1 "Anajupatikini mundu joankomiki kwikiholi mu nndema goguwe Bambu Sapanga, Sapanga winu, jutei kumpeke gubia gwinu, nanamu ngase mummanyiki nya jojunkomiki, 2 akakilongosi na bandu bi baatemu biipita nukujenda kupema ulasu waki kuboke pandu pagubii ntuhi hogu mbaka pa misi ja pambipi. 3 Ndienu, akakilongosi ba musi gola gogubi pambipi nu ntuhi gola biijukuwa litoli la ng'ombi lelule ngaselihengiki lihengu lokapi wala ngasebilikongiki sindu sokapi. 4 Nabombi balipelika litoli la ng'ombi heli mbaka kuligomba kukalosi kakuke ngasekajomalela, ni ligomba heli ngasealema wala ngaseapanda sindu, na hoku balitunula hingu litoli la ng'ombi heli. 5 Na akagolu kuhuma mu likabila la Lawi biipalika abiya pala. Bambu Sapanga, Sapanga winu, jwaahagula bunhengila mahengu gaki nukunndoba Sapanga jwaapengila bandu baki. Bombi kabee ndi babii nu uwesu gogulandi kila sindu nu kutumii makili. 6 Litoli la ng'ombi lela pamwalitunula nhingu, akakilongosi boti ba musi hogu gogubi pambipi na mundu joankomiki, biisamba masi mumaboku gabu panani ja ng'ombi jebilitunula nhingu jaki heji, 7 nu kupwaga, ‘Ngasetuhengiki sindu senze wala ngasetumanyiki joankomiki. 8 Mwaa Bambu Sapanga, waalekakiya bandu baku Aizilaeli bawakombula kuhuma ku Misili, waabeka bandu baku mu kihakau sukukomeka kwaka mundu jwanga ni kihakau, ila utulekakiya twepani kihakau situ na watubona ngati tubii ni kihakau kupete lijambu lukunkoma mundu hoju.’ 9 Henu mwibiya mlinyambisi mwabeti kupete kihakau hesi, sukuhenga hela likosa lukukoma hoku ngalikubi linu, ndaba nhengiki gajugapala Bambu Sapanga nhenga."

10 "Anampiti kukomana ngondu na abaja binu, na jombi Bambu Sapanga kuhenga nhwesa, nu kwaajuku baasindiki, 11 ana jumu winu abweni mmbomba jwamboni pikilanda ja bandu babakamwi, anajuntokuli nu kupala kunzuku. 12 Ndienu, wa mwanalomi wegumpai, gwanzukua mbaka kunyumba jaku, na jombi jimoga kimutu saki nu kuseku yobu yaki, 13 jiihula ingobu yejabii juweti pabasindwa. Jwiitama mwei gumu kwaalele atati baki na amabaki, ndienu guwesa kugone naku, na jombi jubiya nhwanu waku. 14 Lakini anangasejugulenganela wandeka jujenda, waandombesa ku lupija wala wanhenga ngati ntumwa, ndaba gupoiki lihamu."

15 "Ana mwanalomi jongi jubii ni mitala na jombi jumpala jumu kupeta jongi. Na akambomba haba bumpapi bana akanalomi, na mwana jukutumbuli kubeleka ndi jukanyongo jwanga kumpala jola, 16 analihika lisoba anajwiiamu kwaapeke ulisi bana baki, tati hoju jwiilangi kupala kumpeke sukumpeke hindu hingi nakanopi mwana jukummbomba joampai jola. 17 Ndi kwiipalika anzetake jukutumbuli kusaliwa jola hata ngati ngaseampai mwana juku mbomba jwanga kumpala jola, nu kumpeke haki jaki, pandu pa mali gaki mala pabeli."

18 "Ana jubii na mwana jwanga kwaajoane akahengo na akanyongo hata ngati atenda kunndapu ili kummbola, lakini jwakona ngasejwaajoane, 19 ndienu, amabu na atati baka mwana hoju baanzukua mbaka pi litanga la musi ili kuntaki kwa akakilongosi. 20 Ahengo na anyongo haba baapwagila akakilongosi ba musi, ‘Mwana witu jubii ni kibuli nu ngukuna, ngasejupala kutujowana, jubii nndapi nu nndepi.’ 21 Hapa bandu ba musi hogu bandapula kwa malibu mwana hoju mbaka jukuwa. Hela ndi emwaguhenga ubaja gukotuka pikilanda jinu. Kila mundu kati ja bandu ba Aizilaeli jwiijowana lijambu heli nu kujogopa."

22 "Ana mundu juhengiki likosa lelipalika kukomeka najombi anaankomiki sukumbambali mu nkongu, 23 ntuhi waki wihigali mu nkongu ikilu joti ila mwagutaga lisoba lele. Ndaba mundu joammbambali munkongu jupatiki yambamba kuhuma kwaka Sapanga nanamu ngamwaguhengi nndema winu gojumpekiya Bambu Sapanga, Sapanga winu, gubiya winu kuba wanga kujetakeka palongi jaka Bambu Sapanga."