1 Pamu na haga, Ahitafeli ampwagila Abusalomu, "Nekakia nhagula bandu elupu komi naabeli alapu nyenda kumpwata Daudi lelenu ikilu. 2 Nanndapula kipindi jusokiki na ngasejubii na makili na nepani nanzonzukia kiholu. Bandu boti baabii pamu najombi biitenda kuntila. Nanndapula bambu nkolongu kajika jaki, 3 na kwakelabu bandu bangi boti kwaku, ngati kamwali wandoa hejujenda kunyumba jaka nndomi waki. Kuwa kwa mundu jumu kwiileta lukwali kwa bandu boti, nga mundu hata jumu jojwiumia." 4 Mawasu gaka Aitofeli gunndengani Abusalomu na aseja boti buku Izilaeli. 5 Ndienu Abusalumu jwapwaga, "Munkema na Ushai mundu juku Aliki tujowana sejupala kupwaga." 6 Ushai pajwahika kwaka Abusalumu anndalukia, "Hela ndi hejupwagiki Aitofeli. Bo, tuenga ngati ejutupwagi? Ana ngahela nala tupwagila tuhenga kike."

7 Hushai ampwagila Abusalomu, "Mawasu gajupiiki Aitofeli nga gaambone." 8 Hushai jaendalia kupwaga, "Wehapa gumanya atati baku na bandu baki ndi abii na makili na ayomiki ngati kinyama sa dubu kimbomba sekibii ku lukoba jobunnyagiki bana baki. Kabe gumanya atati baku ayobali ngondu. Bombi nga biitami kelukelu pamu na bandu baki. 9 Hata sajenu tayali julihiiki ku mabomba gagabii kola au pandu pangi. Mundu jokapi jojwiijowa kukomeka kwa bandu mu ngondu jakwanza jwiipwaga kubanga kupitii kuhuma ku likundi la bandu babumpwata Abusalomu. 10 Bandu baku pabiijowa hela, hata bandu baku baabi na makili, baabi na mioju ngati giliimba, biibagaja kulujogopu. Ndaba Aizilaeli boti amanya kubanga atati baku abii na moju wanga kujogopa na boti baabii pamu na jombi abii nganganganga. 11 Se nhwesa kupwaga nepani ndi senze, waakusanya bandu boti buku Izilaeli kutumbuli ku Dani mbaka ku Beeli sheba upandi uku kusini abia bingi ngati nsangi guku mbwani na wamweti gujenda ku ngondu. 12 Natwepani twanzendila Daudi pandu pokapi pajwiiwesa kupatikana na twanhabukia ngati ulumi eguabuki pai. Henu nga mundu jojwiigalia hata ngati jwiibia mweni au bandu baki boti baabi pamu na jombi. 13 Ana jwiitilila musi gongi, nala bandu boha buku Izilaeli biileta migoji nukuuta musi hogu mbaka kumosu nga kiigali sindu sokapi hata lilibu lisokopi la musi hogu."

14 Abusalomu pamu na bandu boha buku Izilaeli bapwaga, "Malobi gajupwagiki Ushai ndi gasapi kupeta malobi gajupwagiki Aitofeli." Ndi bakana malobi gaka Aitofeli ndaba bambu Sapanga jwabia jupangiki kugapenga malobi gajupwagiki Aitofeli ili juwesa kunndeta Abusalomu ling'ai.

15 Ndienu Ushai jwaapwagila agolu baka Sapanga, Sadoki na Abiatali namuna Aitofeli na mweni hebumpwagila sukuhenga Abusolumu na Aseja buku Izilaeli. 16 Jwaapwagila bukumpwagila nyata Daudi ikilu jwiigone ku mitandu jukulombuke kulukoba ila julobuka kwa namuna jokapi julobuka ili bankamu nu kunkoma jombi pamu na bandu baki boha. 17 Kipindi sehesi Yonasani na Ahimaasi babia atenda kunndendale pambipi na kiliba sa Enilogeli ili jwaabona mundu jokapi pabiijingala ku musi. Kila kipindi ntumisi jumu mmbomba jujenda kwaapwagi malobi nabombi ajendika kumpwagi bambu nkolongu Daudi. 18 Lakini kipindi senze babonikana nu nkombu jumu jojuwe jwapiti kumpwagi Abusalomu. Ndienu Yonasani na Ahimaasi baboka nyatanyata bajenda ku Bahulimu kunyumba jaka mundu jumu jojwabii ni kiliba kuua jaki. Bajingala mukiliba sela nukuliia. 19 Mmbomba jwana nyumba jola jwajukua kipuniku nukukiyekale kiliba sela, ndienu jajanika ilebi panani jikipuniku sela. Lijambu lela ngase lamanyikine. 20 Atumisi baka Abusalomu pabaika kukummbomba jola, bunndalukia, "Ahimasi na Yonasani abikwako?" Mmbomba jola jwaapwagila.

"Apiti kwii ja losi."

Pabaataputa na kwaakosa babuja ku musi uku Yelusalemu. 21 Egapeta haga atumisi baka Abusalomu batenda kuboka, Yonasani na Aimaasi babita mukiliba nukujenda kwaka bambu nkolongu Daudi nukumpwagi lijambu heli. Bumpwagila "Boka gujenda kwii ja losi, ndaba Aitofeli ampwagila Abusalomu majambu gu kugulongale wehapa." 22 Ndi Daudi jwaboka na bandu boa bababia pamu najombi, balombuka losi Yoludani. Pakwakusa nga mundu jokapi jojwaigali kuunyuma bila kulomboka losi lwa Yoludani.

23 Ahitofeli pajwabona bandu ngaseahengiki ngati he jwapwaga, jwakwela liponda laki nukujenda kunyumba ku musi waki. Pajwaika kola jwapangiki sapi majambu gukunyumba jaki nukulikongela. Jwakuwa nukuntaga mu litenge la atati baki.

24 Ndienu Daudi jwajenda ku Mahanaimu. Abusalomu jwalombuka losi Yoludani na bandu boa buku Izilaeli. 25 Kipindi hesi Abusalomu jwabia ammbei Amasa kuba nkolongu jwa akomana ngondu badala jaka Yoabu. Amasa jwabia mwana waka Yeteli, ju ukoo wa Ishimaeli. Anyongo baki bunkemika Abigaili kamwali waka Nahashi jojwabia ndombu waka Seluya, anyongo baka Yoabu. 26 Abusalomu pamu na bandu buku Izilaeli babeka kambi jabu ku nndema uku Gileadi.

27 Daudi pajwaika ku Mahanaimu, Shobi mwana waka Naashi Nhamoni kuhuma kumusi uku Laba, Makili mwana waka Amilieli kuhuma ku musi uku Lodebali pamu na Balizilai mundu ju nkoa uku Geliadi kuuma ku musi uku Logelimu, 28 bapelika itanda na mabilika na yombu yu lutopi na nganu na shaili nu uwembi ni ilombi ikalangi na ngondi na ndambai, 29 busi na masiba gaga gandiki na makondo na mahuta ga masiba kuhuma mu mipugu jabu kumpeke Daudi pamu na bandu bajwabii nabu. Ndaba bapwaga, "Bandu haba abii ni inzala, asokiki na abii na nywita ndaba jukujenda kulukoba."