1 "Mihilu joti jenumpeke lelenu, kupalika mwijipwata sukulingali ngamaa ili nhwesa kutama nukujonzukeka, ili nhwesa kujingi nukujikamu nndema gola goguwe Bambu Sapanga, Sapanga winu, junndapila kubanga jwaapekia akahoku binu. 2 Nkombuka Bambu Sapanga, Sapanga winu, ejundongua mu indela joti kupete kulukoba kwa yaka alubaini, ili junhenga mbia na makili sukundenga ili juwesa kumanya nhwasali kii mu mioju jii na ngati mwijipwata mihilu jaki au ngamwajipwate. 3 Junhenga mmbia na makili sukunndeka mmbona inzala na mwenikatai jumpekia posu jebijikema mana nkula, posu jeheji ngasemwijimanyike wala akahoku binu ngasebikimanyike. Jahenga hela ili jumbola kubanga mundu ngasejuwesa kutama kwa ndaba ji libumunda pena, ila pe kwa kila lilobi lejulonge Bambu Sapanga. 4 Kwa yaka alubaini ingobu yii ngaseyalaile, wala magolu ginu ngasegahimbike. 5 Nkombuka kubanga Bambu Sapanga, Sapanga winu, junhenga mbiya ni isima sukundapu ngati atati eanhenga mwanamundu. 6 Ndienu, mwiipwata mihilu jaka Bambu Sapanga, Sapanga winu, ili nhwesa kujenda mwiindela jaki nu kuntende isima jombi. 7 Bambu Sapanga, Sapanga winu janzingia mu nndema wamboni, nndema gogubi ni iliba na chemichemi, na masi gaganyika kuhuma mu magomba na mwiitombi, 8 nndema gukulema inganu na shayili na mizabibu ni mikongu ji mitini ni mikomamanga ni mizeituni na gogubii na busi. 9 Hoku mwiipata posu jingipi wala nga mwiipungukiwi na sindo. Malibu gaki makolongu gabii gikisomasoma, na muitombi yaki nhwesa kuhemba madini ga shaba. 10 Mwiikula nukutupi, mwansengula Bambu Sapanga, Sapanga winu, ku nndema wa sapi gojumpeki."

11 "Nndingalia nga mwaanzewi Bambu Sapanga, Sapanga winu, sukusindwa kupwata mihilu jaki, malagalaki gaki, gajunndagalaki lelenu. 12 Emwikula nukutupi, nu kusenga nyumba ja mboni nu kutama homu, 13 ni kipindi makundi gi ng'ombi ni imbui na makondoo ginu pagibia gajonzukiki na madini ga zahabu na madini ga feza yinu paibia ijonzukiki na kila sindu sembii nasu pakiibiya kijonzukiki, 14 mwiikuba ni ing'omu nukunzewa Bambu Sapanga, Sapanga winu, jojumpia mu nndema uku Misili, komwabii mwaatumwa. 15 Ndi jojundongusa mu lukoba lukolongu na lolujogopesa, lolubi na majoka gagabi na sumu ni ipelee ikolongu mu nndema nzomu gola gowabi nga na masi, jumpikia masi kuhuma mu lilibu likolongu lelabi nganganganga. 16 Kabee ndi jojundea posu jebijikema mana kulukoba, posu jeheji akahoku binu ngasebawesiki kujimanya. Jwahenga haga goti ili junhenga mbia na makili nu kundenga, ili kumpema na juwesa kunhenge majambu gaamboni. 17 Ndienu mwilihangalia mwalipwagi mu mioju jinu, ‘Tubii na mali gingi kuuwesu na makili gitu twabeti.’ 18 Nkombuka kubanga Bambu Sapanga, Sapanga witu, ndi jojumpeke uwesu wa kuba na mali gingi. Juhenga hela ndaba jukutimisa lilaganu lejahenga na akahoku binu mbaka lelenu. 19 Lakini anamunzewiki Bambu Sapanga, Sapanga witu, nu kuipwata isapanga yengi ili kuitumaki nu kuigungamalii, nundakali su ukali lelenu kyekye mwiitenda kuwa. 20 Ana ngamwanzowane Bambu Sapanga, mwiikuwa ngati bandu banga Aizalaeli ebaakoma palongi jinu."