1 "Mwaa bandu mommbi mundema ni iumbi yeibii kunani, nnzoaniya malobi gangu,

Joaninya mwaa bandu bupunndema, malobi gaambwaga."

2 Mabolee gangu ga tonya ngati iyula ngati iyula jejikuna,

malobi gangu gaajangatia bandu baajowane ngati ulumi

ngati kameme kiiyula ekajangati mimea misoku kukola,

ngati iyula nzoku mu manyoi mabei.

3 Ndaba niitangasa liina laka Bambu Sapanga,

kila mundu jupalika jumanya, Sapanga witu ndi nkolongu.

4 "Bambu Sapanga ndi lilibu la womi,

mahengu gaki ndi gajaganii,

najombi juhenga pe gagapalia.

Tuwesa kunhobale na twepani bandu kutuhobale

Jombi juhenga majambu ga uamboni na ga haki."

5 Lakini mwanganya nkosiki kuhobaleka kwaki,

mwanganya nga mwabana baki kabee ndaba ju uhakau,

mwanganya ndi kibeleku si kihakau nu kibaja.

6 Nnhwesa boo kunndepa hela Bambu Sapanga,

mwabandu mwaang'ang'a na mwanga na malango?

Boo, mwanganya ngalee atati binu jojummbombiki,

jojunhenga nukunhenga mmbia na makili?

7 Nkombuka masoba gagapetiki,

nhwasaliya yaka yiibeleku hingi yeipetiki,

Mwaalalukiya atati binu nabombi bitenda kumanyasa,

mwaalalukiya akolongu binu nabombi biitenda kwaalandi.

8 Sapanga nkolongu pajijibagila milema na mali gabu,

pajaabaga bandu,

kila milema jijipekiya mipaka jaki,

9 Lakini Sapanga jaagula abia bana baki,

bana baka Sapanga.

Lakini jaagula bana baka Yakobu kuba baki,

haba bilihaguliya kuba mali gaki.

10 Jaaketaninya mu nndema uku lukoba,

lukoba lutopu lolubii nu nhwai nkolongu.

Jaalenda na kwaatunza,

jaahenga ngati liu laki. 11 Ngati tai jojulenda nhui waki,

nu kuhombahomba panani ja mabwela gaki,

anajutandisi mapapati gaki ili kwaakamulaki,

na kwaatoto panani ja mapapati gaki.

12 Jombi Bambu Sapanga mweni jaalongosa,

na ngasejapaliki kuba ni kisapanga sengi sukujangati.

13 Jaapetisa mu ukanda ukunani ju nndema,

nabombi bakula ilebi yabu ku matui.

Jaapekiya busi mu malibu aonza,

na mahuta kuhuma mu mizeituni jejimei muluombi lolubii mu malibu.

14 "Jaapekiya masiba gagagandiki ga ng'ombi na masiba gi mipugu,

mahuta gi likondoo ni likondoo lipongu,

makundi gi mipugu juku Bashani ni imbui.

Jaapekiya inganu ya sapi na divai inyai batenda kunywa."

15 Bandu buku Izilaeli banenipi ngamaa nu kupega mateki,

banenipi, babii ni kitambi nu kunyambabali,

ndienu bunndeka Sapanga jojabomba,

bundongama nkolongu ju uokovu wabu. 16 Bambu jwabona wipu nkolongu kwi isapanga yabu,

bunhenga juyomaa kwa mahengu gabu gukusukisa.

17 Bagapikiya matambiku majobi gaguge ngasegabiya isapanga,

biijendila isapanga, yeyuye ngasebiimanyiki,

isapanga inyai yeyapitika masoba ga pambipi,

yeyuye aseja babu ngasebiitendi isima hata pasokopi.

18 Bunzewiki Sapanga jojubii mwomi,

Munzewiki Sapanga jojummbelika mwanganya.

19 Bambu Sapanga jilibweni lijambu leheli jatenda kwaaleka,

jaakana bana baki, akanalomi na akammbomba.

20 Jaapwaaga, Nga naajangati kabee,

nagubona mwisu wabu wibiya bole!

Ndaba bombi ndi kibeleku siliya.

Bana banga kuhobaleka kwokapi.

21 Anhengiki mia na wipu kwa bombi kutumaki isapanga yiisoli,

anhyomisi kwi imong'umong'u yabu.

Ndienu naahenga abona wipu kwakwaajangatia bandu babube bombi baabona ang'ang'a,

naahenga ayoma sakwaatumi bandu bunndema wa ang'ang'a.

22 Inyela yangu inyakiki mwotu,

jijosa mbaka pai ku libomba langa na mwisu,

jitinia nndema na yoti yeibii,

jitinia misingi ji itombi.

23 Nilundika mang'aliku kila pandu kupete bombi.

Niijomuliya mikoa jangu.

24 Biikombala kwi inzala,

biikuwa kwa homa ingali.

Niipelika inyama yeibii na minu makali kaaluma,

na majoka gagabii na sumu ingali gagakwaba mu luombi.

25 Ngondu jiileta kuwa kwingipi kunza,

na mumanyumba bibiya atenda kuhola,

akakombu akanalomi na akammbomba biitenda kuwa,

hata baajonga na aseja baabii na uliya.

26 Naapwaaga, nukunkoma tipitipi,

na kwaahenga biikombokwa kabee na mundu jokapi,

27 ila pe kwa ndaba jukukipuna kwa abaja binu.

Ili abaja binu bihika kuholale na gangi,

biihika kupwaaga, awesiki kwaakoma,

nanepani Bambu Sapanga ndi nenanhenga majambu gehaga!

28 Izilaeli ndi nndema wanga na malangu,

bandu baki ngaseabii ni isima nkati jabu.

29 Bakawesa kuba ni isima bakamanya ndaba jaki batenda kusindwa.

Bakawesa kuelewa mwisu wabu wibiya bole. 30 Mundu jumu juwesa boo kwaawesa bandu elupu jimu,

au bandu abeli awesa boo kwaawesa bandu elupu komi,

kuwesikana pee ngati Sapanga wabu jutei kwaaleke,

Bambu Sapanga wabu jutei kwaaleka?

31 Hata abaja bitu beni ajetaki pe sapi,

isapanga yabu nga na makili ngati ejubii Sapanga juku Izilaeli. 32 Ndaba mizabibu yabu ndi mizabibu juku Gomola, ihumii mu litui luku Gomola,

Zabibu yaki ndi zabibu yeibii na sumu,

ingonyu yaki ndi yeibaba,

33 Divai yabu ndi ngati sumu ji lijoka,

jibii na sumu ingali ja majoka.

34 "Boo Bambu Sapanga ngasejujewa gabuhengi abaja baku.

Julendale kipind sa sapi sakwaalapu."

35 Kulepa kisasi ndi lihengu langu nepani,

nepani niilepisa,

kipindi pabihabuka, ndaba lisoba la mang'aliku lihiki,

mwisu wabu gubii pambipi ngani.

36 Bambu Sapanga jaakengaliya bandu baki,

na kwaabone ikia atumisi baki,

kipindi pajiibona ngasejubii na bandu bakwaajangati,

wala nga mundu jojuhigaliya, mpugwa au mundu hulu.

37 Ndienu Bambu Sapanga pajaalalukiya bandu baki,

Ibii kwaa isapanga ino,

isapanga yemwiitililaje koni nholale kupata womi?

38 Ibii kwaa isapanga yeikula matambiku ginu,

na kunywa divai na matambiku ginu ga kunywa?

Nala ijumuka yunzangatiya,

mwiileka enu iibiya kinga jinu henu!

39 Linga kuba nepani ndi Sapanga,

na wala nga jongi ila nepani.

Nepani ndenda kukoma nukubeka womi.

Kuumisa nu kulamisa,

na ngakuba jojuwesa kunhokoa jokapi mu maboku gangu.

40 Nyosa kuboku kwangu kunani,

nu kulapa kwa womi wangu wa yaka yanga na mwisu.

41 Ana mugubweni upanga wangu gogung'anyiki,

nu kutondabe kuboku ili kutemu,

naalepa kisasi abaja bangu,

na kwaalapu baanzuki.

42 "Naankoma mwa abaja bangu boti banaakamwi,

upanga wangu wiikoma,

waakoma bandu babuhumisi,

abaja bangu abii bana majunzu malasu."

43 "Mwaabandu bi milema jengi nnzongana pamu na bandu baki kunndumbali Bambu Sapanga,

ndaba jombi jwiilepisa kisasi kwa boti babaakomiki atumisi baki.

Kwaalepe kisasi abaja baki,

nu kugulekake bandu bu nndema waki."

44 Musa na Aloni, mwana waka Nuni bahika palongi jaka Yoshua, bakombuka malobi gu nhwambu gongo, ili Aizilaeli boti ajoaninya.

45 Musa pajajomula kwaapwagi bandu buku Izilaeli malobi haga goti, 46 jaapwagila, "Mwagabeka mmioju jinu nukugajetake malobi goti ganumpeke lelenu. Kupalika kwaalagalaki bana binu ili mwaapwata sukuhobaleka malobi goti ga malagalaki ganga. 47 Ndaba malagalaki ganga nga malobi matopu kwinu ila ndi womi winu, kwa malagalaki ganga mwiitama maisa malasu mu nndema gonnzenda kutama, kwii ja losi lwa Yoludani."

48 Lisoba alelale, Bambu Sapanga ampwagila Musa, 49 "Kwela kitombi ase saka Abalimu mbaka ku kitombi sa Nebu sekibii mu nndema uku Moabu, pambipi na musi uku Yeliku, ana ujilingali nndema uku Kanani jenaapeki Aizilaeli atama. 50 Ndienu wiikuwa nukutagwa mu kitombi sehesi ngati mmbeli waku Aloni ejakuwa nu kutagwa mu kitombi suku Holi, 51 ndaba mwaboti mwabeli mwatunula kuhobaleka kwinu palongi ja Aizilaeli pamwabii mu masi ku Meliba, pambipi na musi uku Kadeshi, mu lukoba luku Sini, na ndaba mwasidwa kuhenge isima palongi ja bandu buku Izilaeli. 52 Wagubona nndema gogubii palongi jaku lakini ngawijingii mu nndema hogu gonaapeki Aizilaeli."