1 Daudi anzembila Bambu Sapanga malobi gu nhwambu gongo lisoba lela Bambu sapanga paankombula mumaboku ga abaja baki nu mumaboku gaka Sauli. 2 Jwapwaga,

"Bambu Sapanga ndi lilibu lango,

ngome jangu nu nkombosi wangu.

3 Sapanga wangu, ndi lilibu langu, kwaki jwombi ndi kondili womi wango,

ngau jangu na makili ga wokopu wangu,

ngomi jangu na kwaki jombi ndenda kutili.

Nhokosi wangu, gunhoko kuhuma kwa bandu abaja.

4 Nunkema bambu Sapanga jojupalika ulumbi jojunyangati,

nanepani junhoko kuhuma kwa abaja bangu.

5 Ndaba kuwa kwatenda kunhyongalota ngati majeba ga masi,

masi gingi gukukoma gatenda kunhiki,

6 Migoji jukulibomba lilasu jandenda kuyongalota,

Mitaba ja kuwa jatenda kunhiki.

7 Mu mang'aliku gangu nunkema Bambu Sapanga,

nunkema Sapanga wangu.

Kuhuma mu nyumba jaki jwajowana Sauti jangu,

kilelusangu satenda kunhiki mu makutu jaki.

8 Pala ndi nndema watenda kubagaja nukunyukanyuka,

misingi yukunani kwaka Sapanga yatenda kujonga jonga nukuhomba,

ndaba Sapanga jwabia jutei kuyoma.

9 Lihoi lapita kuhuma mu imbulu jaki,

mwotu gogutinyi wapita munndomu waki

makalakala ga mwotu galipuka kuhuma munndomu waki.

10 Jukuyekula kunani nukukuhulu pai,

ni liundi lijilu pai ja magolu gaki.

11 Jwakwei kiumbi sekibii na mapapati nu kugoloka

jwabonikana panani ja mapapati gu nhwai.

12 Juliyongalati lwii pandi yoti

kiyekale saki sabia maundi gagatopi gi iyula.

13 Unanganu wamulika palongi jaki,

kwalipuka makalakala ga mwotu.

14 Bambu Sapanga nkolongu jwatulama kuhuma kunani,

sauti jaka Sapanga jojubii kunani ngani jatenda kujowaneka.

15 Jwaalapula abaja mikoa nukwaapesangana,

jwamulika kitobi nukwaahenga atila.

16 Bambu Sapanga pajwaalakalia,

kupete kupomo kwiimbulu jaki,

pandu punhwanga papanyoliki patenda kuyekuliwa,

misingi junndema jatenda kubonikana.

17 Sapanga jwatondabia kuboku kwaki kuhuma kunani nukunyelu,

kuhuma mu masi gingi jwatenda kundondabe.

18 Jwamoa kuhuma kuku mbaja wangu jojubii namakili,

jwahokula kuhuma kwa bandu bababia atenda kunzuki

ndaba babia na makili gingi gukunhwesa.

19 Bangupalia panabia mu mang'aliku,

lakini Bambu Sapanga jwabia jojunyangati.

20 Jwaneta nukumeka pandu paasapi,

jwanhenga mia namwomi ndaba jwatenda kumbala.

21 Bambu Sapanga jwambekia seketuli ndaba nhenga gajupala,

jutenda kumbenge ndaba ngasemii na makosa.

22 Ndaba mbwatiki gala gajupala Bambu Sapanga,

wala ngasenabi kutali na Sapanga wangu kupete mahakau.

23 Ngamwi malagalaki gaki goti,

ngasenakotwiki kupwata miilu jaki.

24 Palongi jaki ngasenabii na makosa,

nilikengiki niihenga na makosa.

25 Bambu Sapanga jundunziki kulengana na uwamboni wangu,

jombi jumanya kubanga ngasemii na makosa.

26 Weapa gubi weguhobaleka kwa kwabandu baahobaleka,

waamboni kwa bandu baabi baamboni.

27 Weapa ujagani kwabandu baajagani

lakini gubii niinyela kwa bandu baabi na mahakau.

28 Wehapa waaoko baabiliulu,

lakini waalingali baabikipuna ili kwahulu.

29 Mwabambu sapanga, mwehapa ndi taa jango,

Sapanga wangu weguhenga lwii lwangu kuba unanganu.

30 Wehapa gumbeke makili gaka alapu abaja bangu,

nu gumbeke makili gukuhomba lumatu lwaki.

31 Sejuhenga Sapanga ngasekibii na makosa!

Lilagi laka bambu Sapanga ndi lelihobaleka,

jombi ndi ngau kwa boti babuntili.

32 Nya jojubii Sapanga ila pe Bambu Sapanga?

Nya jojubii lilibu la womi ila pe Sapanga witu?

33 Sapanga ndi jojojumbeke makili panumbutukila,

nukuhenga indela jangu kuba jejijagani.

34 Jugahengikina magolu gangu gabia nganganganga ngati holoku,

nukumeka mia na mwomi panani ji itombi.

35 Jumola kukomana ngondu,

maboku gangu gawesa kuhuta nkoa wa madini ga shaba.

36 Gumbeki ngau jaku juku nhoko,

gunyangati mia nu nkolongu.

37 Gujibei indela jangu kuba nyipi,

wala magolu gangu ngaseganyelambwike.

38 Naakaguli abaja bangu na kwaakoma,

ngasenakelabwiki kunyuma mbaka pabakuwa.

39 Naakomiki na kwaahabu pai

biiwesa kujumuka kabe,

baabuka pai ja magolu gango.

40 Wehapa wambeki makili gukukomana ngondu,

wahengiki abaja bangu ajinama pai ja magolu gangu.

41 Wahengiki abaja bangu atilaje,

na bababia atenda kunzuki natenda kwaakoma.

42 Bataputa mundu jwakwajangati lakini ngasejwabia mundu jwa kwaako,

bunndelila Bambu Sapanga lakini ngasejwaajibwike.

43 Naalimanga na kwaaponda ngati luombi lumundema,

naapondiki na kwaakanyati ngati makandu mwiindela.

44 Wehapa watenda kunhoko kukukomana na bandu bango,

gunhengiki kuba kilongosi wa bandu bi milema jingi.

Bandu banga kummnaya batenda kundumaki.

45 Ageni banhikila koni bilihulwi,

pabajowania pe majambu gangu batenda kunyetake.

46 Ageni basoka makili,

bahika kuhuma ku ngomi yabu koni atenda kubagaja.

47 Bambu Sapanga jubii mwomi!

Julumbalika lilibu wangu!

Julumbalika Sapanga wangu lilibu langu jojunhokwi nepani.

48 Jombi junhwesisi kulepesa kisasi

nu kwahenga bandu bi milema jengi abia pai juulongosi wangu.

49 Junhokwi kuhuma kwa abaja bangu.

Mwa Bambu Sapanga wanhenga naawesa abaja bangu

nukunhoko kuhuma kwa bandu abaja.

50 Henu nagulumbalia kwa bandu bi milema joti,

mwa Bambu Sapanga niijemba nhwambu ukulilumbali lihina laku.

51 Sapanga anhwesesa bambu nkolongu waki kuwesa ngondu kukolongu

anndangi upali waki joanhagwi,

ena anzangati Daudi ni kibeleku saki yaka petapeta."