1 Kabee Daudi jwaakema bandu elupu selasini buku Izilaeli baaguliwi. 2 Daudi jwaboka nukujenda pamu na bandu baki boti bajwabii nabu kuhuma ku Baala Yuda, kujenda kulijuku lisanduku laka Sapanga lebilikema ku liina laki Bambu Sapanga jwana makili, jojutama pikiteu saki su ubambu panani ji iumbi yeibii na makapatii. 3 Ndi bilijukua Lisanduku laka Sapanga kuhuma mu nyumba jaka Abinadabu jejabii kukitombi, nukulitoto mu ligali linyai. Uza na Ahio bana baka Abinadabu babia biliendesa ligali linyai heli, 4 koni libii ni Lisanduku laka Sapanga heli najombi Ahio koni julongule palongi ji Lisanduku heli. 5 Daudi na bandu boti buku Izilaeli babia aina palongi jaka Bambu Sapanga kwa makili gabu goti kwa nyembu niimbata na zeze na matalizi ni ilimba na matoazi. 6 Pabaika pu lubanza lukupete ilebi uku Nakoni, Uza jwatondabia kuboku kwaki nu kulikamulaki Lisanduku laka Sapanga kwa ndaba ng'ombi yela yatei kulikobando.

7 Pala ndi Bambu Sapanga ayomila Uza. Sapanga ankoma apalapala. Uza jakuwa apalapala pulutengu ji Lisanduku laka Sapanga. 8 Najombi Daudi jwayomiki ndaba Bambu Sapanga ankoma Uza kwi inyela. Ndi pandu je pala mbaka lelenu bapakema Pelesi Uza.

9 Lisoba heli Daudi anzogopa Bambu Sapanga nukupwaga, "Henu linhikila boo Lisanduku laka Bambu Sapanga?" 10 Ndi Daudi ngasejwajetaki kulipeleka Lisanduku laka Bambu Sapanga ku musi waka Daudi, ila Daudi julipelika kunyumba jaka Obedi Edomu mundu juku musi uku Giti. 11 Lisanduku laka Bambu Sapanga heli latama kunyumba jaka Obedi Edomu miei mitatu, na Bambu Sapanga ampengila Obedi Edomu pamu na alongu baki.

12 Bambu nkolongu Daudi pajwajowana kubanga Bambu Sapanga jwaapengi bandu bi kibeleku saka Obedi Edomu na hindu yoti yejwabii nayu ndaba ji Lisanduku laka Sapanga, jwajenda kulijuku Lisanduku lililaganu kuhuma kunyumba jaka Obedi Edomu nukulipeleka kumusi waka Daudi sukutogule. 13 Bandu bala babilitotwi Lisanduku laka Bambu Sapanga kila ebajenda hatua sita Daudi jwapia matambiku gi likambaku la ng'ombi nakatoli kamu kakakendiki. 14 Daudi koni julikongiki kizibau suku nngolu mukibunu saki jwahina kwa makili gaki goti palongi jaka Bambu Sapanga. 15 Ndienu jwombi na Aizilaeli boti bilipeleka Lisanduku laka Bambu Sapanga mbaka ku musi kwaka Daudi kwa ndogule na kwa sauti ngolongu ji imbata.

16 Lisanduku laka Bambu Sapanga palabia lijingi mu musi waka Daudi, Mikali kamwali waka Sauli jwalingalia pi lindilisa ammbona bambu nkolongu Daudi juhombahomba nu kuhina palongi jaka Bambu Sapanga ndienu jwatenda kundongama mu mwoju waki. 17 Ndienu bilijingia Lisanduku laka Bambu Sapanga nkati jili hema lelule Daudi jwatei kulihimika kwa ndaba ji Lisanduku heli. Na mweni Daudi jwapia matambiku gu kutinyi na matambiku gu lukwali palongi jaka Bambu Sapanga. 18 Daudi pajwajomula kupia matambiku gukutinyi na gu lukwali jwaapengalia bandu kuliina laka Bambu Sapanga jwana makili, 19 na jwaabagulia mabumunda na maandasi ga tendi na ga zabibu nyomu kwa bandu boti Aizilaeli, aka mbomba na aka nalomi kila jumu libumunda ni kipandi siinyama ni libumunda la zabibu. Mweni katai bandu boa batenda kuboka kila mundu jwabuja kunyumba jaki. 20 Daudi pajwabuja kunyumba jaki ili kwaapenge alongu baki, Mikali kamwali waka Sauli jwajenda kumpengana koni jupwaga, "Linga lelenu bambu nkolongu juku Izilaeli hejulipoiki lihamu, sukuyeku heu jaki palongi ja atumisi baki akanalomi na aka mbomba ngati ng'ang'a hejuula ingobu yaki palongi ja bandu sanga iyoni."

21 Daudi ampwagila Mikali, "Nakabi palongi jaka Bambu Sapanga jojwanhagula nepani badala ja atati bako, na alongu bake, ili mia ni kilongosi jwa Aizilaeli, bandu baki bambu Sapanga, henu nepani nihina pee palongi jaka bambu Sapanga. 22 Nalihulua namweti namangani kupeta sajenu. Wehapa wiimona ngasindo lakini atumisi akambomba hab bawaapwagi biindendila isima."

23 Ndienu Mikali kamwali waka Sauli ngasejwabii na mwana mbaka kuwa kwaki.