1 Musa jaendaliya kupwaaga, "Ana anamunzoane Bambu Sapanga, Sapanga winu nukukamu mihilu jenunndagalaki lelenu, jombi jwanhenga mmbiya mwaakolongu kupeta bandu bi milema jengi joti punndema. 2 Ana munzoani Bambu Sapanga, Sapanga winu mwiipata mbengee yenze.

3 "Misi jii na matui ginu giitenda kupengewa.

4 "Bambu Sapanga jaampengila ili mpata ibeleku inge ni ilebi ingi na ng'ombi ingi na makondoo gingipe.

5 "Ilebi inu na yombi inu yenhandali posu itenda kupengewa. 6 Bambu Sapanga mwiipengiliwa kwa kila sindu senhenga. 7 Ana abaja bii biitenda kunndapu, Bambu Sapanga jwampekia uwesu wakwaawesa bombi. Ana ahikiki kunntukali kupete indela jimu baatilila kupete indela saba. 8 Bambu Sapanga jampengaliya lihengu lii nu kutwelake mu ikoku yii yiilebi na mu mahengu gii goha. Jwampengila mu nndema gojumpeke.

9 "Bambu Sapanga jwanhenga mmbiya mwabandu baki mweni ngati ejunndagalakiya, ana mugajetaki nu kukamu mihilu jaki Bambu Sapanga, Sapanga wino nukupwata indela yaki. 10 Bandu bi milema joti punndema ana biibona mwanganya nkemwa ili mmbiya mwabandu baki mweni Bambu Sapanga giitenda kunzogopa. 11 Bambu Sapanga jwampekia bana bingi ni inyama hingi ni ilebi hingi mu matui mu nndema yejaalagila akakilongosi binu kubanga jwiitenda kumpeke, 12 Bambu Sapanga jakunila mwanganya iyula kuhuma kunani kwa maundi kwaka Sapanga mu nndema kwa masoba gaki nu kumpenge mu mahengu gii. Mwaakopisa bandu bingi lakini mwanganya ngamwiikope. 13 Bambu Sapanga, Sapanga wii jwanhenga mmbiya mwabandu bapanani na nga bandu bapai. Mwiiendalia kulongi na nga kukelabuka munnyuma ana nkamwi malagalaki gaki ganumpeke lelenu nu kugahenga. 14 Mwiikotoka kukamu mihilu jangu joti jenugupeki lelenu, sukujenda kumalele au kwa mangega kujipwata isapanga yengi nukujitumaki.

15 "Lakini ananga kunzetake Bambu Sapanga, Sapanga winu au ana ngankubi miu kuhenga malagalaki gaki goha ni miilu jaki jenunndagalaki lelenu, ndienu mwiipata yaambamba yoti yenze. 16 Bambu Sapanga jwanndigila mbamba pamwibiya ku misi jii na pamwibiya mu matui ginu. 17 Bambu Sapanga jwailigila mbamba ilebi inu na posu jinu. 18 Bambu Sapanga jiitenda kunndigi mbamba mpata bana asokopi ni mipugu yii yiipata yaambamba ili yiijonzukeka. 19 Mwiipata yaambamba kila sindu senhenga.

20 "Ana nhengiki majambu giliya nukukana Bambu Sapanga jwanndetila mang'aliku mwiitenda kusanganyikiwa mwisindwa kuhenga mahengu ginu. 21 Jandetila magonzu mabaja mbaka pamwikuwa mwaboti mu nndema gonzenda kugukamu. 22 Bambu Sapanga jwaguletila magonzu makolongu na maputi na lyotu likali nu ujomu na mang'aliku nu likongobu ndi mwiipata ubini hogu mbaka kuwa. 23 Iyula ngajiikuni nu nndema wiibiya ngati kisomasoma. 24 Badala ji iyula Bambu Sapanga jwiileta kibonga su nsangi nu luombi, yankunila mbaka nkuwa.

25 "Bambu Sapanga jaguhenga bugulapula abaja baku. Mwiipitila kwi indela jimu, lakini mwiitila kwi indela saba. Nanamu mwiibiya sindu sukusukisa kwa bandu wote bupundema. 26 Pamwikuwa mituhi jinu ndi jibiya posu ji ijuni yukunani ni inyama yupundema wala ngajwiikubi mundu jukuibenga. 27 Bambu Sapanga jaandapula sukunhenga mmbiya na maputi ngati ejahenga kwa bandu buku Misili, jwaguhenga gubiya ni ilonda nu maputi gaganyanya gaguge ngamwiiwesi kulama. 28 Bambu Sapanga jwaanhenga mmbiya na mangongu na kabee janhenga mmbiya mwanga kulinga na mwanga kumanya seanhenga. 29 Muhi mwiijenda sukupapa papaa ngati mundu jojusindwa kulinga wala ngamwiiwezi kuhenga mahengu ginu. Kila kipindi bandu banzopa hindu yinu na ngakwiikubi na mundu jukunzangatila.

30 "Mwaasumba akakamwali lakini akanalomi bangi biigonila naku. Anansengiki nyumba bandu bangi biitama homu. Ana mpandiki mizabibu bandu bangi ndi babihusa. 31 Ng'ombi yinu baisinza palongi ja mihu ginu lakini ngamwiihonzi hata kipandi simu si inyama. Maponda ginu bagajukuwa kwa makili palongi ja mihu ginu wala ngabankelubukile. Makondoo ginu baapekia akabaja binu, na ngajikubi mundu jukuwesa kunzangatila. 32 Bana binu akanalomi na akambomba baapiya kwa bandu bangi kuba atumwa koni ndingali kila lisoba mwiitupa mihu kulingali ana atenda kukelabuka, lakini ngamwiikubi na makili gukuhenga sokapi. 33 Bandu bi milema jengi biihika kujuku ilebi yinu yoti yu munndema winu na matunda ginu nanamu banzopa hindu yinu nu kung'aliswa kipindi soti. 34 Mwiikuba na mangongu kwa ndaba ja majambu haga gamwagabona kwa mihu ginu mwabeti. 35 Bambu Sapanga jagalapula magoti ginu na magolu ginu kwa maputi gagabi nu ubini nkali gaguge ngagiwesi kulamika, gijagania kutumbuli mu yaju yu magolu ginu mbaka pulutoto."

36 "Bambu Sapanga jampelika mwanganya na bambu nkolongu winu jomwalisagulia, mbaka ku nndema wa bandu babube mwanganya ngase mwaamanyike wala akahoku binu. Hoku mwaitumakia isapanga yengi yi mikongu na malibu. 37 Mwiibiya mwabandu banga kupalika na bandu, na mwiibiya mwempowa lihamu na mwiibiya sindu sukusangasa pikilanda ja bandu boti bunndema goguwe Bambu Sapanga jitenda kumpeleka. 38 Mwanganya mwiipanda imbeju lakini mwiihusa kidogu pena kwa ndaba halwa ikula ilebi yinu. 39 Mwiipanda mizabibu nukujitunza, lakini ngamwiitongo mizabibu heji wala kunywa divai jaki, kwa ndaba hindu yiitenda kula. 40 Mwiikuba ni mizeituni pandu poti pu nndema winu, lakini ngamwiikubi na mahuta gukupakii, kwa ndaba zeituni heyi yitenda kupolota. 41 Mwiipapa bana akanalomi na bana akambomba, lakini ngabiikubi bino, biijukuliwa nukujenda pandu pangi ngati atumwa. 42 Matunda ginu goti ni ilebi yinu yoti mu migonda jinu giikula na halwa.

43 "Ageni baatama mu nndema winu biihendalia kupata makili koni mwanganya nhendalee kukosa makili. 44 Bombi ndi bankopisa mwanganya, lakini mwanganya ngamwiikubi nu uwesu ukwakopesa. Bombi biibiya kimutu na mwanganya mwiibiya nkela.

45 "Haga goti gampata mwanganya mbaka pabankoma kwa ndaba ngase mwijijetaki sauti jaka Bambu Sapanga, Sapanga winu kupete kugakamu malagalaki gaki ni mihilu jaki jejumpekia. 46 Haga gibiya galangi Bambu Sapanga juyomi ngamaa mwanganya ni ibeleku hinu nanamu mwagamanya haga masoba gi goa.

47 "Bambu Sapanga, Sapanga winu, jumpengi mu kila sindu, lakini mwanganya ngasemutumaki kwa mwoju wii woti sukutogule. 48 Ndienu mwaatumakiya akabaja binu babube Bambu Sapanga jwaaleta kwinu. Mwiibiya ni inzala na nywita na mwiibiya heu nu kujomukane kila sindu. Akabaja binu baahenga nhenga mahengu makolongu mbaka pamwiikuwa."

49 "Bambu Sapanga jaaleta bandu banga Ayaudi kuhuma kutali ili luntukalia kanyata ngati kijuni sebikikema tai, bandu behaba ngasemwijimanyi luga jabu. 50 Bandu behaba pamiu jabu pibiya pabepiki ngamaa na ngabaabonee ikia akaseja wala akakombu, 51 biikula mipugu jinu ni ilebi yii mbaka pabankoma. Ngabandeke ilebi wala divai wala mahuta wala ng'ombi au likondoo na mwiing'alika ni inzala mbaka kuwa. 52 Bandu haba biilapula kila musi mu nndema winu ni mimatu jii milasu jemujihobale jiitenda kubomboka. Kila pandu mu nndema winu goguwe Bambu Sapanga, Sapanga winu, jatenda kumpekea. 53 Kipindi abaja binu pabibiya ayongalwiti mu misi jinu mwibiya ni inzala ngani mbaka mwaakula bana binu, bana babube Bambu Sapanga, Sapanga winu jumpekia. 54 Hata mundu jwanga na puju jokapi joankoiki sapi janzima posu nndongu waki, nhwanu waki joampala ngani na mwanamundu jojuhigali, 55 wala ngajambaguli hata jumwa wabu inyama ja bana baki bajwaakula. Ngamwiihigali na sindu sokapi sela kipindi sukuyongolotwa hesi sukumpengalela nu kupata mang'aliku kuhuma kwaka abaja binu mu misi jinu joti. 56 Hata mmbomba jojubii ni isima ngani joankoiki samboni na jojunyambiki jojuwe lwaju lwaki ngaseluwaiki kukanyati luhombi, najombi jwiihenga ahelahe. Kipindi hesi sukuyongolota siibiya ni inzala ngani, 57 hata jwankula mwana waki nkeki ni lipyanda sanga hata nndomi waki kumanya wala jumu kati ja bana baki kumanya."

58 "Ana ngasenhangali kuhenga malobi goti gi mihilu jenze jejiandikwi mu kitabu senze na ngase muhengi isima nu kulilumbali lihina lelijogopesa laka Bambu Sapanga, Sapanga winu, 59 hela ndi Bambu Sapanga jwandetila mwanganya ni ibeleku yinu mang'aliku ganga kuyobaleka, mang'aliku makali ganga kuwesa kulama. 60 Jwanndetila kabee magonzu gamugajogupa emwabii kundema uku Misili, nagombi gankelabukia kambelikambeli. 61 Jwandetila magonzu ga kila namuna na mang'aliku gangi gaguge ngasejugalogwi mu kitabu senze su mihilu na mwiitenda kuwa. 62 Mwanganya mwembii mwa bingi ngati ndondu yukunani mwiihigalia mwaasikipi pena, ndaba ngasempai kunzetake Bambu Sapanga, Sapanga winu. 63 Ngati Bambu Sapanga ekundengani majambu ginu gunzendila sapi mwanganya mbiyaa mwabingi, ahelahe Bambu Sapanga ejupala kundete mabaja nukunkoma. Nanamu jwammboa mu nndema hogu goguwe nzenda kutama. 64 Bambu Sapanga jwampesangana mu milema ja bandu bangi joti, kuhumi upandi gumwa gu nndema mbaka upandi gongi na hoku mwaitumakia isapanga yengi yi mikongu na malibu yeyuye mwanganya wala akahoku binu ngaseawaiki kuimanya. 65 Mu milema heji ngamwiwesi kutogule wala ngamwiikubi na pandu pakupakema panyumba ila Bambu Sapanga janhenga nhola hola mu mioju jinu, na mihu ginu gitenda kususuka na mwiikuba nu kuhangajika mmwoju."

66 "Mwiitama sukujogopa muwi ni ikilu mwiibiya mwabandu bukujogopa na ngamwiikubi na womi. 67 K wa ndaba jukuhola kokwitwelala mmwoju winu na hindu yela yeyuye miu gaku gatei kwiibona. Pulukela mwiipwaga, ‘Mbanga kukabii pakamii,’ pakamii pakwihika mwiipwaga, ‘Mbanga kukabii pulukela,’ 68 Bambu Sapanga jwankelubua mu nndema uku Misili kwa meli, konunndagila kubanga ngamwikelabuki hoku kabee. Hoku mwiilenga kulilombesa kwa abaja binu ili mbiya mwaatumwa, lakini ngamundu joandombaje."