1 "Kwa ndaba heji mumpala Bambu Sapanga, Sapanga winu, nukupwata masoba goti indela jaki na malagalaki gaki ni mihilu jaki. 2 Nholalia sukuhangali, ndaba bana binu ngasebamanyiki wala kulapuliwa na Bambu Sapanga wala uwesu waki wala makili gaki, 3 na nginyuli yaki na ndonduke yejwiihenga kunndema uku Misili kuka bambu nkolongu Falau juku Misili nu nndema waki woti, 4 bana bii ngasebagabweni gajaahengila akomana ngondu buku Misili, inyama yabu yebiikema falasi na magali gabu ga ngondu, namuna ejaalekala akomana ngondu habu mu nhanga nkolongu uku Shamu, na namuna Bambu Sapanga ejwilikoma mbaka lelenu. 5 Kabee nkombuka nga bana binu babagabona gajunhengila Bambu Sapanga pamwabi kulukoba kabula jukuhika pamba, 6 wala majambu gajwaahenga aka Dasani na Abilamu, bana baka Eliabu jabiya ju likabila la Lubeni namuna nnndema ewahoguka nukwaamila boti pamu nakaalongu babu, mahema gabu, inyama na akatumisi babu boti palongi ja bandu boti Aizalaeli. 7 Lakini kwa ndaba mwanganya mwagabweni majambu makolongu haga gaguge Bambu Sapanga jatei kugahenga.

8 "Mwijipwata mihilu joti jenundagalaki lisoba lende, ili nhwesa kujingi nukugujuku nndema gomugujendela ili gubiya winu, 9 ili nhwesa kutama masoma gingi mu nndema hogu gogubi nu luombi lwa sapi kukulema nu kupugii mipugu, nndema goguwe Bambu Sapanga jalagila kwaapeke akahoku binu ni ibeleku yabu. 10 Kwa ndaba nndema gonzenda kugujuku gubiya winu nga ngati nndema uku Misili komwahumaji, komwapanda ilebi, nukujitalia masi kwa magolu ngati migonda ja makolu. 11 Lakini nndema gonzenda kutama ndi nndema wiitombi na magomba, nndema goguwe gokunii iyula kuhuma kunani, 12 nndema goguwe Bambu Sapanga, Sapanga winu, jutenda kugutunza, Bambu Sapanga juguhangali kambelikambeli tumbuka kutumbuli kwa saka mbaka mwisu wa saka.

13 "Ndienu, ngati ana mpwatiki mihilu jangu jenunpeke lelenu, mumpala Bambu Sapanga, Sapanga winu, nukuntumakia kwa mwoju wii woti na kwa loho ji joti, 14 jombi jwagukunila iyula nndema winu kwi kipindi saki, iyula jikihuku ni iyula nzokunzoku, nanamu mwiihusa ilebi yinu na divai jinu na mahuta ginu. 15 Jwiimelisa manyai mu migonda kwa ndaba ja ng'ombi yinu, nanamu mwiikula nukutupi. 16 Mwilihangalia, bankolo nukung'anambuka kuitumaki isapanga yengi nu kuilumbali, 17 ana nhengiki hela Bambu Sapanga jiitenda kunyome mwanganya, nu kujihenga iyula jiikuna nu nndema kukotoka kumelesa ilebi yaki, nanamu mwiikuwa nyatanyata mu nndema wamboni goguwe Bambu Sapanga jutei kumpekee.

18 "Mugabeka malobi gangu haga mu mioju jinu na mu loho jinu. Mugakonga mumaboku ginu nukugawata mwiibongi yinu ili gabia ngati nginyuli yukunkombuke. 19 Mwaabola banabinu malaobi haga nu kugalongale pantama mu nyumba yinu, panzenda na panzenda kugone na panzumuka. 20 Muiandika mu felemu ja nyumba yinu, na mu matanga ginu, 21 ili mwanganya na bana binu nhwesa kutama masoba gingi mu nndema goguwe Bambu Sapanga, Sapanga winu, jwalapa kwaapekee akahoku binu. Mwiitama masoba goti ngati kunani ku maundi hekuendale kuba kunani junndema.

22 "Anamwilihangali nu kupwata mihilu joti jenumpeki, kumpala Bambu Sapanga, Sapanga winu, kujipwata indela jaki joti nu kujongana najombi, 23 Ndienu Bambu Sapanga jwaabenga bandu boti palongi jinu, nanamu mwiitama mu nndema gowabi mali ga bandu baabi bingi na babi na makili gingi kupeta mwanganya. 24 Kila pandu payikanyata yaji ya magolu ginu piibiya pinu, nndema winu wiibiya tumbuka kulungwenza upandi ukusini, mbaka ku itombi ya Lebanoni upandi uku kasikazini, nukuhuma ku losi luku Efulati gowabii upandi golipiti lyoba, mbaka kunhanga nkolongu uku Meditelanea gogubii upandi golijingi lyoba. 25 Nga mundu jokapi jojwiiwesa kumpenga. Pokapi pamwiijenda mu nndema hogu, Bambu Sapanga, Sapanga winu, jaahenga bandu bunzogupa, ngati ejundagila.

26 "Ndingalia, lelenu numbekii palongi jinu kupengalewa na kupata yambamba, 27 Mwiipata mbenge, ngati anampwatiki mihilu jaka Bambu Sapanga, Sapanga winu, jenundagalaki lelenu, 28 na mwiipata yambamba ngati ana ngasempwatiki mihilu jaka Bambu Sapanga, Sapanga winu, nu kujileka indela jenundagalakia, nukuilumbali isapanga yengi yeyuye ngasenhwahiki kuimanya. 29 Bambu Sapanga pajwanhikisa kunndema gonzenda kugujukuu gubia winu, mwiilandila mbenge kuhuma kukitombi sa Gelizimu, na yambamba kuhuma kukitombi sa Ebali. 30 Ngati he mmanya Itombi heyi ibii kwiii ja losi luku Yoludani, upandi golijingi lyoba wi indela jejijenda kolijingi lyoba, mu nndema ja bandu Akanani baatama kuligomba ja losi luku Yoludani pambipi na musi uku Giligali. 31 Kwipalika kuloboka losi luku Yoludani nu kujingi kukamu nndema goguwe Bambu Sapanga, Sapanga winu, jitenda kumpeke. Emwagujukua na kuba winu nukutama homu, 32 Mpalika kukamu mihilu joti na malagalaki ganumpekee lelenu.