1 Bambu Sapanga japwaaga, "Mwalilenganake imogumogu yokapi yi isapanga, mwiijemeka imogumogu yabu yukubasa wala nnala wala imogumogu yeabasiki kwa malibu nukuijinalumbali mu nndema jino. Nepani ndi Bambu Sapanga, Sapanga winu. 2 Mkamula malagalaki gangu gi Lisoba Lukupomule, nakwapahenge isima pandu pa pangu nepani ndi Bambu Sapanga."

3 "Ana nnzetaki nukukamu minhilu wangu yenumpwagi, 4 nanndetila iyula ku kipindi sekipalika, ni migonda jinu jipapa ilebi hingi ni mikongu jejibii mu migonda jinu jipapa ngamaa. 5 Ilebi ibiya hingi ngamaa mbaka kipindi sukutongo zabibu, nukutongo zabibu kwiiendilia mbaka kipindi sukupanda imbeju. Mwiibiya na posu jingi nu kutama sulukwali mu ndema jinu. 6 Nanhenga ntama ku lukwali mu nndema winu nanamu mwigonila sapi sanga kujogopa. Naiboa inyama ikali mu ndema winu nu ndema ngagwiikubi na ngondu. 7 Mwaabenga babunsuki nakwaakoma ku upanga. 8 Bandu bi nhwanu baabenga bandu mia jimu nu bandu bi mia jimu baabenga bandu babunsuki elupu komi. Bandu babunsuki baakoma ku upanga. 9 Naanndingali sukumpendale nkolongu nukunhenga mbiya na bana bingi nukujonzukeka, nanepani nalihenga libiya sapi lilaganu langu lenaganii na mwanganya. 10 Mwanganya mwiibiya na posu jingi mbaka posu yemwiihusa kipindi sekipetiki mwaipia kunza, ili mmbeka posu yenhusiki sajenu. 11 Nepani niitama kati jinu wala ngananndeki. 12 Niijenda pikilanda jinu na kuba Sapanga winu nanamu mwiibiya mwa bandu bango. 13 Nepani ndi Bambu Sapanga, Sapanga winu, nenumbowa kundema uku Misili ili mwiikuba mwa atumwa ba Amisili. Nhalabini makili ga bandu bababiya atenda kung'alisa ili mwanganya ndekakiwa."

14 Bambu Sapanga japwaaga ana, "Anangamwiijogwane wala kukamuu malagalaki gango, 15 Ana nkaniki malagalaki gangu na mioju jinu anamwijisuki mihilu jangu nukusindwa kuhenga malagalaki gangu goti nu kutunuu lilaganu lango, 16 nepani niinhenga ana, ‘Nandetila lujogopu lukolongu lukusituki, kifua kikolongu na homa jejagahenga mihu ginu gilinga nu kuhenga nkombala. Mwiipanda imbeju jinu lakini nga mwiikuli ndaba bandu babunsuki ndi babiikula sempandiki. 17 Nepani ngananndingali mwanganya na bandu babunsuki biitenda kundapu, banndongusa bandu babunsuki bala. Mwiibiya nu lujogopu nukutila hata ngati ngamundu jokapi jojummbenga. 18 Hata ngati haga goti anagapiti, ngamwiinyowaneli, enu nampekiya azabu mala saba kwa ndaba ja mahakau gino. 19 Nakiboa kibuli sino nu kukuhenga kunani kwa mahundi ngakwiikuni iyula, nu nndema wino wiibiya nnzomu. 20 Makili gi gihoba pabwaka ndaba migonda jino ngajiipii ilebi ni mikongu mu nndema winu ngajiipapi matunda.’"

21 Ana nhendale kumpenga nu kukana kunyowane, niijonzukia kabee azabu jinu mala saba kulengana na enzonzuke mahakau ginu. 22 Nanndetila inyama ikali kati jino yaitola bana binu na kula mipugu jinu nukunhenga mpungusika hata indela yinu ibiya ngana bandu bukupeta.

23 Ana nhendali kukana kugakamuu malagalaki gangu na ngasempala kunyetake wala kung'anambuki nepani ila nzonzuke kupengana na nepani, 24 nanepani namweti niitenda kunsuki nukupengana na mwanganya nukupeke azabu mala saba ngani kwa ndaba ja mahakau ginu. 25 Naaleta ngondu jukundepesa kisasi kwa ndaba jililaganu langu lentunwi. Nanamu mwiitilila mu misi jinu lakini nandetila magogonzu mabaja nukunhenga mbiya mwaatumwa mwa bandu babunsuki. 26 Niipungusa posu jinu mbaka akambomba komi ba kwinu biitumia lijiku limu pe lukujose mabumunda. Bampekia mabumunda sukupema hata anankuliki ngamwiitupile.

27 Kabee nhendali kukana malagalaki gangu, na nhendale kungana, 28 ndienu nanepani naankana mwanganya kwii inyela, na niitenda kundapu namweti mala saba nakanopi kwa ndaba ja mahakau ginu. 29 Ndienu inzala jii jibiya ngolongu mbaka mwaakula bana binu, akanalomi na akambomba. 30 Niihalabana pandu pinu pukulumbali isapanga na niibombula pandu pukupogale ubani, mituhi jinu najilekala panani ja imogumogu yi isapanga yinu. Loho jangu jansukila ngani. 31 Najihalabana misi jinu na pandu pinu paka Sapanga napahenga pakuba lukoba na matambiku gii gampiiki kunungi kwaki kunengane nepani. 32 Naguhalaba nndema winu mbaka bandu babunsuki baabi homu biitenda kusanga. 33 Naanhenga mwanganya nkomana na bandu bu milema jengi nu kupesangana kuhuma kwa bandu bi milema jengi. Nndema wii wiibiya mang'oba na misi jinu jiitenda kuhalabika.

34 "Abaja binu pabibia bukamwi nukujenda ku nndema wa ageni na kuba mwaatumwa hoku, nndema wiitenda kupomule nukutogule pakwiibia nu ukeba. Nndema wiipomulia nukutogule masoba gukupomule kwaki. 35 Kipindi soti pamwiibiya mpitiki mu nndema, nndema wiipomulia nukutogule Masoba gaki Gukupomule gaguge ngasejawesiki kupata kipindi pamwabiya nntama homu. 36 Bangi binu babihigalia naahenga ajogupa mu mwiju jabu, mu milema ja bandu abaja babu nu kutila hata lihamba analinyukiki nu nhwai biitenda kutila. Biitila nukuhabuka hata ngati nga mundu jojaabenga. 37 Balikobandula beni na beni ngati bandu baatila ngondu hata ngati ngajojwaabenga. Ngamwiikubi na makili gukukomana na abaja babu. 38 Bandu bi milema heji baanhenga nkomika mu milema jabu. 39 Ana bibiya bandu kidogu alamiki biikombala na kuwa mbolimboli mu ndema wa bandu abaja binu nabombi biijomukiya hoku kwa ndaba ja mahakau ga aka atati babu.

40 "Lakini anaibeleku yinu ajetaki kulekake mahakau gabu na mahakau gaka tati babu kupete ubaja goahengiki ukungana nepani, 41 na amanyiki ndaba jaki naakana na kwaapeleka ku nndema ja bandu babunsuki, ngati mwoju wabu gogunonwipi anaakotwiki ing'omu nu kukana mumpata nukujetake mahakau gabu, 42 ndienu nanepani nalikomboka lilaganu langu lenahengiki na Abulahamu ni Isaka na Yakobu, nukugukomboka nndema gonundagila. 43 Kipindi pabibiya kunza ju ndema wabu, nndema hogu wiitogulia Masoba Gukupomule kwaki pawibiya nkeba. Kipindi sehesi bombi biipata azabu kwa ndaba ja mahakau gabu, kwa ndaba akaniki mihilu jangu nu kusuki malagalaki gangu. 44 Lakini hata ngati gapiti haga, nepani nganaleke wala kwaasuki mbaka kwaakoma tipitipi nu kulitunu lilaganu langu na bombi. 45 Lakini kwa ndaba jabu nalikomboka lilaganu langu lenahengiki na akatati babu banapiya ku ndema ja Misili koni bandu bi milema jengi alingali ili mia Sapanga wabu. Nepani ndi Bambu Sapanga." 46 Ganga ndi malagalaki ni mihilu na malagalaki gaka Bambu Sapanga gaguge jwaapekiya bandu buku Izilaeli kukitombi sa Sinai kola sukupete Musa.