1 Egapeta majambu haga Abusalumu jwapata ligali na falasi na bandu hamsini bukunndongule. 2 Abusalomu jwayobali kujumuka lukela ngani nukujenda kujema kwi indela jejijenda ku litanga la musi. Mundu jokapi jojwabia na magambu ga jupala gajenda kwaka bambu nkolongu ili jutemula, Abusolumu ankema mundu hoju pulutengu nukunndaluki, "Guhumi musi bole?" Ana mundu hoju jupwagiki juhumi musi gumu gulikabila luku Izilaeli, 3 Abusalomu ampwagi, "Segulaja sasakaka. Lakini nga mundu jokapi jojuaguliwi na bambu nkolongu kugujowane." 4 Kabe Abusolumu apwagi, "Ana nepani nakabia nhamusi juku Izilaeli! Kila mundu jojulaja au jojubii na majambu jwakahika kwangu nanepani nakabia numpeki sejupalika kupata!" 5 Kabee Abusalomu jwatondabia kuboku kwaki nu kukumbati nu kumbusu mundu jokapi jojwahika kupega magoti nukunzina mi mbaka pai. 6 Hela ndi Abusalomu hejwahengila Aizilaeli boha babahika kupala kutemuliwa magambu gabu kwaka bambu nkolongu. Kukuhenga hela Abusalomu jujikamwii mioju ja Aizilaeli.

7 Baada ja yaka nsesi Abusalomu ampwagila bambu nkolongu, "Pepa koku na unekake nyenda ku Hebroni ili kupia senunndagila Bambu Sapanga kubanga niitenda kupia. 8 Ndaba nepani ntumisi waku panabia ndama ku Geshuli ku Alamu nunndagila Bambu Sapanga kubanga ana Bambu Sapanga jwiingelabua ku musi uku Yelusalemu ndi nanndumbalia jombi."

9 Bambu nkolongu ampwagila "Nala jenda kulukwali," Abusalomu jwaboka nu kujenda ku Hebuloni. 10 Lakini Abusalumu jwatuma bandu kwa sili mu makabila goha guku Izilaeli kupwaga, "Pamwijowana pee sauti ja talumbeta, mwiipwaga, ‘Abusalomu ndi bambu nkolongu mu Hebuloni!’" 11 Abusoloni pajwajenda ku Hebuloni jwapiti na bandu mia ibeli bajwaakoka kuhuma ku Yelusalemu nabombi bajenda kola kwa mwoju wa sapi wala ngasebamanyiki mpangu waka Abusalomu. 12 Abusalomu pajwabia jupia litambiku jwatuma mundu ku musi uku gilu kunkema Aitofeli na Mgilo na jojwabia apeke mawasu bambu nkolongu Daudi. Kupala kung'anambuka Daudi kwaka Abusalomu kwaendalia kupata makili na bandu bababia atenda kunzengale batenda kujonzukeka.

13 "Mundu jumu jwaika nukumpwagi Daudi, bandu buku Izilaeli jiutwa na Abusalomu!" 14 Ndi, Daudi jwaapwagila atumisi baki bajwabia naku ku musi uku Yelusalemu, "Nzumuka tutila ana nga hela ngatuwesi kunzepa Abusalomu. Tutenda nyata tubokaje jwiika kutulete mangaliku na kwaakoma bandu ba musi kwa mapanga." 15 Lakini atumisi baki bumpwagila, "Twepani twaatumisi baku bambu witu nkolongu tubi tayali kuhenga lokapi lewiamula." 16 Ndi bambu nkolongu jwaboka pamu na alongu baki lakini jwagaleka mabangu gaki komi koni gahenga lihengu la panyumba. 17 Bambu nkolongu jwaboka pamu na bandu baki boti koni atenda kumpwata bajema pandu papabii patali kidogu. 18 Atumisi boha baka bambu mkolongu na Akileti boti na Apeleti boti pamu na Agiti miasita babumpwa bambu nkolongu Daudi kuhuma ku musi uku Gati baboka pamu na jombi koni atenda kunndongule.

19 Ndi bambu nkolongu paambona Itai kilongosi jwa akomana ngondu buku Gati andalukia, "Ndaba jakii hata wehapa gubokiki pamu na twepane? Gukelabuka wakatama pamu na bambu nkolongu nkombu hojo. Ndaba wehapa kongo gungene kabe gutiliki kuhuma ku nndema ukunyumba jino. 20 Guhikiki pamba kipindi kisokopi pena sekipetiki. Boo, nuguhenga lee kuba wamundu jukuyongolota pamu natwepane koni ngasemanyiki konyenda? Gubuja kunyumba pamu na alongu bako. Na Bambu Sapanga jwagulangia uwamboni waki nu kuobaleka kwaki." 21 Lakini Itai anzibua bambu nkolongu, "Napa palongi jaka bambu Sapanga na wehapa bambu nkolongu wangu pokapi pawiibia kukubi kuwa au kuendale kutama nepani nuntumisi waku niitenda kuba." 22 Ndi Daudi ampwgila Itai, "Nala jenda longulia kulongi." Ndi Itai Mgiti jwapeta jombi pamu na bana baki. 23 Daudi pajwabia jutenda kupeta pamu na bandu baki bandu boti mu musi woti balela kwa sauti. Daudi jwalombuka kalosi ka Kiduloni pamu na bandu boti bapeta kujenda kulukoba.

24 Nngolu Abiatali jwapita, hata nu nngolu sadoki jwapita pamu na Alawi boti koni bilitotwi lisanduku li lilaganu laka Sapanga. Bilibekiki pai lisanduku laka Sapanga lela mbaka bandu boha pabapeta kuhuma ku musi uku Yelusalemu. 25 Ndi bambu nkolongu ampwagila Sadoki, "Likelabua lisanduku lililaganu ku musi. Ana ndenda kujetakeka palongi jaka bambu Sapanga jwiitenda kungelabu nukunhwesesa kulibona kabe lisanduku laki nukupabona pajutama. 26 Lakini ana Bambu sapanga ngase jumbala nepani, henu nepani mi tayali juhengila lokapi lejubona lasapi kwaki." 27 Kabee Bambu nkolongu Daudi ampwagila nngolu Sadoki, "Boo, wehapa unndota waka Sapanga? Mbuja kunyumba sulukwali wehapa pamu na bana baku, Ahimaasi na Yonasani mwana waka Abiasali. 28 Lakini niibia nendale ku mitandu kulungwenza kongo mbaka pawiimbwagila wehapa." 29 Ndi Sadoki na Abiatali bilikelabua Lisanduku li Lilaganu laka Sapanga ku musi uku Yelusalemu, nukuigali hoku.

30 Lakini Daudi jaendaliya na sapwali jakwela kitombi si Mizeituni koni julela, sanga ilatu ni kimutu saki atei kuyeku. Hata bandu boti bababii pamu najombi bayekaliya imutu yabu babiya atenda kulela. 31 Kipindi sehesi, Daudi ampwagila kubanga hata Ahitofeli jabii jumu jwa bandu banga kujetakeka palongi jaka Sapanga na babijiungiki na Abusalomu. Lakini Daudi jaloba nukupwaaga, "Mwaa Bambu Sapanga nukuloba, guhenga mpangu wa Ahitofeli wiiwesikana."

32 Daudi pajahika mu keleli ikitombi, pandu pukunndumbali Sapanga, mundu jumu liina laki Hushai kuhuma Aliki jahika ili kumpengana, ingobu yaki yabiya ijendukini pamutu jakigubii luhombi. 33 Daudi ampwagila, "Ana gubii pamu nanepani wibiya nsigu. 34 Lakini ana gukelabwiki ku musi uku Yelusalemu nukumpwagi Absalomu, ‘Niibiya nuntumisi waku mwaa bambu nkolongu, ngati enabii nuntumisi wa atati baku, pu uwanzu,’ ndienu wiihengila mpangu wa Ahitofeli jiiwesa. 35 Boo agolu Sadoki na Abiatali ngabiikubi pamu na wehapa? Waapwagila sokapi lewijoana mu nyumba jaka bambu nkolongu. 36 Linga bana baku boti abeli akanalomi, Ahimaasi mwana waka Sadoki na Yonasani mwana waka Abiatali abii pamu nabombi. Na sokapi semwiijoa mwiimbelakiya majambu gangu kwi indela jabu." 37 Ndienu, Hushai nkosi waka bambu nkolongu Daudi, jakelubuka ku musi kipindi Abusalomu pajajingala ku musi Yelusalemu.