1 Bambu Sapanga ampwagila Musa, 2 "Gumpwagila Aloni na bana baki na waapwagila bandu boti buku Izilaeli, Bambu Sapanga julagalaki ana. 3 Ana mundu jokapi kati ja Aizilaeli jusinziki ng'ombi au likondoo au imbui nkati au kunza ji likambi, 4 najombi ngasejukiletiki kinyama hesi pi litanga li lihema laka Sapanga ili kumpiki Bambu Sapanga palongi ji lihema laka Sapanga, mundu hoju juhengiki kihakau sukukoma kinyama, najombi kwiipalika kumbeka kutali na bandu baki. 5 Nhilu gongo gwalongusa Aizilaeli apalika kuleta inyama yeyuye kwapalika bakasinzila mu matui ila biileta henu kwangu nepani Bambu Sapanga kukunngolu waka Sapanga pi litanga li lihema laka Sapanga, najwombi jwaisinza nukumpikii Bambu Sapanga libiya ngati litambiku lu kutama ku lukwali. 6 Ndienu, nngolu waka Sapanga jwimisa mwai pandu pukupiki matambiku pangu nepani Bambu Sapanga papabii pi litanga li lihema laka Sapanga nu kutinii mahuta gala ili kunungali nukunengane nepani Bambu Sapanga. 7 Ndienu Aizilaeli biikotuka kupia matambiku gabu kwi ilombu yeilengana ni imbui, hindu yeyahenga asindwa kumbwata nepani Bambu Sapanga. Lilagalaki ale ndi la masoba goti ganga na mwisu mwi ibeleku yi yoti."

8 "Waapwagila kabee ana, mundu jokapi kati ja Aizilaeli au nngeni jojutama na mwanganya, jojupia litambiku lukutinii li kinyama sukuboke mahakau au litambiku, 9 lakini anangajwiileti palongi ji litanga li lihema laka Sapanga ili kumbiki nepani Bambu Sapanga, mundu hoju bantenda kuntenga na bandu baki."

10 "Ana mundu jokapi kati ja bandu buku Izilaeli au nngeni jojutama na mwanganya jwiikula mwai wokapi, nepani Bambu Sapanga nanhyomila mundu hoju nu kuntenga na bandu baki. 11 Ndaba womi wi kiumbi sokapi gubii mu mwai. Nunndagalaki ili kupikii mwai pandu pukupiki litambiku ili kuhenge lihengu lukujonganesa kwa ndaba ja mwoju wino, kwa ndaba mwai gutujonganesa na Sapanga ndaba womi gubii nkati ja mwai." 12 Ndienu, naalagalaki Aizalaeli ana, "Mundu jokapi nkati jino au nngeni jojutama na mwanganya jwiikula mwai hata kulenga."

13 "Mundu jokapi kati ja bandu buku Izilaeli au nngeni jojutama na mwanganya anajupiti kubenga kinyama au kijuni, ndi kwiipalika jusinza nukusembaleke mwai pai nukuyelale luhombi. 14 Ndaba womi wa kila kiumbi kibii mu mwai. Ndi naalagalaki Aizilaeli, biikula mwai wi kiumbi sokapi hata kulenga kwa ndaba womi wi kiumbi sokapi ndi gubii mu mwai waki. Jokapi jojikula mwai mwantenga kutali na bandu baki."

15 "Mundu jokapi jukubi mwenei au nngeni, jojwiikula sokapi sekiwii seni au sebikikomiki ni kinyama sumukinyoi, ndi kwipalika kusapa ingobu yaki nukuoga, najombi ngajijetakeki kunndumbali Bambu Sapanga mbaka pakamii. Ndienu hapa jiwesa kunndumbali Bambu Sapanga. 16 Lakini ana ngasejusapiki ingobu yaki nukuoga, mundu hoju jiipata azabu kulengana na sejuhengiki."