1 Bambu Sapanga jwalongila na Musa, baada ja kuwa bana baka Aloni abeli, pabunhegalia Bambu Sapanga. 2 Ampwagila, "Gumpwagila nndongu waku Aloni ana, ‘Jwiijingi pandu pabapahagwi kwa ndaba jaka Sapanga kunyuma ji lipanzia, kipindi ejupala mweni. Jijingii pandu pabapahangwi ndaba jaka Sapanga ndaba ndi panipitila mu liundi kupete kipuniku. Ana ngasejujetaki, jwitenda kuwa. 3 Aloni jijingala pandu pabapahagwi ndaba jaka Sapanga koni jutotwi katoli kakambaku kwa ndaba ji litambiku lukuboa mahakau ni lipongu li likondoo kwa ndaba ji litambiku lukutinii. 4 Jwioga masi yega joti, ndienu jiwata ingobu yikigolu yeijetakeka kwaka Sapanga. Jijingala pandu hapa koni juweti ingobu heyi, ingobu heyi ndi kibunduu kihuu na kanzu nhuu nu kulikonga nkanda goalenganaki ku kitambaa kinhuu. 5 Jijukua kuhuma kwa bandu buku Izilaeli mapongu mabeli gi imbui kwa ndaba ji litambiku lukuboa mahakau ni lipongu li likondoo limu kwa ndaba ji litambiku lukutinii .’"

6 "Aloni jupalika kupia litoli li likambaku kuba litambiku lukuboa mahakau nukuhenga ujonganisu kwa ndaba jaki mweni na bandu bu munyumba jaki.

7 "Ndienu, jijukua mapongu mabeli gi imbui gala jwagabeka pi litanga li lihema laka Sapanga. 8 Jupega gudugudu kwa ndaba ja mapongu mabeli haga, gudugudu ju utumbuli kwa ndaba jaka Bambu Sapanga na gudugudu jengi ndaba jukutotule mahakau nukupeleka ku lukoba. 9 Aloni jijukua lipongu lejilihagula kwa gudugudu kwa ndaba jaka Sapanga nukumpiki Bambu Sapanga kuba litambiku lukuboa mahakau. 10 Lakini lipongu lebilihagwi kwa gudugudu kwa ndaba juku Azazeli, balipia palongi jaka Bambu Sapanga koni lakona lwomi ili lakahenga ujonganisu, nngolu waka Sapanga jwalilekakiya lijenda kulukoba lobulukema Azazeli ili kuboa mahakau ga bandu buku Izilaeli.

11 "Aloni jipiya likambaku li litambiku lukuboa mahakau kwa ndaba jaki mweni na bandu bu munyumba jaki, ndienu jiisinza likambaku heli kwa ndaba ji litambiku lukuboa mahakau, 12 kabee wijukua kimbani nukujoko makalakala gaganyaka pandu pukupikii litambiku, palongi jaka Bambu Sapanga jijukua ubani mbunda ibeli nu uwembi gogupoliki sapi nukupeleka nkati ja pandu papahaguliwi ngani. 13 Jiibeka ubani hogu panani ja mwotu palongi jaka Bambu Sapanga ili lihoi lubani heli liyekalia kipuniku si Lisanduku li Lilaganu, anagupwatiki malagalaki ganga ngajiikuwe. 14 Jijukua mwai nsokopi wi likambaku lela mulukonzi lwaki nukumisi upandi wa golipiti lyoba pandu pi kipuniku li ikia yaka Sapanga, ndienu jiimisila palongi ji Lisanduku li Lilaganu mala saba.

15 "Ndienu wisinza lipongu li litambiku lukuboa mahakau kwa ndaba ja bandu boti. Mwai wi imbui jeheji jwileta nkati pandu papajetakiki ngani nukuhenga ngati ejahenga mwai wi likambaku lela, jwiimisila pandu pukupata ikia yaka Sapanga, jwiimisila ku lukonzi lu upandi waki ukulongo. 16 Kwiindela heji jwiihenga ujonganisu wa pandu pa bapabei kwa ndaba jaka Sapanga na pandu panga kujetakeka, kunkana Sapanga na mahakau ga Aizilaeli. Ndienu hejwiihenga kwa ndaba jilihema laka Sapanga lelibii pikilanda ja bandu banga kujetakeka kwaka Sapanga. 17 Pawiihenga lihengu lukujonganesa kwa ndaba jaki mweni, na pawiijomule kujonganisa bandu bu munyumba jaki na Aizilaeli, ndienu jijingi mundu jwokapi nkati ji lihema laka Sapanga mbaka pajijomula nukupita kunza. 18 Ndienu wiiboka nukujenda pandu pukupikii litambiku lukutii palongi jaka Bambu Sapanga nukupahenga pajetakikeka na Sapanga. Wiijukua mwai nsokopi wi likambaku ni imbui gola nukupakii manyelu goti ga pandu pukupikii litambiku. 19 Wapamisila mwai pandu paalenganaki ili kupikii litambiku mala saba sukutumii lukonzi lwaku na kupanyambisa ili mahakau goti ga bandu buku Izilaeli gaboka.

20 "Aloni pa jwiijomula kupanyambisa pandu pasapi, lihema laka Sapanga na pandu pukupikii litambiku, ndienu jwipia lipongu li imbui heli lebapegi gudugudu kwa ndaba jaka Azazeli koni libii lomi. 21 Aloni jibeka maboku gaki mukimutu si lipongu li imbui heli nukuloba kulekakewa kwa mahakau ga bandu boti Izilaeli, makosa gabu goti na mahakau gabu, ili kugabeka panani ji kimutu si lipongu li imbui heli. Ndienu jwalileka lipongu heli lijenda kulukoba kukupelekwa na mundu jokapi jojubii tayali sukupala mweni. 22 Jwalileka lipongu heli lijenda kulukoba, pandu panga na bandu koni litotwi makahau gabu goti.

23 "Ndienu Aloni jijingala nkati ji lihema laka Sapanga, jihula ingobu ikigolu yejawatiki pajijingala pandu pasapi ngani nukuileka homu. 24 Jwihoga pandu pasapi hapa nukuwata ingobu yaki. Jwipita nukupia litambiku laki lukutini ni litambiku lukutini la bandu buku Izilaeli, ili kuhenga lihengu lukujonganesa kwa ndaba jaki mweni na ndaba ja bandu boti buku Izilaeli. 25 Kabee jiijosa mahuta gi litambiku lukuboa mahakau jwiitini panani ja pandu pukupiki litambiku. 26 Mundu jojilipelika lipongu li imbui ku lungwenza, ku Azazeli jisapa oti ingobu yaki nukuoga ndi pajiwesa ndi jiiwesa kujingi mu makambi. 27 Likambaku ni imbui jela yebapia litambiku lukuboa mahakau mwai wabu bapelika pandu pa sapi ngani ili Aizilaeli alekakiwa mahakau gabu, baipelika kunza ji likambi nukutini. Ngosi yabu ni inyama yabu ni imai gabu, yoti biitenda kuitinii kwa mwotu. 28 Mundu jojaitiniya pa mwotu jwisapa ingobu yaki nukuoga, ndienu pajwiwesa kujingi mu likambi.

29 "Lende ndi lilagalaki lelipalika kulipwata masoba goti ganga na mwisu, mu lisoba la komi la mwei wa saba, mwabee na ageni baatama pamu nu mbanganya, kwiipalika kupunga nu kukotoka kuhenga lihengu lokapi. 30 Mwitenda hela kwa ndaba lisoba heli ndi lisoba lukujongana na nepani Bambu Sapanga, ili kulekakewa mahakau gino, na nepani nitenda kunnyambisa nukunzetake kunnumbali nepani Bambu Sapanga. 31 Lisoba heli ndi lisoba lukupomulela nakanopi nanamu mwiitenda kupunga. Lilagalaki heli ndi libiya la masoba goti. 32 Nngolu waka Sapanga joanhagwi sukunzakani mahuta, ili jukamula napwasi ja atati baki, ndi jojihenga lihengu lukujonganesa koni juweti ingobu ya sapi yi kitambaa kihuu. 33 Jwapahengila ujonganisu pandu pa pabapabei kwandaba jaka Sapanga pabiya papajetakeka ngani, lihema laka Sapanga libiya la sapi na kwa ndaba ji lihema laka Sapanga pandu pukupiki litambiku na yaka agolu baka Sapanga na kwa ndaba ja bandu boti buku Izilaeli. 34 Ndienu kwiipalika mulipwata ili kuhenga ujonganisu kwa ndaba ja bandu boti mala jimu kila saka nukulekake mahakau gabu, lende ndi lilagalaki la yaka yanga na mwisu."

Musa jwahenga goti ngati eandagalakia Bambu Sapanga.