1 Muutumbuli wa saka akabambu akolongu pababoka kujenda ku kukomana ngondu, Daudi antuma Yoabu pamu na bandu baka bambu nkolongu na akomana ngondu boti buku Izilaeli. Baakoma Aamoni nukwaayongolota akomana ngondu ba musi uku Laba. Lakini Daudi jwaigali ku Yelusalemu.

2 Lisoba limu pakamii, Daudi jwajumuka pikitanda nukujenda pikipagaa sa nyumba jaki ju ubambu nkolongu. Pajwabia jujenda kunani kola, ammbona mmbomba jumu juoga masi, mmbomba hoju jwabia junyambiki ngamaa. 3 Ndienu, Daudi jwaatuma mundu kulaluki mbomba hoju ndi nyane. Mundu jola ampwagila Daudi, "Mmbomba we hoju bunkema Batisheba mwana waka Elia kabee nhwanu waka Ulia Nhiti." 4 Ndienu Daudi jwaatuma bandu bukunzukua. Ndienu Batisheba jwahika kwaka Daudi, najombi Daudi jwagonila nu mmbomba, mmbomba hoju jwabia juhumiki pe kujomo masoba gaki gukutumii, ndienu jwabuja kunyumba jaki. 5 Mmbomba jola jwapata kitumbu najombi atuma mundu kwaka Daudi kumpwagi jubii ni kitumbu saki.

6 Ndienu, Daudi antuma mundu kwaka Yoabu kumpwagi, "Ntuma Ulia nhiti kwangu nepane." Najombi Yoabu antuma Ulia kwaka Daudi. 7 Ulia pajwahika kwaki Daudi, Daudi anndalukia Yoabu kupete ngondu namuna hejiendale. 8 Ndi Daudi ampwagila Ulia, "Gubuja kunyumba jaku wakasamba magolu gaku." Ulia jwapita kunyumba jaka bambu nkolongu ni kipindi sehesi bambu nkolongu ampelakia nhupi. 9 Lakini Hulia ngasejwakelabwiki kunyumba jake ila jwagonila pamu na atumisi baka bambu nkolongu waki pilitanga la nyumba jaka bambu nkolongu. 10 Daudi pabumpwagila kubanga Ulia ngasejwapiti kunyumba jaki, Daudi ampwagila Ulia, "Wehapa guhumiki mu sapwali ndaba jaki ngasewapiti kunyumba jako?"

11 Ulia anzibua Daudi, "Lisanduku li Lilaganu pamu na akomana ngondu boha buku Izilaeli nuku Yuda atama mu indamba ku ngondu. Kilongosi wangu Yoabu pamu na atumisi baki boha atemi kambi kulukoba, boo, sapi lee nepani nyenda kunyumba nakakula na kunywa nukugone nu nhwanu wango? Ngati hegutama na loho jaku hejitama nganhengi sindu ngati hese."

12 Ndienu, Daudi ampwagila Ulia, "Nala gutama pamba lelenu kabee ni kilabu naguleka gubuja." Ndi Ulia jwahigali mu Musi uku Yelusalemu lisoba heli. Lisoba lelapwata, 13 Daudi ankoka Ulia kula na kunywa kunyumba jaki ila jwagoluka pikiteu pamu na atumisi baka bambu nkolongu waki.

14 Pulukela Daudi anhandakiya Yoabu balua nukumpeke ulia juipelika kwaka Yoabu. 15 Mubalua heji Daudi jwaandiki ana, "Ummbeka Ulia pu nsitali wa palongi pandu papabi na ngondu ngolongu namangani ndi wanndeka kola ili bunndapula jukua." 16 Ndi Yoabu pajwabia juguyongolota musi ammbeka Ulia pandu papuje jwaamanyiki akomana ngondu ba abaja babii bana makili ngamaa. 17 Bandu ba musi hogu baboka mu musi wabu nu kukomana na Yoabu. Atumisi bangi baka Daudi batenda kuwa. Ulia Nhiti najombi jatenda kuwa.

18 Ndi Yoabu anndandila Daudi goa haga pamu nagagahengika ku ngondu. 19 Yoabu anndagalakia ntumisi joantumiki jola ana, "Baada jukunndandi bambu nkolongu majambu goa guku ngondu, 20 ana juyomiki nukugulaluki, ‘Ndaba jaki mwajenda pambipi na musi pamwabia atenda kukomana? Ngasemwamanyiki bakabia anndapwi mikoa kuhuma mu lumatu lwa musi wabo? 21 Nya joankoma Abimeleki mwana waka Yelubesheti? Boo, ngase jwabii mmbomba jumu kumusi uku Tebesi jojuwe jwalekala lilibu lukupole kuhuma mu lumatu nalombi lunkoma Abimeleke? Ndaba jaki henu mwajenda pambipi nu lumato?’ Nala wehapa wampwagila ana, ‘Ata ntumisi waku nhiti Ulia najombi jutei kuwa.’ " 22 Mundu jola jwajenda kwaka Daudi nu kumpwagi goa gaantuma Yoabu jupwaga. 23 Mundu jola ampwagila Daudi, "Abaja bitu babia na makili kupeta twepani, bapita kunza ja misi nu kutulapu kulungwenza. Hata hela twepani twaabenga mbaka ku litanga la musi. 24 Ndi butulapula ni mikowa twepani twaatumisi baku kuhuma mu lumatu. Atumisi baku bangi batenda kuwa. Ata ntumisi waku Ulia Nhiti najombi juwii."

25 Daudi ampwagila mundu jola, "Wampwagila Yoabu ana, ‘Lijambu lende lagusumbu ndaba kuwa ngasekuhagula, ngondu jiwesa kunkoma jokapi. Ila gubeka malapuli ku musi mbaka gukoma bandu ba musi hogu.’ Ukumpwagila hela Yoabu ili kungamalisa mwoju Yoabu." 26 Betisheba nhwanu waka Ulia pajwajowana Ulia nndomi waki jutei kuwa jwatenda kunndelila nndomi waki. 27 Kipindi sukunndele nndomi waki pawajomuka Daudi jwalagalakia Betisheba bukunzukua nukumpeleka kunyumba jaki. Betisheba jwabia henu nhwanu waka Daudi najombi ambelakia mwana mwanalomi. Lakini lijambu leheli lejwahenga Daudi lunhenga Bambu Sapanga jusukila.