1 "Jenze ndi mihilu na malagalaki gaguge Bambu Sapanga, Sapanga winu, jwanagalakia numbola, ili mugatimisa mu nndema gumwiijenda kutama. 2 Kipindi soti pamwibia mwabomi kwiipalika kunndumbali Bambu Sapanga, Sapanga winu, nukutimisa malagalaki goti ni mihilu jenumpeke mwanganya ni ibeleku inu ili nhwesa kutama masoba gingi. 3 Nzowania mwabandu buku Izalaeli, nhangalia kujitimisa ili nhwesa kutama kwamboni nukujonzukeka ngani mu nndema gojunndagila hogu gogulengane kulema nu kupugi mipugu jingi.

4 "Enu nzowania mwa Izilalaeli! Bambu Sapanga, Sapanga witu, ndi Bambu Sapanga jumu, 5 Mumpala Bambu Sapanga, Sapanga winu, kwa mwoju wii woti, na kwa loho jinu joti na kwa makili ginu goti. 6 Mugabeka mu mioju jinu mihilu jenze jenunndagalaki lelenu, 7 nakwaabola sapi bana binu. Mwaalandila emwiibiya ntama munyumba au mbii nsapwali au panzenda kugone au panzumuka. 8 Mwagakonga mumaboku ginu nukugawata mu ibongi hii yapamihu gabiya ngati sindu sukunkombuke. 9 Mugaandika panani ja felemu ji milyangu jinu na mu matanga ga misi jinu.

10 "Ngati Bambu Sapanga, Sapanga winu, ejaalapila akahoku binu, Abulahamu na Isaka na Yakobu, kubanga jombi jwaampekia nndema gogubii na misi mikolongu na jamboni jejineng'ane jejuje mwanganya ngasemujinsengike. 11 Nyumba jibiya jitweli hindu yamboni yeyuye mwanganya ngase mwiibekike, kwiibiya ni iliba yeyuye mwanganya ngase mwiihembike ni migonda jimizabibu ni mizeituni jejuje mwanganya ngase mwijipandike. Bambu Sapanga ejampeleka mu nndema hogu kokukwe mwiibiya na posu jokapi jemwajipala, 12 Nhangalia mwaandeka Bambu Sapanga jojunmpiiki ku nndema uku Misili komwabii mwaatumwa. 13 Mwaanhengila isima Bambu Sapanga, Sapanga waku, mwaantumakia jombi kajika jaki nukulapa ku lihina laki. 14 Mwailumbali isapanga yengi, isapanga ya bandu babii pambipi na mwanganya, 15 inyela jaka Bambu Sapanga janhiki mwanganya, na jombi jwankoma mwanganya mwiikuba punndema, ndaba Bambu Sapanga, Sapanga winu jubii pikilanda jinu, ndi Sapanga jojubii na wipu.

16 "Mwandenga Bambu Sapanga, Sapanga winu, ngati emundenga ku Masa. 17 Nkamula sapi mihilu jaki, Bambu Sapanga, Sapanga winu, matemuli na malagalaki gaki gaguge jutei kundagalakia. 18 Nhenga gagapalika kwaka Bambu Sapanga, ili juwesa kuhenga mpata kila sindu. Mwiiwesa kugukamu nndema gola wamboni goguwe Bambu Sapanga jalapiki kubanga jaapekia akahoku binu, 19 nu kubanga Bambu Sapanga jaabenga abaja binu ngati ejalagila.

20 "Masoba gagihika, bana binu ebilalukia, ‘Boo malagalaki haga gaguge Bambu Sapanga, Sapanga witu, jutulagalaki gabii na maana bole?’ 21 Mwanganya mwajibua ana, ‘Twepani twabii twaatumwa kwaka bambu nkolongu Falau juku Misili, na Bambu Sapanga jutuokua sukutumi makili gaki makolongu. 22 Twalinga kwa mihu gitu twabete jaka henga nginyuli ikolongu na ndonduke na majambu gukujogoa kwa bandu buku Misili, bambu nkolongu na bandu baki boti. 23 Jutupia ku nndema uku Misili, nukutuleta pamba nu kutupekee nndema gongo, ngati ejalapa kubanga jaapekia akahoku bitu. 24 Henu, Bambu Sapanga jutulagalakia kujipwata mihilu heji joti nu kuntende isima kwa ndaba jukuneng'ane twabete, ili jutulenda masoba goti ngati hejuhenga lelenu. 25 Kabee twiiwesa kujetakalewa Sapanga ngati ana tutimisi sukuhangali mihilu heji joti palongi jaka Bambu Sapanga, Sapanga witu, ngati ejutulagalakia.’