 Bambu Sapanga jahenga bandu bangi abia ahagu,

na bangi abii baabi na mali gingi.

Bangi jutenda kwaahulu,

na bangi jutenda kwaakwea.

8 Jaakwea ahagu kuhuma kuluombi,

jaakwea bandu babii na mang’aliku kuhuma mu maliu,

jaatamika pamu na akolongu,

nakwalisisa iteu yi isima.

Ndaba misingi ju nndema ndi jaka Bambu Sapanga,

jombi jujemiki misingi ju nndema.

9 "Jombi ndi jagulenda womi wa bandu bahobaleka,

lakini kutama kwa abaja kugasekuli kutali ku lwii.

Ndaba bandu apata kuwesa kwa makili gaki.

10 Abaja baka Bambu Sapanga baatunula ipandi ipandi,

jilunduma kupete bombi ngati kitobi kunani.

Bambu Sapanga jagutemula nndema woti,

ampekiya makili bambu nkolongu waki,

jagukoa uwesu gwaka mundu joahagwi."