1 Bambu Sapanga ampwagila Musa, 2 "Wapwagila Aizilaeli ana, ‘Mu matola gangu nepani ganaagwi mwiiketangana kunnumbali nepani Bambu Sapanga. Ganga ndi matola gangu. 3 Mwiibiya na masoba sita gukuhenga lihengu. Lakini lisoba la saba ndi Lisoba Lukupomulela, lisoba heli mwiihengi lihengu lokapi na mwiketangana kunnumbali nepani Bambu Sapanga. Lisoba la saba heli nga mwiihengi lihengu lokapi, heli ndi lisoba lukupomule libii ndaba jukunumbali nepani Bambu Sapangu pandu pokapi pantama. 4 Matola gangi gangu nepani Bambu Sapanga, mwiibiya nketangana nu kunumbali nepani Bambu Sapanga.’"

5 Pakamii ji lisoba la komi nu nsesi ja mwei ukutumbuli mwiihenga matola ga Pasaka ili kunhenge isima nepani Bambu Sapanga. 6 Lisoba la komi nu nhwanu la mwei gogo, libiya lisoba langu nepani Bambu Sapanga la matola ga mabumunda ganga kujege amila jitumbulia. Kwa masoba saba mwiikula mabumunda ganga kujege amila. 7 Mu lisoba lukutumbuli mwiketangana kunumbali nepani Bambu Sapanga. Lisoba heli mwiihenga lihengu. 8 Kwa masoba saba haga goti kila lisoba mwiimbikia nepani Bambu Sapanga matambiku gukutini. Mu lisoba la saba mwiiketangana kunumbali nepani Bambu Sapanga mwiihenga lihengu.

9 Ndienu, Bambu Sapanga ampwagila Musa, 10 "Waapwagila kabee Aizalaeli ana, ‘Pamwiijingala mu ndema gonumpeki na pamwiihusa ilebi yeibii homu, mwampelakiya nngolu waka Sapanga likenda limu si ilebi yukutumbuli. 11 Lisoba palijomuka nngolu waka Sapanga jwiitondabia kunani ngati nginyuli yukumbiiki nepani Bambu Sapanga Lisoba Lukupomulela ili nhwesa kujetakalewa. 12 Lisoba heli pamwihenga nginyuli yukupia kindengu si ilebi hesi palongi jangu mwiimbikia nepani Bambu Sapanga litambiku lukutini lipongu la mwanalikondoo la saka simu langa ni kilema sokapi. 13 Kabee mwiimbiki kilu ibeli yu uwembi gogupoliki sapi gouhangangini na mahuta gi mizeituni mwiimbikia nepani Bambu Sapanga sukutinii kwa mwotu nu kunungi kwaki kwa sapi kwinenganinya nepani Bambu Sapanga. Ndienu mwiimbikia litambiku la sindu sa kunywa lita jimu ja divai. 14 Mwiikotuka kula mabumunda ginu gi inganu wala inganu yeakalingi wala inganu yanga kukoma mbaka pamwiinetila nepani Bambu Sapanga. Hogu ndi nhilu gukupwata masoba goa ganga na mwisu mwiibeleku yii pandu pokapi pamwitama.’"

15 Mwiibalanga majuma saba tumbuka Lisoba Lukupomule, lisoba lelipwata mwiileta kindengu si ilebi ya matambiku yukumbiiki nepani Bambu Sapanga. 16 Mu lisoba la amusini, lisoba la pili li Lisoba Lukupomulela mwiimbikia nepani Bambu Sapanga litambiku lu uwembi nnyai. 17 Kila bandu biileta mabumunda gabeli gi litambiku ili jutondabia kunani kulangi nginyuli jukumbiki nepani Bambu Sapanga. Kila libumunda ndi mwiijosa kwa kilu ibeli kuhuma mu uwembi gogupoliki sapi na goajegi amila, hogu mwiimbikia nepani Bambu Sapanga kuba ndi matambiku gi gukutumbuli. 18 Pamwiimbikia mabana gi likondoo saba ga saka simu na katoli kamu ka ng'ombi na makondoo gabeli mapongu. Inyama heyi yiibiya matambiku gukutinii pamu na matambiku gi ilebi na matambiku ga divai. Kunungali kwa matambiku haga kwiinengania nepani Bambu Sapanga. 19 Ahelahe mwiipiya lipongu limu li imbui kuba litambiku lukuboa mahakau na mabana ga makondoo mapongu mabeli ga makondoo ya saka simu gabiya kwa ndaba ja matambiku gu lukwali. 20 Nngolu waka Sapanga jiitondabia kunani nukunyuanyua makondoo mabeli gala kulangi mmbiki nepani Bambu Sapanga pamu na mabumunda mabeli gukutumbuli na yana ya makondoo mabeli gala. Matambiku haga ndi ga sapi ngamaa kwangu nepani Bambu Sapanga na hei biikula agolu baka Sapanga pena. 21 Lisoba heli mwiihenga lihengu lokapi ila mwiiketangana kunnumbali nepani Bambu Sapanga. Ibeleku hinu ikamula nhilu gongo masoba goti ganga na mwisu pamwitama.

22 Egwihusa ilebi yaku mu nngonda, wiihusaki mbaka mu mpaka gu ngonda waku wala wiikelabuki mu nyuma kuholo posu yewiijewiki. Posu ye heyi waalekila banga na sindu na ageni. Nepani ndi Bambu Sapanga, Sapanga waku.

23 Ndienu, Bambu Sapanga ampwagila Musa, 24 "Waapwagila Aizilaeli ana, lisoba lukutumbuli la mwei wa saba ndi mwiibiya ni Lisoba Lukupomule lelihaguliwi, lisoba lemwalikombuka kukujemba imbata, nanamu mwiiketangana kunumbali nepani Bambu Sapanga mwi lisoba heli. 25 Mwiihenga lihengu lokapi lisoba heli na ndi kwiipalika mmbikia nepani Bambu Sapanga litambiku lu kutinii pa mwotu."

26 Bambu Sapanga ampwagila Musa, 27 "Lisoba la komi la mwei wa saba heli ndi lisoba lukujongana. Lisoba heli mwiiketangana kunumbali nepani Bambu Sapanga. Mwiikotuka kula posu nukupiya litambiku leapia kwaka Bambu Sapanga pa mwotu. 28 Mwiikotuka kuhenga mahengu lisoba heli. Lisoba heli ndi lisoba luku jongana, lisoba lukuhenga nzongana palongi jaka Bambu Sapanga, Sapanga winu. 29 Mundu jokapi jojiisindwa kupunga lisoba heli ndi kwiipalika kuntenga kutali na bandu baki. 30 Mundu jokapi jojihenga lihengu lokapi lisoba heli jikonkoma. 31 Mwiihenga lihengu lokapi. Nkamula nhilu gongo masoba goti ganga na mwisu mu lukolu lwinu na momwiitama mwoti. 32 Lisoba heli mwanganya mwiitenda kupomule nu kupunga. Lisoba heli litumbulia pakamii ndi lisoba la tisa la mwei hogu na lijomuka mbaka pakamii lisoba lelipwata, mwalikamula Lisoba li Lukupomule."

33 Bambu Sapanga ampwagila Musa, 34 "Waapwagila Aizilaeli ana, ‘Tumbuka lisoba la komi nu nhwanu la mwei wa saba hogu mwinhengila matola gi indaba nepani Bambu Sapanga na mwiihenga kwa masoba saba. Haga ndi matola gukuhenge isima Bambu Sapanga. 35 Lisoba lukutumbuli la masoba saba haga, bandu aketangana kunumbali nepani Bambu Sapanga na mwiikotuka kuhenga lihengu lokapi. 36 Kila lisoba mu masoba saba haga mwiimbikia matambiku gukutinii nepani Bambu Sapanga. Lisoba la nani mwiketangana pamu kabee kunumbali nepani Bambu Sapanga. Enketangana kunumbali mwikotuka kuhenga lihengu mu lisoba heli.’"

37 "Haga ndi matola ganagalaki nepani Bambu Sapanga ganhagwi nepani, nanamu mwiiketangana kunumbali nepani Bambu Sapanga, nabombi bimbikia matambiku gukutinii nukumbiki matambiku ga divai na matambiku gi ilebi, kila jumu mu lisoba laki lelihaguliwi. 38 Matambiku haga ndi pamu na gala gammbiiki nepani Bambu Sapanga ndi matambiku gukujonzuke gammbiki mu Lisoba lu kupomulela na matambiku gampia masoba goti na matambiku gukujoinzuke kati ja matambiku gangi gammbikia gukulagani na Bambu Sapanga na matambiku gaampia sukupala mwabeti nepani Bambu Sapanga. 39 Enu panzomule kuhusa mu matui ginu nhenga matola gi lisoba la komi nu nhwanu la mwei wa saba, lisoba lu utumbuli libiya lukupomulela kabee na hata lisoba la nani. 40 Mu lisoba lu kutumbuli mwiitongula matunda gi mikongu jinu jaamboni na mambandi gi mikongu jebijikema mitendi na mambandi gagabi mutengu na mambandi gimikongu jejimela mulutengu ju ndosi, nanamu mwiihenga matola haga kwa masoba saba palongi jangu nepani Bambu Sapanga, Sapanga winu. 41 Kila saka ndi kwiipalika nhengila nepani Bambu Sapanga matola haga kwa masoba saba ili kuntende isima nepani Bambu Sapanga. Gonga ndi malagalaki gukukamu masoba goti ganga na mwisu mwiibeleku yinu. Mwiihenga matola gehaga mu mwei wa saba. 42 Kwa masoba saba mwiitama mwi indamba. Bandu boti Aizilaeli biitama mwiindamba mu masoba haga. 43 Ili ibeleku yinu imanya kubanga nepani naapiiki akahoku bino mu ndema uku Misili naahenga atama mwi indamba. Nepani ndi Bambu Sapanga, Sapanga winu." 44 Musa jwaatangasia Aizilaeli matola haga gagahaguliwi na Bambu Sapanga.