1 Bambu Sapanga ampwagila Musa, 2 "Gwapwagil Aizalaeli ana, ‘Mmbomba anajupatiki kitumbu, nukupapa mwana mwanalomi, hoju ngasejujetakeka kunndumbali Sapanga kwa masoba saba ngati hejukuba jwangakujetakeka kunndumbali Sapanga kipindi ejukuba mu masoba gaki gamwei. 3 Mwana hoju jupalika kunseku jandu mu lisoba la nani. 4 Ndienu nyongo mwana jwiendalia kuba ngasejujetakeka kunndumbali Sapanga kwa masoba selasini na tatu. Kipindi hesi, jwigusa sindu sokapi hata kulenga sebikibehi palongi jaka Sapanga wala kujingi pandu pa sapi mbaka masoba gukunyambisika kwaki pagitimia. 5 Lakini ana jupapiki mwana mmbomba, enu, jwikuba ngase jujetakeka kunndumbali Sapanga kwa majuma mabeli ngati ejukuba mmasoba gaki mwei. Jwiitama masoba sitini na sita koni juendale kunyambisika.’"

6 "Masoba gukunyambisika kwaki pagitimia, jukubi jupatiki mwana mwanalomi au mmbomba, andetila mwana likondoo la saka simu nngolu waka Sapanga pilitanga lukuketangane ndaba ji litambiku lukutini na bampiikia Bambu Sapanga inzeba au ngunda, ndaba ji litambiku lukuboa mahakau. 7 Nngolu waka Sapanga jwaipikia palongi jaka Bambu Sapanga nukunhenga nyongo jujetakeka palongi jaka Bambu Sapanga. Ndienu mmbomba we hoju jwibia jujetakeka kunndumbali Sapanga kuhuma mu masoba gaki. Hela ndi hekwiibia kwaka mbomba jojupapa mwana mmbomba au mwanalomi.

8 "Ana mmbomba hoju ngasejuwesa kupia mwanalikondoo, enu, jwiileta inzeba ibeli au ngunda ibeli, jimu ndaba ji litambiku lukutini na jengi ndaba jili tambiku lukutinii ndaba jukuboke mahakau. Nngolu waka Sapanga ammbokia mahakau nu mmbomba we hoju jwijetakeka kabee kunndumbali Sapanga."