1 Bambu Sapanga ampwagila Musa, 2 "Unkema Aloni na bana baki akanalomi aketangana palongi ji lihema la sapi, jukua ingobu ya sapi, mahuta gukujakanii, likambaku la ng'ombi ji litambiku lukuboke mahakau, mapongu ga makondoo gabeli ni kitonga sa mabumunda ganga kujege amila. 3 Ndienu waakema bandu boti buku Izilaeli ahika palongi ji litanga li lihema la sapi." 4 Musa jwahenga ngati ejalagalakia Bambu Sapanga, jwaakema bandu boti ahika palongi ji litanga ji lihema la sapi. 5 Musa jaapwagila bandu boti ana, "Ganga ndi gajalagalakiya Bambu Sapanga gahengika." 6 Ndipala, Musa anndeta Aloni na bana baki akanalomi na kwaagolo kwa masi ngati ekupalika kuhenga masoba goti. 7 Ndienu anhwatika Aloni kanzu nukulikonga nkanda ni likoti lilasu, nukunhwatika kizibau nu kunkonga mu kibunu saki ku nkanda goalokiki sapi. 8 Ndienu jwaabeka kipuku pikigamba saka Aloni nu nkati jikipuku sehesi jwaajegala malibu mabeli gabagakema Ulimu na Sumimu gagatumika kulaluki sejupala Sapanga. 9 Ndienu anhwatika Aloni kimbona nu upandi gukulongo gu kimbona sehesi jwaabeka lipambu la zahabu, seketule jebijibekiki ndaba jaka Sapanga, ngati Bambu Sapanga heandagalakiya Musa.

10 Ndienu, Musa jwajukua mahuta ga sapi gukujakanii, jwapakia mahuta mu lihema la sapi lela na hindu yoti yeyabi nkati jaki nukuihenga ijetakika palongi jaka Sapanga. 11 Jwamisila pandu pa mahuta gehaga panani ja pandu pukupiki matambiku mala saba, jwapakia mahuta hindu yaki yoti, nndundu ni kitamiku saki, na yoti jiihenga ijetakika palongi jaka Sapanga. 12 Ahelahe Musa annzakaniya Aloni mahuta pamutu ili kunhimika kwa ndaba ji lihengu laka Sapanga. 13 Ndienu, Musa jwaaleta bana baka Aloni jaawatika kanzu jejilengana ni likoti na kwaakonga mikanda mwiibunu, na kwaakonga kimbona ngati Bambu Sapanga ejalagalakiya.

14 Ndienu, Musa jwaleta ng'ombi ji litambiku lukuboa mahakau, najombi Aloni na bana baki babeka maboku gabu panani ji kimutu si likambaku la ng'ombi leheli. 15 Musa jwasinza ng'ombi jeheji, jajukua mwai usokopi nukupakii kila upandi yoka ya pandu pukupiki litambiku mwi itamiku kulukonzi lwaki nu kwi lisapisa. Ndienu jajukua mwai gowahigalia jwajitala pai kuyongolota pandu paalenganaki ili kupikii litambiku papuje pabahenga pajejatakika palongi jaka Sapanga. 16 Ndienu, Musa jajukua mahuta goti gagabi mu matumbu gaki, pandu pa sapi pi imani pamu na figu yoti ibeli na mahuta gaki nu kutini panani ja pandu pukupiki litambiku. 17 Lakini inyama ja ng'ombi jeheji, ngosi jaki ni imai gaki, jwatinia pa mwotu kunza ji lihema ngati ejalagalakiya Bambu Sapanga. 18 Ndienu, Musa jaleta likondoo lipongu kupia litambiku lukutini. Aloni na bana baki babeka maboku gabu panani ji kimutu si likondoo leheli. 19 Musa jwasinza na mwai gwi likondoo leheli jamisila pandi yoti ya pandu paalenganaki ili kupiiki matambiku. 20 Jwasekulana likondoo heli ipandi ipandi, jwatinia pamu kimutu saki na mahuta gaki. 21 Ndienu, Musa jagolu baka Sapangala matumbu na magolu baka Sapanga gi likondoo heli kwa masi, Musa jwatinia hindu yoti heyi pandu paalenganaki ili kupiiki matambiku pamu ni inyama yengi i likondoo heli ngati matambiku gukutinii. Gaganungi sapi nu kundengane Bambu Sapanga. Musa jwahenga ngati eandagalakia Bambu Sapanga. 22 Ndienu jwaleta likondoo lipongu lengi, ndaba jaka Aloni na bana baki abiya akaagolu baka Sapanga. Aloni na bana baki babeka maboku gabu panani ji kimutu si likondoo leheli. 23 Musa jwasinza likondoo heli, jwajukua mwai gwi likondoo heli nu kumpaki Aloni panani ji likutu laki luku malele nu lukonzi lugumba lu kuboku kwaki ukumalele nu kugolu kwaki kwa malele. 24 Bana baka Aloni na bombi bahika na Musa jwaapakia mwai usokopi mulutengu ja makutu gabu ga malele, lukonzi lugumba lu mu maboku gabu ga malele nu lukonzi lugumba lumu magolu baka Sapanga gabu guku malele. Ndienu Musa jwamisila mwai pandu pukupiki matambiku mu pandi yoti. 25 Ndienu, jwajukua mahuta goti, nkela pamu nu mahuta gaki na mahuta goti gagayekale matumbu na pandu pasapi pi imani, pamu na figu yoti ibeli, mahuta gaki na sema su kugolu kwa malele guku nyuma gi likondoo lipongu heli. 26 Ndienu, mwikitonga sa mabubunda ganga na amila gaabei palongi jaka Bambu Sapanga jwapia libumunda gamu ganga kujege amila, libumunda limu lana mahuta gi mizeituni ni libumunda limu lisoku, jwabeka yoti panani ji ipandi ya mahuta na sema jela. 27 Musa jwiibeka mu maboku gaka Aloni na bana baki, nabombi biitondabia kunani kuba nginyuli yukumpiiki Bambu Sapanga. 28 Ndienu Musa jwajukua hindu heyi yoti kuhuma mu maboku gabu nukuitini panani ja pandu pukupiki matambiku pamu na matambiku gukutinii. Ale ndi litambiku lakwaahimika bandu kwa ndaba ji lihengu laka Sapanga ili abiya akagolu baka Sapanga, lelinungi sapi nukunndengane Bambu Sapanga, heli ndi litambiku leapia sukutinii pa mwotu. 29 Ndienu Musa jwatola kigamba sela nukukitondabe kunani nukukinyuanyua kuba nginyuli jukumpiki Bambu Sapanga. Kigamba hesi si likondoo lebilipiiki kwa ndaba jukwaahimika Aloni pamu na bana baki kuba akagolo, ngati Sapanga eanndagalakiya Musa.

30 Kabee Musa jwajukua mahuta gakwajakani na mwai kuhuma pandu pukupiki matambiku jaamisila Aloni na bana baki na kabee jamisila ingobu yabu. Enu Musa jwaabeka mali gaka Sapanga Aloni na bana baki pamu ni ingobu yabu.

31 Musa ampwagila Aloni na bana baki, "Ntelika inyama jilikondoo hale palongi ji litanga ji lihema lukutengane, nkula pi litanga hapa pamu na mabumunda kuhuma nkati jikitonga sekibi na matambiku gukubeke palongi jaka Sapanga. Nhenga ngati ejalagalakia Bambu Sapanga, inyama heji jiikula Aloni na bana baki. 32 Inyama jokapi au mabumunda gokapi gagihigalia ndi kwipalika kutinii. 33 Ngamwipiti kunza ji litanga li lihema la sapi kwa masoba goti saba, mbaka masoba gukunhimika pagiijomuka. 34 Bambu Sapanga jutulagalaki tuhenga haga ngatu gatuhengiki lelenu ili Bambu Sapanga andekakia mahakau ginu. 35 Mwihigalia pi litanga li lihema la sapi ikilu na muwi kwa masoba saba, koni nhenga majambu gajulagalaki Bambu Sapanga. Ananga kuhenga hela mwiitenda kuwa. Hela ndi hejalagalakiya Bambu Sapanga." 36 Enu, Aloni na bana baki bahenga majambu goti ngati Musa ejwalagalakiwa na Bambu Sapanga.