1 Mwiihenga matola ga Pasaka mwei wa Abibu kwiisima yaka Bambu Sapanga, Sapanga winu. Ndaba mwei wa Abibu hogu Bambu Sapanga, Sapanga winu jumpia mu nndema uku Misili kipindi si ikilu. 2 Mwiipiya litambiku la Pasaka kuhuma mu makundi ginu gi mipugu ja makondoo au ng'ombi kwiisima yaka Bambu Sapanga, pandu papupe Bambu Sapanga pajupahagwi ili kuntende isima hoku. 3 Mwiikula litambiku heli na mabumunda gaajegi amila. Kwa masoba saba mwiikula mabumunda ganga kujege amila, na mabumunda haga ndi bagakema mabumunda gamang'aliku ndaba mwaboka ku nndema uku Misili kanyata, ndienu masoba goti gamwiitama mwalikombuka lisoba le mwaboka ku nndema uku Misili. 4 Kwa masoba saba mundu jokapi mu nndema winu jwiibeka amila mu nyumba jaki, ni inyama ji kinyama sejusinziki pakamii ji lisoba lu kutumbuli jiihigali mbaka pulukela. 5 Mwiipia hata kulenga litambiku la Pasaka mu musi waku wokapi gojugupeki Bambu Sapanga, Sapanga winu, 6 ila pe mwalipiikia pandu pajwapahagula Bambu Sapanga, Sapanga winu ili kunndumbali, hapa ndi pamwiipikia litambiku la Pasaka pakamii, lyoba palijingii, kipindi selase pamwaboka ku nndema uku Misili. 7 Inyama heji mwajitelaka na kujilele pandu pajapasagula Bambu Sapanga, Sapanga winu na pulukela jaki mwiikelabuka mu mahema ginu. 8 Masoba sita mwikula mabumunda ganga kujege amila, na lisoba la saba wiibiya nkutanu nkolongu gukundumbali Bambu Sapanga na mwiihenga lihengu lokapi lisoba heli.

9 "Mwiibalanga majuma saba tumbuka pantumbuli kuhusa ilebi yinu. 10 Ndienu mwiienga tipati ja majuma kwi isima jaka Bambu Sapanga, Sapanga winu, sukupia litambiku sukupala mwabee, kadili Bambu Sapanga, Sapanga winu ejumpengi. 11 Mwiitoguliya palongi jaka Bambu Sapanga, Sapanga winu. Mwanganya pamu na bana binu na akakamwali binu na atumisi binu na Alawi na ageni na akeba na akambomba baawii akalomi babu baatama pamu na mwanganya. Nhenga haga pandu Bambu Sapanga, Sapanga winu, pajwiihagula litama ili kunndumbali. 12 Nkombuka kubanga mwabii mwaatumwa ku nnndema uku Misili, ndienu nhangaliya kujipwata mihilu aje."

13 "Emwiibiya mpetiki ilebi yii yoti nu kuminya zabibu yinu, mwiihenga Matola gi Indamba kwa masoba saba. 14 Mwiihenga tipati heji, mwanganya na bana binu akanalomi na akambomba, atumisi binu na aka Alawi na ageni, akeba na akambomba bawii akalomi babu baatama mu misi jinu. 15 Kwa masoba saba mwanhengila tipati Bambu Sapanga, Sapanga winu, pandu pajapasagula ndaba Bambu Sapanga, Sapanga winu jitenda kumpenge kwiilebi yii yoti na mu mahengu gini goti nanamu mwiitenda kutoguliya."

16 "Akanalomi boti bu nndema winu biihika palongi jaka Bambu Sapanga, Sapanga winu, mala patatu kila saka pandu pajwapahagula ili kunndumbali, kipindi sa Matola ga Mabumunda ganga kujege amila na Matola gu Kuhusa na Matola gi indamba. Mwiijenda palongi jaka Bambu Sapanga maboku matopu. 17 Boti biipiya kulengana Bambu Sapanga, Sapanga winu ejumpengi kuba na hindu."

18 "Mwaahagula bandu bukutemu na akakilongosi kuhuma mu makabila ginu mu misi jinu jejuje Bambu Sapanga, Sapanga winu, jampekia na bombi baatemula bandu sanga kupendalela. 19 Mwanhenga mundu jukosa sindu sejupalika kupata, mwiipendale wala mwiijetake kujopa hongu, kwa ndaba hongu jihenga bandu baabi na malangu biiwesa kutemu ngati ekupalika isoli magambu ga bandu baamboni. 20 Mwaatemula bandu ngati ekupalika, ili mwiiwesa kutama nu kugujuku nndema gubiya winu gojumpeke Bambu Sapanga, Sapanga winu."

21 "Mwiijemeka nkongu wokapi kuba lupendi lwi isapanga yi isoli Ashela pambipi na mesa ju kupiki litambiku jemwansengila Bambu Sapanga, Sapanga winu. 22 Wala mwiijemeka lupendi lwi kisapanga sengi lolulwe Bambu Sapanga, Sapanga waku jitenda kulusuki."