1 Bambu Sapanga ampwagila Musa, 2 "Waapwagila Aizilaeli ana, ‘Mundu jokapi pikilanda ja Aizilaeli au ngeni jojutama na mwanganya, anaampiiki mwanamundu antumakiya kisapanga Moleki ndi kwiipalika mundu hoju jukomika. Bandu ba hapa ankoma sukundapu malibu mbaka jukuwa. 3 Nepani Bambu Sapanga nankana mundu hoju nukuntenga kutali na bandu baki, kwa ndaba jumpiiki mwana waki litambiku kwi kisapanga Moleki na hela kupahenga pandu pangu kuba panga kujetakeka nu kulihenge lijetakeka lihina langu. 4 Ana bandu ba pandu hapa ngabandapu mundu hoju sukunkoma, 5 nepani nankana mundu hoju na akalongu baki. Nanepani naantenga kutali na bandu boti basindwa kunhobale nepani, ndaba jukijende kisapanga Moleki.’"

6 "Ana mundu jokapi jwaajende baalondo sukutumii mahoka na ahabi nu kusindwa kunhobale nepani, nankana mundu hoju nukuntenga kutali na bandu baki. 7 Enu mmbiya mwa sapi ndaba nepani ndi Bambu Sapanga, Sapanga winu. 8 Nkamula mihilu jangu nukujipwata. Nepani ndi Bambu Sapanga nenusapisa. 9 Mundu jokapi jojaaligila mbamba atati baki au amabu baki, ndi kwiipalika jukomika. Hoju jwipalika kupata azabu kwa ndaba jakwaaligi mbamba atati baki au amabu baki, ndienu kuwa kwaki kwiibiya mu maboku gaki mweni."

10 "Ana mwanalomi jutei ugoni nu nhwanu ukunzilani waki, ndi kwiipalika boti abeli haba kwaakoma. 11 Mwanalomi anajugoni nu nhwanu wa atati baki, hoju jaampoa liamu atati baki, boti abeli ndi kwiipalika kwaakoma. Kuwa kuku mmbomba hoju na mwanalomi hoju kwiibiya bukupai beni. 12 Mwanalomi jokapi anajugoni nunhanu waka mwanamundu, boti abeli ndi kwiipalika kwaakoma. Haba ahengiki lijambu liliya ngamaa, kuwa kwabu kwiibiya bukupai beni. 13 Ana mwanalomi jugoni na mwanalomi nnzaki ngati ejugone nu mmbomba, boti abeli akomika ndaba ahengiki sindu siliya ngamaa. Ndienu kwiipalika akomika na kuwa kwabu kwiibiya bukupai beni. 14 Ana mwanalomi jijukua kamwali pamu na amabu baki, hesi ndi kihakua, boti atatu ndi kwiipalika kwaatini pa mwotu, mwaahengila hela ili kwiipiti kabee sindu siliya nkati jinu. 15 Ana mwanalomi jokapi jugoni ni kinyama ngati ejugone nu mmbomba, ndi kwiipalika mwanalomi hoju ni kinyama hesi yoti ikomika. 16 Ana mmbomba jikihegali kinyama nukugone naku ngati ejugone na mwanalomi ndi kwiipalika mmbomba hoju kunkoma ni kinyama hesi kabee, mwai wabu wiikuba kwa ndaba jabu beni.

17 "Ana mwanalomi jokapi anzukwi ndombu waki, kamwali jwa atati baki au amabu baki, na kamwali hoju jujetangani na mwanalomi hoju jojuwe ndi nndombu waki nukugone naku, heyi ibiya iyoni ndi kwiipalika kwabenge kutali na bandu ba umuli wabu ndaba jugoni nu ndombu waki. Ndi kwiipalika mwanalomi hoju jung'alika kupete kihakau sejuhengiki hesi. 18 Ana mwanalomi jugoni nu mmbomba jojubii mu masoba gaki, boti abeli ndi kwiipalika kwaabeka kutali na bandu babu, ndaba mwanalomi hoju julangi yeu jaki nu mmbomba hoju julangi mwai waki hegupita. Boti abeli haba akaniki kupwata malagalaki gaka Sapanga. 19 Wiigone na amabu baku akolongu na asoku wala anihenga baku ndaba haba alongu baku bapambipi. Boti baahenga hela biing'alika ndaba ji kihakau seahengiki. 20 Ana mundu jugoni nunhwanu wa atati baki akolongu au asoku, jwaapoa liamu atati baki akolongu au asoku boti abeli biing'alika ku kihakau seahengiki, boti abeli bikuwa nganabana. 21 Ana mwanalomi anaanzukwi nhwanu waka nndongu waki, hoju ampoa liamu ndongu waki, hoku ngasekujetakeka palongi jaka Bambu Sapanga, boti abeli bikuwa sanga bana.

22 "Mpalika kupwata malagalaki gangu ni mihilu jangu joti anangahela nndema gonampelika gwitenda kunkana. 23 Nkotuka kutama ngati heatama bandu ba ndema jemujijende banaabenga palongi jinu, ndaba ahengiki majambu haga goti, nanepani gatei kunzukisa ngamaa. 24 Lakini numpwagi mbanganya, ‘Mwagulisa nndema wabu, gonumpeke ntama, nndema gogubii nu luhombi logulengane kulema nu kupugi.’ Nepani ndi Bambu Sapanga wino nenummbekiki kutali na bandu bu nndema gongi. 25 Enu, mpalika kumanya kati ji kinyama sanga kuleleka na sekileleka ni kijuni se kileleka na sanga kuleleka. Nkotuka kulihenga kuba mwangakujetakeka kunumbali nepani Bambu Sapanga sukugusa kinyama au kijuni au sokapi sekikwaba panani ju nndema sesuse nikibei kutali ili kiijetakeka palongi jangu nepani Bambu Sapanga. 26 Kwa ndaba nepani Bambu Sapanga ndi nunsapi, nanepani numbei kutali mwanganya na bandu bangu ili nkuba mwabandu bangu, mwiibiya mwa sapi.

27 "Mwanalomi jokapi au mmbomba jokapi jojulondoo au nhabi, ndi kwiipalika kwaakoma sakwaalapu malibu. Kuwa kwabu kwiibiya ndaba jabu beni."