1 Ndi Bambu Sapanga antuma nndota waka Sapanga Natani kwaka Daudi. Natani anzendila Daudi nukumpwagi, "Kwabia na akanalomi abeli musi gumu, jumu jwabia na mali gingi najongi jwabia kapuku. 2 Jojubii na mali gingi jola jwabia na makondoo gingi na ng'ombi ingipi. 3 Lakini kapuku jola jwabia na kakondoo kasoku kamu kambomba, kajwabia jutei kukalomba. Jukatunziki nakombi katenda kukola mu nyumba jaki pamu na bana baki. Julilea libana lilikondoo lela posu ngati hejukula mweni nu kunywele masi mukikombi saki nukuntoto mu kigamba saki. Libana lilikondoo lela labia ngati kamwali kwaka mundu kapuku jola. 4 Lisoba limu mundu jojubii na hindu hingi jola, jwabii nungeni kunyumba jaki. Ndi mundu jwana mali gingi jola ngasejwapai kujuku likondoo laki limu au ng'ombi jaki ili kunsinzi nngeni waki ila jwajenda kunnyaga mundu kapuku jola likondoo laki nukunsinzi nngeni waki."

5 Daudi pajwajowana jwapata inyela nu kumpwagi nndota waka Sapanga Natani, "Napa kwaka Bambu Sapanga jojubii mwomi kubanga mundu jojutei lijambu heli kupalika jukuwaje."

6 "Kupalika anndepa kapuku jola likondoo heli mala pasesi ndaba juhengiki lijambu lilia na ngasejwabii ni ikia!"

7 Natani ampwagila Daudi, "Wehapa ndi mundu hojo! Henu Bambu Sapanga, Sapanga juku Izilaeli jupwaga ana, ‘Nepani nugujakani mahuta ili gubia wa bambu nkolongu juku Izilaeli nu kuguoko mu maboku gaka Sauli. 8 Nugupeki nyumba jaka bambu waku na aka ahanu baki abia baku kabe nugupeki bandu buku Izilaeli na bandu baka Yuda ili gwaalongusa. Ana goti haga ganuguhengi gakabia masoku kwaku nakabia nugujonzuki mala pabeli kabee kupeta haga. 9 Ndaba jaki henu gulilongimi lilobi langu nepani bambu Sapanga nukuhenga ubaja ago palongi jango? Unkomiki Ulia Nhiti ku upanga nu kunzuku nhanamundu na kuba nhwanu waku. Waatumia Ahamoni kunkoma Ulia ku ngondu! 10 Henu, ndaba gutei kunongama na gunzukwi nhwanu waka Ulia Nhiti kuba nhwanu waku, kuwa kwa bandu ngakwiiboki mu kibeleku saku.’ 11 Jowana, Bambu Sapanga jupwaga, ‘Linga niileta mang'aliku mu kibeleku saku wamweti. Niijukua aka ahanu baku koni gulinga kwa miu gaku nu kumpeke wapambipi waku najombi jwiigonila naku pangwendu. 12 Wehapa wahenga lijambu heli kwa sili lakini nepani niihenga lijambu heli palongi ja Aizilaeli boha pangwendu.’"

13 Ndi Daudi ampwagila Natani, "Nunhengi mahakau Bambu Sapanga."

Natani ampwagila, "Bambu Sapanga jugulekaki mahakau gaku na wehapa ngagukuwe. 14 Hata hela seguhengiki hesi, gunndongimi Bambu Sapanga, mwana waku jowipapa jwiitenda kuwa." 15 Ndienu, Natani jwatenda kubuja kunyumba jaki.

16 Daudi andoba Sapanga mwana juwesa kulama. Jwajenda kusumba saki na kelukelu jwagoni pai. 17 Aseja bababia anndingali mu nyumba jela bumpwata nu kunndoba jujumuka lakini jwombi jwatenda kukana na ngasejwali posu jokapi pamu na bombi. 18 Palapeta lijuma limu mwana jola jwatenda kuwa. Atumisi baka Daudi bajogupa kumpwagi kubanga mwana juwii, ndaba bawasalia, "Mwana jola pajwabia mwomi twalongila najombi lakini ngasejutujowanile. Henu twampwagila boo ana mwana we jola juwii? Pangi juwesa kulikoma." 19 Daudi pajwabona atumisi baki atenda kubolane jwamanya kubanga mwana juwii. Ndi jwaalalukia, "Boo, mwana juwiile?" Nabombi bunzibua, "Hena juwile."

20 Ndipala, Daudi jwajumuka kuhuma pai, nu kuoga masi nu kulipaki mauta nu kuwata ingobu yaki yengi. Nukujenda mu nyumba jaka Bambu Sapanga nu kulumbali. Ndi jwabuja kunyumba na pajwapala posu, bupekia najwombi jwatenda kula. 21 Ndipala atumisi baki bunndaluki, Henu gutei kike? Mwana pajwabi mwomi wehapa wakotuka kula nukunndele. Lakini pajuwii gujumwiki na kula posu.

22 Daudi jwaajibwa, "Sakaka mwana pajwabi mwomi nakotuka kula nukulela. Nahenga hela ndaba nawasalia, ‘Nya jojumanya? Pangi Bambu Sapanga jwakawesa kunekake mahakau ili mwana juendalia kuba mwomi.’ 23 Lakini henu juwii ndaba jakii ngotuka kula? Boo, nepani nhwesa kunkelabu punndema kabete? Lisoba limu niijenda kojupiti hoku, lakini jombi ngajuwesi kuhika komi kone."

24 Ndienu, Daudi ampolisa moju Betisheba nhwanu waki. Jwagonila naku najombi jwapata kitumbu nukupapa mwana mwanalomi, jojuwe Daudi ankema Solomoni. Bambu Sapanga ampai ngamaa mwana we jola, 25 najombi antuma Natani nndota waka Sapanga kwaka Daudi jujenda kumpwagi ankema mwana jola, Yedidia mana jaki jubii ndaba jaka Bambu Sapanga.

26 Kipindi sehesi Yoabu jugulapula musi uku Laba wa aka Aamoni najombi jugukamula musi ukibambu hogu. 27 Yoabu jwatuma bandu kwaka Daudi kupwaga, "Nugulapwii musi uku Laba na nilikamwi litanda labu la masi. 28 Henu waakusanya bandu boti baahigali ubeka likambi kuyongalota nu kugukamu. Ana nugukamwi nenga nagukema liina langu." 29 Ndi Daudi jwaakusanya bandu boti nukujenda ku Laba, juulapula musi gola nu kugukamu. 30 Ndienu jwajukua litaji laka bambu nkolongu wabu kuuma pikimutu saki. Kutopa kulitaji la zaabu heli kwabia kilu selasini nunhwanu nu nkati jaki kwabia nililibu labei ngolongu. Najombi Daudi bunhwatika litaji lela pikimutu saki. Kabe jwanyaga hindu hingi ngama mu musi hogu. 31 Ndienu jwaajukua bandu ba musi hogu nakwaabeka ahenga lihengu kukutumi misumenu na sululu yikisomasoma na mapengu gikisomasoma na kwaatumi ahenga lihengu mulitanuli la matipwali, hela ndi hejujihenga misi joka ja Ahamoli. Egapeta haga Daudi na bandu boti babuja ku Yelusalemu.