1 Ganga ndi malobi gamwisu gaka Daudi. Malobi gaka Daudi mwana waka Yese, malobi gaka mundu jojuwe Sapanga anhengiki jubia mundu nkolongu. Sapanga waka Yakobu anhagula Daudi kuba bambu nkolongu na malobi gaki haga Aizilaeli batoguli kugajemba.

2 "Lohoo jaka bambu Sapanga jilongii kupete nepani,

jwagabeka malobi gaki mu nndomu wangu. 3 Sapanga juku Izilaeli jupwagiki,

Lilibu luku Izilaeli jumbwagi,

‘Mundu jojwaalongo bandu ngati hejupala Sapanga,

jojulongo ku kunzogopa Sapanga,

4 jwombi ndi jubii ngati unang'anu gupulukela

liyoba helipita pulukela panga namaundi,

enaa ngati iyula jejimelesa manyoi pai.’

5 Hela ndi Sapanga hejulupengi lukolu lwangu.

Ndaba juhengiki lilaganu na nepani la yaka petapeta,

lilaganu le lijagani na lelibonikana.

Najombi jwiihenga mbata hindu yoti yeniipala.

6 Lakini banga kunndumbali Sapanga

boti abii ngati mia yebiileke pee,

ndaba ngaseiwesikana kuijuku kwa maboku,

7 kuikamu lasima kutumi kisomasoma au mpini gunkoa.

Bandu haba biikuwa tipitipi kwa mwotu."

8 Ganga ndi maina ga akomana ngondu bababia na Daudi, Yoshebu Bashebeti na bandu ba musi uku Takumoni jojwabia kilongosi jwa bandu atatu bala, jombi jwakomana kunkoa waki nu kukoma bandu mia nani kipindi simu.

9 Jwapili jwabia Eleazali mwana waka Dodo, ju ukoo waka Mwahohi. Lisoma limu Eleazali jwabia pamu na Daudi pababia baatondo Afilisiti bababia akusanyiki kukomana ngondu. Aizalaeli baatila Afilisiti. 10 Lakini Eleazali jwajemiki ngaganganga nukukomana na Afilisiti mbaka kuboku kwaki pawasindwa kupenda nukuigali gukamulaki upanga waki. Lisoba heli Bambu Sapanga jwaahenga baawesa ngamaa Afilisiti. Ebabiya baawesiki Aizilaeli bajenda pandu pajwabi Eliazali nu kujuku hindu kuhuma kwa Afilisiti baawii.

11 Jonzo ndi nkomana ngondu wa tatu ankema Shama mwana waka Agee, mundu juku Halali. Afilisiti bakusanyiki ku Lea, pandu papabii nu ngonda gowabii na ndambai yingi, nabombi Aizilaeli baatiliki Afilisiti. 12 Lakini Shama jwajemiki nganganganga pikilanda junngonda hogu ili kugukengale nngonda najombi jwaakoma Afilisiti. Bambu Sapanga jwatenda kuwesa ngamaa.

13 Ndienu akomana ngondu atatu kati ja akolongu selasini bahuluka kipindi sukuusa ilebi nukunhiki Daudi ku likolu ku Adulamu. Kipindi sehesi akomana ngondu ba Afilisiti babia atemi kuligomba luku Lefaimu. 14 Najombi Daudi kipindi sehesi jwabia mu nyumba ja akomana ngondu, na akomana ngondu ba Afilisiti bakabi ku musi uku Betelehemu. 15 Ndi Daudi jwalongila kwa hamu ngolongu, "Anape mundu jwakawesa kumbeke masi gakunywa kuhuma mu kiliba suku Betelehemu, sekibii pambipi ni litanga la musi!" 16 Akomana ngondu baki atatu bala bapita nukupeta pikilanda ja akomana ngondu ba Afilisiti nukujenda kuteka masi mu kiliba suku Beteleemu, pambipi ni litanga la musi nukunndete Daudi. Lakini Daudi jwakana kunywa badala jaki jwajitila pai kuba litambiku kwaka Bambu Sapanga, 17 koni jwaka pwaga, "Ngasembalika kunywa masi ngati ganga hata kasokopi, Mwaa Bambu Sapanga, boo, ganga le nga ngati mwai gwa bandu bababia tayali hata kuwa ili kugaleta masi gangane?" Ndienu ngase jwakunywiki masi gala. Haga ndi majambu gabahenga akomana ngondu atatu bala.

18 Abishai nndongu waka Yoabu mwana waka Seluya jwabia nkolongu wa akomana ngondu selasini. Jombi jwakomana kunkoa waki na bandu mia itatu, jwaakoma nukumanyikana ngamaa ngati ja akomana ngondu bangi atatu bala. 19 Boo, hoju ngasejwapatiki isima ngani kupeta atatu bala? Ndienu jwabia kilongosi wabu, lakini ngasejwamanyikini ngani ngati atatu bala. 20 Najombi Benaya mwana waka Yehoyada kuhuma ku Kabizeeli jwabia nkomana ngondu nkolongu jojwahenga majambu gingi gangondu. Jwaakoma akomana ngondu abeli bababia banamakili kupeta boti buku Moabu. Kabee jwauluka mulibomba lisoba lelabi na balafu nu kulikoma lihimba. 21 Kabee julikoma limundu luku Misili. Mmisili hoju jwabi nu nkoa, lakini Benaya anzendila koni jubi na ndonga pe, anyaga nkoa gola nukunkoma Mmisili jola kunkoa waki mwene. 22 Benaya mwana waka Yehoyada jwahengiki majambu ganga, nukumanyikana kati ja akomana ngondu atatu bala. 23 Ndi jwapatiki isima ngolongu kati ja akomana ngondu selasini bala, hatangati ngasejwabi ngati akomana ngondu atatu bala. Najombi Daudi anhagula Benaya hoju kuba kilongosi jwa alonda baki mweni. 24 Asaheli ndongu waka Yoabu, jwabia jumu kati ja akomana ngondu selasini. Akomana ngondu bangi baka Daudi babia, Elianani, mwana waka Dodo juku Beteleemu, 25 Shama mundu juku Halodi na Elika mundu juku Halodi, 26 Helesi mundu juku Paliti na Ila mwana waka Ikeshi mundu juku Tekoa, 27 Abiezeli mundu juku Anatoti na Mebunai mundu juku Hushati, 28 Salumoni mundu juku Hohi na Mahalai mundu juku Netofati, 29 Helebu mwana waka Baana, kuhumi ku Netofati, Itai mwana waka Libai kuhuma ku Gibea mu Benyamini, 30 Benaya, kuhumi ku Pilatoni na Hidai mundu juku ilosi yuku Gaashi, 31 Abialiboni mundu juku Alibati na, Azimaweti mundu juku Bahulimu, 32 Eliaba mundu juku Shaaliboni na bana baka Yasheni na Yonasani, 33 Shama mundu juku Halali, Ahimu mwana waka Shalali mundu juku Halali, 34 Elifeleti mwana waka Ahasibai mundu juku Maaka na Eliamu mwana waka Ahitofeli mundu juku Giloni, 35 Hesilawi mundu juku Kalimeli na Paalai mundu juku Mwalibi, 36 Igali mwana waka Natani mundu juku Soba na Bani mundu juku Gadi, 37 Seleki mundu juku Amoni na Nahalai mundu juku Beeloti jojabii jojutoto hindu yukukomane yaka Yoabu mwana waka Seluya, 38 na Galebu mundu juku Hiti, 39 na Ulia mundu Hiti. Boti babia akomana ngondu selasini na saba.