1 Ishibosheti mwana waka Sauli pajwajowana Abuneli atei kunkoma ku Hebuloni, jwasoka makili mmoju na bandu boti buku Izilaeli babiya nu lujogopu. 2 Ishibosheti mwana waka Sauli, jwabia na bandu abeli bababia aka kilongosi bi ikundi yukutukali kungondu, jumu bunkema Baana na jongi Lekabu. Haba babia bana baka Limoni, mundu julikabila la Benyamini kuhuma ku musi uku Beeloti, ndaba musi uku Beeloti wabia wa bandu bi likabila la Benyamini. 3 Bandu buku Beeloti batilila ku Gitaimu na batama hoku ngati ageni mbaka lelenu.

4 Yonasani mwana waka Sauli jwabia na mwana jojwabi julemi magolu gaki goti gabeli. Mwana we hoju bunkema Mefibosheti. Mefibosheti jwabia na yaka nhwanu pakwajowanika kuwa kwaka Sauli na Yonasani kuhuma ku Yezileeli. Mundu jojwabia antunza pajwajowana Sauli na Yonasani baakomiki ku Yezileeli, anzukua Mefibosheti nukutila naku. Lakini pajwabia jutila nyatanyata mwana jola jwatei kuabuka, nukupata kilema.

5 Lekabu na Baana bana baka Limoni mundu juku Beeloti, bajenda kunyumba kwaka Ishibosheti. Bahika kola kipindi sa lyoba mutu kipindi Ishibosheti pajwabia jupomule kunyumba jaki. 6 Bajingala mu sumba sunkati bilihenga ngati apala kujuku inganu, bunhosa nkoa Ishibosheti mulitumbu. Ndi Lekabu na Baana nndongu waki batendakutila. 7 Bajingala munyumba kipindi jutei kugone pikitanda mu sumba saki. Baada jukunhosa nkoa pikitanda saki nukunkoma bunsekula kimutu saki. Koni akijukwi bajenda ikilu joka kwiindela ja Alaba. 8 Bunndetila Daudi kimutu saka Ishibosheti ku Hebuloni kola, Bumpwagila bambu, "Senze kimutu saka Ishibosheti mwana waka Sauli, mbaja waku jojwalengiki kugukoma. Lelenu Bambu Sapanga jugulepi kisasi wabambu nkolongu wangu kwaka Sauli ni ibeleku yaki." 9 Daudi anzibwa Lekabu na Baana nndongu waki, bana baka Limoni, mundu juku Beeloti, jwapwaga, "Sakaka ngati bambu Sapanga hejubii jojunhokwi kuhuma mu tabu yoti, 10 mundu jola jojahika kumbwagi kubannga, ‘Sauli jutei kuwa.’ Jwawasalia junete lijambu laamboni, nunkamula nukunkoma ku Sikilagi. Hogu ndi nhupi gonumpekia kwandaba ja malobi gaki. 11 Boo mundu mmbaja paankoma mundu jwaamboni koni jugoni pikitanda saki panyumba jaki, boo, kuwesikana nepani kunndeka bila kummpeke azabu jukunkoma nukummboa punndema?" 12 Ndi Daudi jwaalagalakia bandu baki, nabombi batenda kwaakoma. Baasekula maboku gabu na magolu gabu. Ndi baatonga mu nkongu pulutengu junhanga nkolongu ku Hebuloni. Lakini bikijukua kimutu saka Ishibosheti nu kukitaga muli tenge laka Abuneli ku Hebuloni.