1 "Ana gubii ugombi kati jii mwaabeli nukujenda kumagambu najumu ana jubonikana ngasejubii ni likosa na jongi jabonikana jubii na makosa, 2 jojubonakini jubii na makosa, ana buntemwi kundapula iboku jojutemu jwiilagalakia mundu hoju jugoluka pai nu lutumbu nukunndapu iboku kulengana ni likosa laki. 3 Jojubii ni likosa juwesa kundimanga iboku alubaini lakini hii petake. Ana mpetaki iboku hei mwiibia mumpoiki lihamu nndongu wii.

4 "Mwajikonga ng'ombi nndomu pajipumunda ilebi.

5 "Ana alongu abeli akanalomi atama pamu na jumu wabu ana juwii sanga kunndeka mwana mwanalomi, nhwanu waki jwiijenda kunzuku pandu pangi kunza ji kilongu sengi ila jwiipalika jutoguleka nu nndongu waki jojuhigali. 6 Mwana ju utumbuli mwanalomi jojwiisaliwa jwiibalangika kuba mwana waka mundu jojuwii jola ili liina laki liiputika mu nndema uku Izilaeli. 7 Lakini ana nndongu waka mundu jojuwii hoju ngaseampala mmbombo joawii alomi baki hoju ndienu mmbomba hoju jwiijenda palongi jaka kilongosi ba musi nukupwaga, ‘Kaka wa alomi bangu baawii jukana kuendalesa liina laka kaka waki jojuwii mu nndema uku Izilaeli, ngasejupai kuhenge gagapalika kuhenga kwa ndaba juku nndomi wangu jojuwii.’ 8 Ndi akakilongosi ba musi bankema mwanalomi hoju nukulonge naku. Ana jwiiendalia kupwaga ngasejupai kunnzuku, 9 Mmbomba joawii alomi baki hoju jwanzendila palongi ja aseja bamusi aba, anhula kilatu saki simu nukunhuni imata pamiu nukumpwagi, ‘Hela ndi hekupalika kuhengewa mundu jojukana kumpeke nndongu jojuwii kibeleku.’ 10 Nilihina la nyumba jaki pa Izilaeli liitenda kumanyikana ngati, ‘Nyumba jaka mundu jobunhuliki kilatu.’"

11 "Akanalomi abeli ana akomini nu nhwanu waka jumu wabu ana anzangati nndomi waki sukunkamu pi lihona jujukomana nu nndomi waki jola, 12 mwambone ikia, mwansekula kuboku kwa malele kuka mmbomba hoju.

13 "Waakonga bandu pagupema hindu sukutumii malibu mabeli. Lengi lelitopiki na lengi lelijojwiki. 14 Wala mwiikuba na aina ibeli yiipemu yukupeme mu nyumba jaku, simu kikolongu na sengi kisoku.

15 "Ntumia ipemu yeibii nu utopee wa sakaka ili nhwesa kutama yaka ingipi mu nndema gojumpeke Bambu Sapanga, Sapanga wino. 16 Boti baahenga majambu haga, kwiisoli Bambu Sapanga, Sapanga wii jutenda kwaasuki.

17 "Nkombuka sebahenga Ahamaleki pamwabia mwiindela kuhuma ku Misili. 18 Ahamaleki haba ngasebunzogupa Sapanga. Ndienu bundapula kuhuma munyuma koni nsokiki na kujokane makili kabee baalapula bandu bababiya ahuma munyuma. 19 Henu kipindi Bambu Sapanga, Sapanga winu pajwanhenga mmbiya mwabomi kwa ndaba jukulapuliwa na abaja binu boti babaayongalota mu nndema gojumpeki gubia winu nu kutama momu, kupalika mwaakoma tipitipi Ahamaleki boti biibonikana kabee.