1 Daudi jwaakusanya bandu bajwabia pamu nabu na kwaabagana mu makundi ga bandu maelupu pai na makundi ga bandu mamia na bombi babia pai ja aka kilongosi ba akomana ngondu babu. 2 Daudi jwaatuma akomana ngondu baki kungondu mu makundi gatatu, likundi limu lilongoswa na Yoabu ni likundi lapili lilongoswa na Abishai mwana waka Seluya, nndongu waka Yoabu ni likundi la tatu jalongua Itai mundu juku Giti. Ndienu bambu nkolongu Daudi jwaapwagila boa, "Namweti niijenda pamu na mwanganya."

3 Lakini bandu bumpwagila, "Ngaguboke. Ndaba ana twiitenda kutila nga batuwasalile. Kabee ana nusu jitu biitenda kuwa ngabatuangajakile. Lakini wehapa gupalika ngani kupeta bandu elupu komi kati jitu. Henu mbanga wehapa guigalia ku musi nukutujangati twepani koni gubii kumusi."

4 Bambu nkolongu jwaapwagila, "Niihenga lokapi lemmbona laamboni." Ndienu bambu nkolongu jwajema pambipi ni litanga koni akomana ngondu baki, mamia na maelupu atenda kupeta. 5 Bambu nkolongu anndagalakia Yoabu na Abishai na Itai, "Munhengila nkombu jola majambu gaamboni kwa ndaba jangu nepani." Bandu boha bunzowana bambu nkolongu pajwaalagalakia akomana ngondu baki.

6 Ndienu akomana ngondu baka Daudi bajenda kulukoba kukomana na bandu buku Izilaeli. Ngondu heji jahengika mu kiholi suku Efulaimu. 7 Atumisi baka Daudi baawesa bandu buku Izilaeli. Lisoba heli bandu ngati elupu ishilini batenda kuwa. 8 Kukomana hoku kwaeni mu nndema woti na bandu bingi bakuwa kukiholi kupeta babawi ku upanga mu ngondu.

9 Ndienu Abusalomu koni jukwei kinyama sebikikema nyumbu, jwaketangana na atumisi baka Daudi. Nyumbu jela pajabia jitenda kupeta pai jilimbandi likolongu lunhaloni, pala ndi kimutu saka Abusalomu sapatila mu nkongu mwaloni. Abusalomu bunndeka koni jujenzee panani. Lakini nyumbu jaki jabia jiendale kulongi. 10 Mundu jongi jojwabona lijambu lela ampwagila Yoabu, "Numbweni Abusalomu jujenze mu nkongu gu mwaloni." 11 Yoabu ampwagila mundu jola, "Kii? Umbweni Abusalomu? Ndaba jaki ngasegukomike apalapala? Nakatoguli nu kugulepa ipandi selasini ya madini ga feza nu nkanda uku nkomana ngondu jwana makili."

12 Lakini mundu jola ampwagila Yoabu, "Hata nakajopiki ipandi elupu jimu ya madini ga feza mu kuboku jangu, nga nakatondabii kuboku kwangu kwaka mwana waka bambu nkolongu. Ndaba tunzowini bambu nkolongu pajutulagalakia wehapa wa Abishai na Atai twepani koni tujoa, munndonda Abusalomu kwa ndaba jangu. 13 Na nepani ana nakabia ngasenunzowani bambu nkolongu nu kunkoma Abusalomu, bambu nkolongu jwakabia jujowani, jwombi jujowane kila sindu na ngawakawesiki kung'engalela."

14 Yoabu ampwagila, "Nepani ngasemii ni kipindi sukuhoa pamba pamu na wehapa." Ndienu Yoabu jwajukua mikoa misoku mitatu mukuboku kwaki. Nukujenda kunhosa Abusalomu pamoju jaki, Abusalomu koni jubi jwakona mwomi pilimbandi la mwaloni.

15 Ndienu aka kombu komi bababia buntotuli nhindu yukukomane Yoabu, bahika kuyongolota Abusalomu, bunndapula nu kunkoma. 16 Ndipala Yoabu jwapega imbata na akomana ngondu boa bakotuka kwaapwata bandu buku Izilaeli, ndaba Yoabu jwatenda kwaakanaki. 17 Bunzukua Abusalomu nukunndeke mu libomba likolongu nu kulundika lilundu likolongu la malibu. Bandu boti buku Izilaeli batenda kutila kila jumu kunyumba jaki.

18 Abusalomu pajwabia mwomi jwabia jujukwi mipendi nukuijemeka mu ligomba laka bambu nkolongu ndaba jwapwaga, "Nepani ngase mii na mwana mwanalomi jojwiiendalisa ngombuke yi liina lango." Mipendi jela jujipekia liina laki, na biikema, Mipendi yaka Abusalomu mbaka lelenu.

19 Ndienu Ahimaasi mwana waka Sadoki jwapwaga, "Nekakia nukumpwagila bambu nkolongu kubanga Bambu Sapanga ankombwi kuhuma mu makili ga abaja baki."

20 Yoabu ampwagila, "Lelenu ngagujendi kupwaga majambu haga. Wiijenda kupwaga lisoba lenge. Lakini lelenu ngagujendi kulonge sokapi ndaba mwana waka bambu nkolongu jutei kuwa." 21 Ndi Yoabu ampwagila mundu jumu juku Kushi, "Jenda ukumpwagila bambu nkolongu gaugabweni." Nkushi jola jwajinama ku isima palongi jaka Yoabu nu kujenda imbelu.

22 Ndienu Ahimaasi mwana waka Sadoki ampwagila kabee Yoabu, "Nga gupitii ubaja, nekakia nepani nunzombatakia nkushi jola." Yoabu ampwagila, "Mbona gupala kutila mwana wango? Wehapa nga gupati nhupi jokape kupete lijambu lendeno."

23 Ahimaasi jwapwaga, "Hata kipiti sokapi niitenda kutila." Ndienu Ahimaasi jwatila nu kujenda indela juku lungwenza mbaka ampea Nkushi jola.

24 Daudi jwabia jutemi pikilanda ji matanga mabeli pa musi. Najwombi nndonda jwilitanga jwakwela pulumatu mbaka panani ji litanga na pajwajumuka ammbona mundu jwakatila kajika jaki. 25 Ndonda jola jwapia sauti nukumpwagi bambu nkolongu, "Ana jubii kajika jaki kupalika jumanyiki." Mundu jola jwaendalia kuhegale.

26 Ndonda jola ammbona mundu jongi jutenda kutila, jwakema kabe pilitanga, "Linga mundu jongi jutenda kutila kajika jaki." Bambu nkolongu jwapwaga, "Najombi juhika kutupwagi majambu ga sapi gagapiiti."

27 Nndonda jola jwapwaga, "Ne mona jojutila ngani jola ndi Ahimaasi mwana waka Sadoki." Bambu nkolongu jwapwaga, "Hoju mundu jwaamboni jutulete majambu gaamboni."

28 Ndi Ahimaasi ampwagila bambu nkolongu kwa sauti ngolongu, "Majambu goti gabii sapi." Jwajinama nukupega magoti palongi jaka bambu nkolongu nukupwaga, "Julumbalika Bambu Sapanga, Sapanga waku jojugukombwi kuhuma kwa bandu babapala kugukoma nu kuguhenge majambu mabaja, waa bambu nkolongu wangu."

29 Bambu nkolongu ampwagila, "Boo, nkombu Abusalomu jujumwike?" Ahimaasi jwajibwa, "Yoabu pajwanduma nepani ntumisi waku, nabona kwabia na keleli ingipi lakini ngase namanyiki sauti yela ilangi kiki." 30 Bambu nkolongu jwapwaga, "Tama pulutengu na wiijema hapa." Ndienu Ahimaasi jajenda pulutengu nukujema nuu.

31 Ndipala Nkushi jola jwatenda kuhika, najombi jwapwaga, "Nuguletiki lijambu laamboni wa bambu nkolongu wangu. Ndaba bambu Sapanga lelenu jugukombwi kuhuma kwa bandu boti bababia apala kuguhenge majambu giliya." 32 Bambu nkolongu, anndalukia, "Boo, nkombu Abusalomu jujumwike?" Nkushi jola jwajibua, "Abaja baku bambu nkolongu pamu na bandu boti baapala gugupata majambu mabaja, abia ngati nkombu Abusalomu." 33 Ndienu bambu nkolongu jwabia na uzuni ngolongu, jwakwela ku sumba sesabii panani ja sumba sesabii panani ju nndyangu nu kulela. Pajwabia jutenda kukwela jwabia julela koni jupwaga, "Wamwana wangu Abusalomu, Ana nakabia nhwii badala jaku! Wakabia upatiki majambu gilia, Abusalomu! Abusalomu mwana wango!"