1 Musa jaendaliya kupwaaga, "Numpeki nhagula kati ja mbengale na yaambamba. Majambu haga goti anagumpatiki nanamu anamugaholali pokapi pammbii kati ja bandu bu nndema gongi momuje Bambu Sapanga, Sapanga winu jibiya jumpesangini, 2 ana munkelabukiya Bambu Sapanga, Sapanga winu, mwanganya na bana binu, nu kujetake kwa mwoju winu woti na loho joti lilobi laki lenundagalaki lelenu, 3 hapa ndi Bambu Sapanga winu, jankelabukia gaamboni ginu na kwaabone ikia lelenu na kwaakusanya kabee kuhuma mu milema jengi jejuje jibiya japesangini. 4 Hata ananibiya naapesangini mu nndema ukutali ngani, Bambu Sapanga, Sapanga winu jaankusanya na kwaakelabuki, 5 ili gubiya winu kabee nndema gobabia atama aseja binu. Najombi jaanhenga majambu gi gajenda sapi ngani nakuba mwabingi kupeta aseja binu. 6 Bambu Sapanga, Sapanga winu jaahengila mwanganya ni ibeleku inu mmbiya na mwoju ukujetake ili mumpala jombi kwa mwoju winu woti na loho jinu joti, ili nhwesa kutama. 7 Bambu Sapanga, Sapanga winu, jaiboa yaambamba heyi kwinu na yaapata abaja binu babunng'alisa. 8 Nanamu mwannzoaninya Bambu Sapanga nu kujikamu mihilu jaki joti jenumpeki lelenu. 9 Bambu Sapanga, Sapanga winu jaahenga mpengiliwa mu kila lemwiihenga, mwiibiya na bana bingi na ng'ombi hingi na matui gingi giipia ilebi. Ndaba jiipala kabee ndaba janhenga majambu gi gajenda sapi ngati ejapala kwaapenge aseja binu, 10 ana munnzoani jombi nukukamu mihilu na malagalaki gaki gagahandikwi mu kitabu senze sa malagalaki nukunkelabukii Bambu Sapanga, Sapanga winu, kwa mwoju winu woti na loho jinu joti.

11 "Miilu jenumpeke lelenu ngasejinonwipi kwinu, nu nhwesa kuihenga. 12 Ngaseibii kunani kwa maundi kwaka Sapanga mbaka mpwaga, ‘Nya jojwilombuka nhanga jutuletila ili tuijoaninya nu kuijetake.’ 13 Wala ngaseibii kwii ju nhanga nkolongu, hata mpwagi, ‘Nya jojwiilombuka nhanga nkolongu jutuletila ili tujoaninya nukujetake.’ 14 Ngahela, ila ibii pambipi na mwanganya, mundomu jinu nu mumioju jinu, nhwesa kujihenga.

15 "Lelenu numpeke nhagula kati ja gaamboni na giliya, kati ja womi na kuwa. 16 Ana nzetaki miilu jaka Bambu Sapanga, Sapanga winu, jenumpeke lelenu, kumpala Bambu Sapanga, Sapanga winu, nu kupwata indela yaki nukukamu mihilu yaki, nukukamu malagalaki gaki, ndienu mwiitama nukujonzukeka, najombi Bambu Sapanga, Sapanga winu, jaampengaliya munndema gounzenda kulongosa. 17 Lakini mioju jii jing'anambuki kutali nu kukana kunzoane, nu kutokule kwiilumbali imong'umong'u yengi nukuitumaki, 18 nepani nuntangasii lelenu kupwaaga mwiitenda kuwa. Ngamwiitami kwa masoba gingi mu nndema gounzenda kutama, gogubii kwii ja losi lwa Yoludani. 19 Nugukema nndema nu kunani kwa maundi ilingaliya kupete mwanganya lelenu, kubanga numpeke kuhagu kati ja womi na kuwa, kati ja mbengale na yaambamba. Ndienu nhagula womi ni ibeleku inu iwesa kutama, 20 anamumpai Bambu Sapanga winu, anamunzowani jwombi nukujongana naku. Ndaba kuhenga hela kulangi mwiiwesa kutama masoba gingi nukutama mu nndema goguwe Bambu Sapanga gojaalagila aseja binu, Abulahamu ni Isaka na Yakobu, kubanga jiitenda kumpeke."