1 Bambu Sapanga ampwagila Musa, 2 "Wapwagila Aizalaeli ana, ‘Nepani ndi na Bambu Sapanga, 3 mwihenga ngati eahenga bandu bu nndema uku Misili kontamika wala mwihenga ngati eahenga bandu bu nndema wa Kanani konumpeleka. Mwaajiga kuhenga haga. 4 Mpwata malagalaki ni mihilu jangu. Nepani ndi Bambu Sapanga, Sapanga winu. 5 Henu mwipwata malagalaki ni mihilu jangu jenunndagalaki, ndaba mundu jojipwata jwitama kwa haga. Nepani ndi Bambu Sapanga.’"

6 "Mundu jokapi juku Izilaeli anhegale ndongu waki ili kugone naku. Nepani ndi Bambu Sapanga nenagalaki hela. 7 Gwaapoa lihamu atati baku sukugone na ahanamundu ndaba haba amabu baku babugupapiki. 8 Gwiigone na jumu kati ja akahanu ba atati baku ndaba wibiya wapoiki lihamu atati baku. Haba ndi akamabu baku. 9 Gwiigone nu nndombu waku, jukubi jwikinyongo simu au jwi kinyongo sengi. 10 Gwiigone nu nsokoo waku, jukubi waka mwana waku mwanalomi au mmbomba sukuhenga hela walipoa lihamu wamweti. 11 Gwiigone nu nndombu waku jojusaliwi kwa amabu bakambu baatoguliki na atati baku, kamwali hoju ndi nndombu waku. 12 Gwiigone na anihenga baku, ndaba hoju nndombu wa atati baku bi kinyongoo simu. 13 Gwiigone nu nndombu wa amabaku, ndaba haba ndi amabu baku akolongu bi kinyongo simu. 14 Gwiigone nu nhanu wa atati baku akolongu au asoku, haba ndi amabako. 15 Gwiigone nu nhanu waka mwana waku, ndaba hoju ndi mwikinimwana waku. Gwiigone naku hata kulenga. 16 Gwiigone nu nhanu uku mmbeli waku au nnuna waku, ndaba haba ndi alamu bako, waampoa lihamu nndongu waku. 17 Ana gugoni nu mbomba, ndienu nhuli kugone na kamwali waki au asokoo baki. Ndaba baniaba aka kilongu witenda kihakau ana wahangangini. 18 Nhwanu waku anajakona mwomi, goniogu nhilu kunzukuu dadamundu au nnuna, ana guhengiki hela wahenga akomana.

19 "Gwiigone numbomba jojubii mu masoba gaki. 20 Gwiigone nu nhanu uku nnzaku anaguhengiki hela ngawijetakeki kunndumbali Bambu Sapanga.

21 "Gwampia mwana waku jokapi ku kisapanga sebikikema Moleki kwa ndaba kuhenga hela ndi walitondula liina laka Sapanga waku. Nepani ndi Bambu Sapanga, Sapanga waku.

22 "Gwiigone na mwanalomi nnzaku ngati egugone nu mmbomba. Goniogi nhilu Bambu Sapanga jutenda kusukila. 23 Gwikuba nhilu kwaka mwanalomi au mmbomba kugone ni kinyama ana guhengiki hela wiitenda kuhoba nu kulihenga gubia wanga kujetakeka."

24 "Mwalihenga mwabeti kuba mwanga kujetakeka kunndumbali Bambu Sapanga sukuhenga haga goti, kwa ndaba ja majambu haga naabenga bandu boti baabii palongi jinu ndaba mwiibia mwanga kujetakeka palongi jango. 25 Ndienu bijihenga milema jabu jibiya janga kujetakeka palongi jaka Bambu Sapanga, na nepani Bambu Sapanga naatemula bandu kwa mahakau gabu gaahengiki nu nndema gwabenga bandu baki. 26 Lakini mwanganya na ageni baatama na mwanganya ndi kwiipalika kukamu mihilu na malagalaki gangu wala mwiihenga kihakau hesi. 27 Haga goti ganzukisa nepani Bambu Sapanga gabagahenga bandu baatamika ku Kanaani, buguhenga nndema wijetakeka palongi jangu. 28 Enu, mwanganya, mwalihenga kuba mwanga kujetakeka kunumbali nepani Bambu Sapanga, ananga hela nndema hogu wankana mwanganya ngati egwaakana babunndongulii kutama homu. 29 Bandu boti babiihenga majambu haga gagasukisa kupalika kwaatenga kutali na bandu babu. 30 Nkamula malagalaki gangu, wala mwiipwata majambu goti ganunndagalaki gabahenga bandu boti babalonguli kutama munndema homu kabula ja mwanganya kuhika, mwalihenga kuba mwanga kujetakeka kunndumbali nepani Bambu Sapanga, Sapanga wino."