1 Egapeta majambu haga bambu nkolongu Nahashi juku Amoli jwatenda kuwa, na mwana waki jobunkema Hanuni jwabia bambu nkolongu baada ja atati baki. 2 Bambu nkolongu Daudi japwaaga, "Nanhengila gaamboni Hanuni mwana waka Nahashi ngati atati baki hebanhengila nepani." Ndi Daudi jwaatuma bandu kumpeke poli.

Nabombi bandu baka Daudi bala pabahika mu nndema wa Aamoli, 3 akakilongosi ba Aamoli bumpwagila Hanuni bambu nkolongu wabu, "Boo, guwasali Daudi kukutumi bandu bukuhika kugupeke poli jwaatende isima atati bako? Boo, Daudi ngasejwaatuma bandu haba kwaku ili kulingali nu kulaluki majambu ga musi gongo ndi mwenikatai jwaakoma bandu bake?"

4 Ndienu Hanuni jwaajukua bandu bajwaatumiki Daudi bala nukummoga kila jumu nusu ji indeu yaki nukuijendu ingobu yabu pikilanda mbaka mu kibunu nakwaaleka ajenda. 5 Babona iyoni ngamaa kubuja kunyumba jabu. Najombi bambu nkolongu jwaapwagila, "Ntama kumusi guku Yeliku mbaka paimela indeu ndi mwiibuja kunyuma jino."

6 Aamoni pababona atei kunsukisa Daudi, baakoka akomana ngondu elupu ishilini biki Alamu baajenda kwa magolu kuuma ku Beti Lehobu nuku Soba na akomana ngondu elupu komi na abeli kuhuma ku Tobu na bambu nkolongu Maaka koni jubii na akomana ngondu elupu jimu. 7 Najombi Daudi pajowana majambu haga antuma Yoabu na akomana ngondu na baabii na makili kujenda kukomana. 8 Aamoni bapita boti nu kulipanga ili kukomana pu nndyangu wa musi uku Raba musi wabu nkolongu, nabombi Aalamu kuhuma ku Soba nuku Leobu na bandu kuhuma ku Tobu na bambu nkolongu Maaka bilipangiki ku lungwenza.

9 Yoabu pajwabona ngondu jibii ngolongu ngani kulongi nu kunyuma, jwaahagula akomana ngondu bangi buku Izilaeli baabii na makili gu kukomana na Aalamu. 10 Akomana ngondu bangi bala babahigali jwaabeka pai ju ulongosi waka nndongu mundu Abishai, najombi jwaapanga ili kukomana na Aamoni. 11 Yoabu ampwagila Abishai, "Ana Aalamu biitenda kunapu wiinyangatia ana Aamoni biitenda kugulapu niitenda kugujangati. 12 Lakini gulipekia makili na tukomana sanalomi kwa ndaba ja bandu bitu na kwa ndaba ja misi jaka bambu Sapanga witu na bambu Sapanga jutuhengila lejubona laamboni kwaki."

13 Ndienu, Yoabu na bandu baki bajenda kulongi kukomana na Aalamu, nabombi Aalamu batenda kutila. 14 Aamoni pababona Aalamu atei kutila nabombi kabee buntila Abishai nu kujingi kumusi. Yoabu jwakotuka kukomana na Aamoni jwabuja ku Yelusalemu. 15 Lakini Aalamu pababona Aizilaeli baawesiki, bilikusanya pamu. 16 Hadadezeli jwaalagalakia Aalamu bababia kwii ja losi Eufulati baaleta ili baapelika ku Helamu koni alongoswa na Shobaki nkolongu jwaakomana ngondu baka Hadadezeli. 17 Daudi pajwamanya jwaakusanya Aizilaeli boa pamu nukulomboka losi Yoludani nukujenda mbaka ku Elamu. Nabombi Aalamu bilipangiki kukomana na Daudi batumbulia kukomana naku. 18 Lakini Aalamu batila palongi ja Aizilaeli. Daudi jwaakoma na Aalamu mia saba bababia ahendesa magali gukukomane na baakwelale falasi elupu alubaini. Kabee anhumisi Shobaki nkolongu jwa akomana ngondu babu najombi jwakuwa apalapala. 19 Aka bambu akolongu boti bababia atumisi baka Hadadezeli pababona kubanga asindwiki bajetanganinya ku lukwali na Aizilaeli nabombi babia atumisi ba Aizilaeli. Ndi Aalamu ngasebaajangatiya kabee Aamoni.