1 Egapeta majambu haga, Daudi jwaalapula na kwaawesa Afilisiti. Juukamula musi uku Metegi Ama kuhuma ku ulongosi wa Afilisiti. 2 Kabee jwaawesa Amoabu. Jwaapanga mu misitali bandu bajwaakamwi na kwagoneka pai. Jwaalagalakiya bandu bababia mu misitali mibeli baakoma na bababia mu nsitali watatu baaleka bomi. Ndienu Amoabu babia atumisi baka Daudi na babia bunndepa kodi. 3 Daudi kabee anhwesa bambu nkolongu juku Soba, Hadadezeli mwana waka Lehobu, Hadadezeli pajwabia jujenda kugukelabu lieneu la losi luku Eufulati ili libia mu ulongosi waki. 4 Daudi jwanyaga magali gaki na angondu elupu jimu na akomana ngondu baakwelale falasi elupu jimu na mia saba na akomana ngondu baajenda kwa magolu elupu ishilini. Daudi jwaasekula falasi yoti yeihuta magali misipa ja mu magolu ila pe falasi mia jimu ngasejuisekwile. 5 Nabombi Aalamu buku Damasiki pabajenda kunnzangati Hadadezeli, bambu nkolongu juku Soba Daudi jwaalapula na kwaakoma bandu elupu ishilini ni ibeli. 6 Ndienu Daudi jwabeka akomana ngondu mu ubambu ukolongu wa Aalamu ku Damesiki nabombi Aalamu babia atumisi baki nukunndepa kodi. Bambu Sapanga annzangatiya Daudi kuwesa ngondu pokapi pajwajeenda. 7 Daudi jwajukwaa ngau ya zaabu yebatotula akomana ngondu ba Hadadezeli nukupeleka ku Yelusalemu. 8 Kuhuma misi ja Beta na Belotai jejuje jalongusa Hadadezeli, bambu nkolongu Daudi jatola madini gingi ga shaba.

9 Toi bambu nkolongu juku Hamati pajwajowana kubanga Daudi jwaawesiki akomana ngondu boti baka Hadadezeli, 10 jwaamua kuntuma Yolamu mwana waki kwaka bambu nkolongu Daudi kunndamuki nukunndumbali ndaba ju kuwesa kwaki mu ngondu pamu na Hadadezeli ndaba Hadadezeli jwabia jukomini ngondu na Toi. Yolamu anndetila Daudi yombu yealenganaki na madini ga feza na madini ga zaabu na madini ga shaba. 11 Bambu nkolongu Daudi juibeka yombu hei mu nyumba jaka Sapanga pamu na madini ga feza na madini ga zaabu gababia bagajopiki bandu bi milema jengi bababia baawesiki, 12 kutumbuli ku Edomu nuku Moabu nuku Amoni na kwa Afilisiti na kwa Amaleki. Kabee japia kwaka Bambu Sapanga hindu ye jwanyaga kuhuma ku Hadadezeli mwana waka Lehobu bambu nkolongu Soba.

13 Najombi Daudi jwamanyikana ngani ejabuja baada jukunhwesa bambu nkolongu Hadadezeli, jwaakoma Aedomu elupu komi na nani mu ligomba la mwinyu. 14 Jwaabeka kambi ya akomana ngondu bukulonda mu Edomu joka, nabombi Aedomu babia atumisi baka Daudi. Bambu Sapanga annzangati Daudi kuwesa kokapi kojajendaje. 15 Daudi jaalongua Aizilaeli boka koni juhenga majambu gaamboni kwa bandu boha jwaahengila ngati ekupalika. 16 Yoabu mwana waka Seluya jwabia nkolongu jwa akomana ngondu na Yehoshafati mwana waka Ahiludi jwabia jojubeka ngombuke. 17 Sadoki mwana waka Ahitubu na Ahimeleki mwana waka Abiatali babia aka agolu baka Sapanga na Seluya jwabia nhandishi. 18 Benaya mwana waka Yehoyada jwabia kilongosi jwa Akileti na Apeleti nabombi bana baka Daudi babia agolu baka Sapanga.