1 Yenze ndi mbenge yeyuye Musa, mundu waka Sapanga jaapwagila Aizilaeli kabula ja kuwa kwaki, Japwaaga, 2 Bambu Sapanga jahika kuhuma ku kitombi Sinai,

jutupitila ku kitombi suku Seili,

janang'ana ngati liyoba kuhuma kitombi sa Palani.

Japitila kati ja atumi bingi bukunani,

na mwotu gogunyaka mu kuboku kwaki uku malele.

3 Bambu Sapanga jaapala bandu baki,

na kwaalonda bandu baki,

Ndienu, atumi baki batama pambipi najombi,

nu kupwata malagalaki kuhuma kwaki.

4 Musa jutulagalakiya tujetakiya miilu,

hesi ndi sindu saamboni ngani sukutujangati mu nndema witu.

5 Ndienu, jabiya bambu nkolongu juku Yelushuni,

kipindi akakilongosi ba bandu pabaketangana,

na makabila goti guku Izilaeli pagaketangana.

6 Kwa makabila gaka Lubeni jaapwaaga,

"Lubeni jutama wala jiikuwa,

na bandu baki biikuba asoku."

7 Kwa likabila luku Yuda japwaaga,

"Mwaa Bambu Sapanga gujoanakiya kilelu si likabila laka Yuda,

gulihenga kujongana na bandu baki kabee,

Gukomana kwa maboku gaku kwa ndaba jaku,

gulijangatiya likabila laka Yuda kupete abaja baki."

8 Kwa likabila laka Lawi, japwaaga,

"Mwaa Bambu Sapanga gwaapekiya Alawi lilobi laku lu Ulimu,

lilobi laku la sumimu,

babube waalenga ku Masa nukukomana naku mu masi guku Meliba.

9 Alawi biileka nyumba yabu,

ili awesa kukutumaki sapi wehapa,

alijoanii lilobi laku,

babiya baahobaleka,

nukukamulaki miilu jaku.

10 Ni likabila la Alawi baabola ibeleku yaka Yakobu malagalaki gaku,

baabola bandu buku Izilaeli miilu jaku.

Alawi na apogaliya ubani palongi jaka Bambu Sapanga,

matambiku goa gukutinia pandu pukupiki matambiku, 11 Mwaa Bambu Sapanga,

wagapengaliya makili gabu,

wagajetakiya mahengu ga maboku gaku,

tunula makili ga abaja babu,

makili ga bandu babugusuki biijumuka kabee."

12 Ku likabila laka Benjamini jaapwaaga,

"Heli ndi likabila lejulipai Bambu Sapanga nukulilenda,

jwaalenda muhi pipipi,

nu kutama pikilanda jabu."

13 Ku likabila laka Josepu jaapwaaga,

"Bambu Sapanga nu jugupengaliya nndema waki,

Kwa mbengale ya sapi ngani kuhuma kunani ni kiliba sa masi sekitulii pai.

14 Apengaliwa sukupata ilebi ya amboni kukubali lyoba,

kwi ilebi ya kila mwei.

15 Kwi ilebi yaamboni yi itombi ya pamwandi,

ni ilebi yi itombi ya mwandi.

16 Nndema waki gutwelala goa gagabii gaamboni,

gapengaliwa kwa uamboni waka Bambu Sapanga,

jojuwe japitila pi kioli.

Mbengale heyi yahulukiya bandu bi likabila laka Josepu,

jojabii nkolongu kati ja alongu baki.

17 Josepu jubii na makili ngati likambaku la ng'ombi,

manyelu haga ndi makabila gaka Manase na makabila Efulaimu.

Epulaimu jabiya na akomana ngondu baki elupu komi,

na akomana ngondu baka Manase babiya elupu komi."

18 Ku likabila laka Zebuluni ni likabila laka Isakali, japwaaga,

Zebuluni mahengu gabu gunzendila sapi,

ni likabila li Isakali mahengu ginu gaajendila sapi mu mahema gii.

19 Baakema ageni mu itombi yabu,

na hoku bandu biipiya matambiku gagapalika.

Ndaba bombi biipata mali gingi kuhuma kunhanga nkolongu,

na hindu yeahihiki mu nsangi uku mbwani.

20 Ku likabila laka Gadi, jaapwaaga,

"Julumbalika Sapanga joampeke Gadi pandu pakolongu.

Gadi juhepila ngati lihimba,

jupata kuboku nu lutoto lu umutu.

21 Jahagula lieneu la sapi kupeta goti,

pandu pabahagulwi pandu piki kilongosi.

Jaalongua bandu nukunzetakale bambu Sapanga,

jajomuliya mpangu waka Sapanga kwa Aizilaeli."

22 Ku likabila laka Dani jaapwaga,

"Dani ndi lihimba,

lelihomba kuhuma ku Bashani."

23 Ku likabila la Nafutali japwaaga,

" Mwaa Nafutali mwaamboni,

ndaba gutweli mbengale yaka Bambu Sapanga,

nndema waku uku kusini mu nhanga uku Galilaya."

24 Ku likabila la Asheli japwaaga,

"Asheli jupengaliwa kupeta bana boti baka Yakobu,

na alongu baku boti bampala ngamaa,

nu nndema waki wibiya na mahuta gingi gi mizeituni.

25 Matanga ga misi jii giibia gikisoma na shaba.

Womi waku widumua kutama kwaku kwoti!"

26 Musa jajomuliya ku kupwaaga,

"Mwaa Izilaeli, ngakuba jojubii ngati Sapanga waku,

jombi jupeta kunani ku maundi kuhika kugujangati,

jupeta panani mu ulumbi waki gogubonikana.

27 Sapanga jwa yaka yanga na mwisu ndi pandu pinu pukutili,

makili gaki gabonikana pu nndema.

Jaabenga abaja palongi jinu,

jaalagalakiya, ‘Mwaakoma boti.’

28 Ndienu, bandu buku Izilaeli biitama sapi,

ibeleku yaka Yakobu kajika jaki,

mu nndema gogutweli ilebi na divai,

ndema goguwe iyula jikuna kuhuma kunani. 29 Ntogulia mwaa Izilaeli,

Nya jojubii ngati mwanganya, mwabandu mojunhokwi mweni Bambu Sapanga,

jojuwe ndi ngau ju kujangatiwa witu,

nu upanga gunndete kuwesa!

Abaja bitu biika kunzinamii palongi jinu,

nanamu mwaakanyatiya pai."