1 "Mwanganya ndi mwabana baka Bambu Sapanga, Sapanga winu, mwalilembe wala kumoga lupanza kwa ndaba ja mundu jojuwii. 2 Mwanganya ndi mwabandu ba Sapi kuka Bambu Sapanga, Sapanga winu, Bambu Sapanga junhagwii ili mbia mwa bandu baki, kati ja bandu boti ba atama pu nndema."

3 "Mwiikula sindu sesuse Sapanga jukaniki mwiikula. 4 Nhwesa kula inyama aye ng'ombi na makondoo ni imbui, 5 mbalapi na swala na holoku ngolongu na holoku huu ni kinyama sebikikema pofu na mbonzu ni imbui yu mwiitombi, 6 na kila kinyama sekibaganiki kwatu yaki mala pa beli na sekibaku, hesi nhwesa kula. 7 Lakini mwiikula kinyama sokapi sesuse kwatu yaki ngaseibaganiki pandu pabeli na ngasekibakula, mwiikula kinyama sebikikema ngamia wala kipesa wala lingusila, hata ngati itenda kubakula lakini ngase ibaganiki kwatu yaki pandu pabele, ndaba hei yanhenga mwiijetakalewa palongi jaka Sapanga. 8 Kabee mwiikula ligolobi hata ngati kwatu yaki ibaganiki pandu pabeli, lakini ngase libakula hei yanhenga mwiijetakewa palongi jaka Sapanga, mwiikula inyama yabu wala kugusa mituhi jabu."

9 Nhwesa kula kila aina ja homba yeibi ni mipeepe na magamba. 10 Lakini sindu sokapi sekitama mu masi sanga ni mipeepe wala magamba mwiikula, ndaba hei yanhenga mwijetakewa palongi jaka Sapanga.

11 "Nhwesa kula kila aina ji ijuni yeijetakewa kula. 12 Lakini mwiikula ijuni aye Limbanga likolongu ni kijuni sebikikema kipungu, 13 ijuni yebiikema kengewa na kozi na mambanga goti kwa aina jabu, 14 makongoo goti kwi mitindu jaki, 15 mbuni ni kihomba nandela ni kipanga kwa aina jabu, 16 litungutu lisoku ni litungutu likolongu, 17 ijuni yebiikema mwali na ndeli na mnandi, 18 ijuni yeibii ni milomu milasu yebiikema membe na koikoi kwa aina yaki na hudihudi na sanima. 19 Na hindu yoti isokuisoku yeibii na mapapati yeihomba kwa makundi yanga kujetakeka kwaka Bambu Sapanga mwanganya mwiikula. 20 Nhwesa kula iumbi yoti yeibi na mapapati yeijetakewa kwaka Sapanga. 21 Mwiikula kinyama sokapi sekiwii seni, nhwesa kumpeke nngeni jojutama mu misi jinu jukula, au nhwesa kundombase mundu ju nndema gongi, ndaba mwanganya ndi mwa Sapi kwaka Sapanga, na Bambu Sapanga ndi Sapanga winu."

Mwiiteleka katoli ki imbui mu masiba ga anyongo.

22 Mwiipia pandu pamu kati ja komi pi ilebi yii yoti yumu migonda kila saka. 23 Kabee mwiijenda pandu papupe Bambu Sapanga, Sapanga winu jupahagwi kwilibeka liina laki, na pamwiibiya palongi jaki mwiikula matambiku ga pandu pa komi pi ilebi yinu, na ya divai yinu na yamahuta, na yiinyama yukutumbuli ya ng'ombi na makondoo ginu, nhenga hela ili mwilibola kuntende isimu Bambu Sapanga, Sapanga winu kambelikambeli. 24 Ngati ana pandu hapu pajuhagwi Bambu Sapanga, Sapanga winu, pandu pajupasagwi pabii kutali ngani nu kunyumba jinu, nanamu ngasenhwesa kutoto pandu pakomi ji ilebi yinu yeyuye Bambu Sapanga jutei kumpenge ndienu mwiihenga ana, 25 "Ndombisa ilebi yinu nukuitoto hela heyi mbaka pandu Bambu Sapanga, Sapanga winu, pajupasagwi, 26 Mwaihengila hela hiyi sindu sokapi semwiipala, inyama ja ng'ombi na jilikondoo, divai au sindu sakunywa sekibaba, mwiikula nukuhekale palongi jaka Bambu Sapanga, Sapanga winu, pamu na akalongu binu. 27 Mwaajewa bandu Alawi baatama pikilanda jinu, ndaba ngasebaapeke pandu pukutama wala pandu pukulisi pikilanda jino. 28 Kila mwisu wa saka sa tatu mwiipiya pandu pa komi yi ilebi yinu yoti nukuibeka mwiikoku mu misi jinu. 29 Heyi yibiya kwa ndaba ja bandu Alawi, ndaba ngaseabii ni lipungu wala kunndeke hindu yaki mweni pikilanda jinu, ageni na akeba na ambabi baatama mu misi jino, biihikania kula nukutupi. Mwiihenga hela na Bambu Sapanga, Sapanga winu, jumpengila mu mahengu ginu gowa ganhenga kwa maboku ginu."