1 Ndienu, Musa koni jubii pamu na akakilongosi buku Izilaeli jwaapwagila bandu ana, "Nkamula malagalaki goti ganumpeke lelenu. 2 Lisoba lemwiilombuka losi lwa Yoludani nukujingi mu nndema goguwe Bambu Sapanga, Sapanga winu jutei kumpeke mwiijemika malibu makolongu nu kukilima kwa chokaa. 3 Panani jaki mwihandika malobi goka ga malagalaki goti haga, pamwiijingila mu nndema golenganii kupugi nu kulema goguwe Bambu Sapanga, Sapanga wa aseja binu jwatei kunndagi. 4 Pamwiibia kwii ja losi Yoludani, mwiijemika malibu haga panani ji kitombi sa Ebali, ngati henunndagalakia lelenu nu kukilima kwa chokaa. 5 Mwansengila pandu pukupiki matambiku kwa malibu ganga kubasa kwa sindu sikisomasoma Bambu Sapanga, Sapanga wino. 6 Pandu pukupiki matambiku pamwansengila Bambu Sapanga, Sapanga winu kupalika jisengwa kwa malibu ganga kubaswa. Panani ja pandu pukupiki matambiku mwampiikia Bambu Sapanga, Sapanga wino matambiku gukutinyi. 7 Mwampiikia matambiku gulukwali nakula papa nu kutogule palongi jaka Bambu Sapanga, Sapanga wino. 8 Mwiiandika panani ja malibu haga malobi goha ga malagalaki ganga nukubonikana sapi."

9 Ndienu Musa pamu na agolu baka Sapanga Alawi baapwagila Aizilaeli boha, "Ntumbala nnyowania mwabandu buku Izilaeli. Lelenu mwanganya mmbi mwabandu baka Bambu Sapanga, Sapanga winu. 10 Henu mpalika kunzowane Bambu Sapanga, Sapanga winu ana mpwatiki miilu jaki na malagalaki gaki ganunndagalaki lelenu."

11 Lisoba heli Musa jwaalagalakia bandu nukupwaga, 12 Emwibiya nndobwiki losi Yoludani, makabila ganga giijema panani jikitombi Gelizimu kwaapengee bandu buku Izilaeli, makabila ge ndi Simeoni na Lawi na Yuda na Isakali na Yosefu na Benjamini. 13 Na makabila ganga giijema panani jikitombi Ebali ili kupwaga malobi ga yaambamba, Lubeni na Gadi na Asheli na Zebuluni na Dani na Nafutali. 14 Nabombi Alawi baalandila bandu boti buku Izilaeli kwa makili malobi ganga.

15 "Jupata yaambamba mwanalomi jokapi jojulenganake imong'umong'u yukubasa au jukuyeyusha nukulumbali kwa sili sindu sekilenganakiwi kwa maboku gaka pundi najombi ndi sibia sindu sukusukisa kwaka Bambu Sapanga, Sapanga wino. Na bandu boa biijetakia, ‘Ena kubiya ahelahela!’

16 "Jupata yaambamba mwanalomi jokapi jojampoa lihamu atati baki au amabu baki. Na bandu boa biitenda kujetake, ‘Ena kubiya ahelahela!’"

17 "Jupata yaambamba mwanalomi jokapi jojuboa alama jumpaka wa jwa pambipi jaki." Na bandu boha biijetakia, Ena kubiya ahelahela!

18 Jupata yaambamba mundu jokapi joanhoa mundu jwanga kulinga kunhoa indela. Na bandu boha biijetakia, ena kubiya ahelahela!

19 "Jupata yaambamba mundu jokapi kunzima sejupalika kupata nngeni au akeba au akambomba baawi alomi babu. Na bandu boha ajetakia, ‘Ena kubiya ahelahela!’"

20 "Jupata yaambamba mwanalomi jojugone nummbomba wa atati baki ndaba jaampoha lihamu atati baki. Na bandu boha biijetakia, ‘Ena kubiya ahelahela!’"

21 Jupata yaambamba mundu jokapi jojwiigonila ni kinyama sokapi. Na bandu boha biijetakia, Ena kubiya ahelahela!

22 Jupata yaambamba mwanalomi jokapi jojwiigonila na dada waki jukubi mwana wa atati baki au wana wa amabaki. Na bandu boha bijetakia, Ena kubiya ahelahela.

23 Jupata yaambamba mundu jokapi jojugone na akoanu baki. Na bandu boha biijetakia, Ena kubiya ahelahela.

24 Jupata yaambamba mundu jokapi jojukoma kwa sili. Na bandu boha bajetakiya, Ena kubiya ahelahela.

25 Jupata yaambamba mundu jokapi jojujopa hongo ili junkoma mundu jwanga ni likosa. Na bandu bajetakiya, Ena kubiya ahelahela!

26 Jupata yaambamba mundu jokapi jwanga kukamu mlagalaki goti gaka Sapanga na mabole gaki. Na bandu boti bajetakiya, Ena kubiya ahelahela!