1 Ndienu makabila goti guku Izilaeli gunzendila Daudi ku Hebuloni, nukumpwagi, "Linga twepani twaalongu bako. 2 Kipindi Sauli pajwabia bambu nkolongu witu wehapa ndi wewaalongua Aizilaeli ku ngondu, na Bambu Sapanga jugupwagila, ‘Wiibia nndimi wa bandu bango buku Izilaeli na wiibia wikilongosi juku Izilaeli.’" 3 Ndienu akakilongosi boka buku Izilaeli bunzendila bambu nkolongu Daudi ku Hebuloni, najombi jajetangana nabu palongi jaka Bambu Sapanga ndienu anzakania Daudi mahuta ili jubia bambu nkolongu juku Izilaeli. 4 Daudi jwabia na yaka selasini pajwatumbulia kulongosa na jwalongusa kwa yaka alubaini. 5 Ku Hebuloni jwalongusa bandu buku Yuda kwa yaka saba na miei sita nuku Yelusalemu jwaalongusa bandu buku Izilaeli pamu na Yuda kwa yaka selasini na tatu.

6 Mwenikatai bambu nkolongu na akomana ngondu baki bajenda ku Yelusalemu kwaalapu Ayebusi bababia benei bunndema hogu. Lakini bombi bumpwagila, "Ngagujingi mu musi mombo, ndaba bandu banga kulinga na baalemi bagubengila kutali." Bumpwagila hela ndaba bawasalia Daudi ngajwakawesi kujingi mu musi homu. 7 Hata hela bambu nkolongu Daudi jujinyaga nyumba ja akomana ngondu juku Sioni yaani musi waka Daudi.

8 Lisoba heli Daudi japwaga, "Mundu jokapi jojwaalapula Ayebusi na jupitila mu nkolule wa masi ili kwaalapu babii ni kilema na bandu banga kulinga babube loho jangu jitenda kwaasuki." Ndaba bandu apwaga, "Bandu banga kulinga niilema ngabiijingi munyumba jiki bambu nkolongu."

9 Daudi jwatama ku nyumba ja akomana ngondu jela, na musi wegola jugukema, "Musi waka Daudi." Daudi jugusenga musi sukuguyongolota kutumbuli ku Milo kujenda nkati. 10 Daudi jwabia na makili kipindi soti ndaba Bambu Sapanga Jojubii na Makili jwabii pamu najombi.

11 Ndi Hilamu bambu nkolongu juku Tilo jwaatuma bandu kwaka Daudi, kabee ampelakia mikongu ji mielezi na akapundi bukulanda na akapundi bukusenga babunsengila Daudi nyumba jikibambu nkolongu. 12 Ndi Daudi jwamanya kubanga Bambu Sapanga anhengiki kuba nganganganga ili jubia bambu nkolongu juku Izilaeli na jugukoiki ubambu ukolongu waki kwa ndaba ja bandu buku Izilaeli.

13 Daudi julijukuli mabangu na akambomba bingi kupeta bababia kumusi uku Yelusalemu baada jukuhuma ku Hebuloni. Haba bummbelakia bana bingi akanalomi na aka mbomba. 14 Ganga ndi maina ga bana akanalomi kuhuma kwaka ahanu baki babumbelaki ku Yelusalemu, Shamua na Shobabu na Nasani na Solomoni, 15 Ibali na Elishua na Nefeli na Yafia, 16 Elishama na Eliada na Elifeleti.

17 Afilisiti pabajowana kubanga Daudi bunzakani mahuta kuba bambu nkolongu juku Izilaeli, boti baboka kujenda kuntaputa lakini jwombi jwapata majambu jwajingala nkati ja nyumba ja akomana ngondu. 18 Afilisiti bahika nu kulipesangana ku Ligomba luku Lefaimu. 19 Ndi Daudi anndalukia Bambu Sapanga, "Boo, nyenda lee nakaalapulaje?" Najombi Bambu Sapanga ampwagila Daudi.

"Jendaje, ndaba sakaka naguhenga wawesa Afilisiti!"

20 Ndienu Daudi jwahika ku Baali Pelasimu nakola jwaawesa Afilisiti. Ndi jwapwaaga, "Bambu Sapanga jupetiki pikilanda ja abaja bangu ngati kikoka sa masi gagajenda nyatanyata." Ndi pandu pala bapakama Baali Pelasimu. 21 Afilisiti biileka imong'umong'u yabu yiisapanga pandu pala na Daudi na bandu baki batenda kuijukua.

22 Mala ja pili Afilisiti bahika kabe nukulipesangana ku ligomba luku Lefaimu. 23 Daudi paanndoba Bambu Sapanga, Bambu Sapanga ampwagila, "Waalapu kuhuma pagubii hapa ila guyonguluta na kwaalapu kutumbuli pambipi ni mikongu ji mifolosadi." 24 Na pamwiijowana kujenda kwa bandu kuhuma ku mikongu ji mifolosadi jenda nyata ndaba kwiibia kulangi Bambu julonguli palongi jaku 25 Daudi jwahenga ngati Bambu Sapanga heandagalaki najombi jwaalapula Afilisiti kuhuma ku Geba mbaka ku Gezeli.