1 Palahika lisoba la nani lukwaahimika Aloni na bana baki kuba akagolu baka Sapanga, Musa ankema Aloni na banamundu pamu na akakilongosi buku Izalaeli. 2 Musa ampwagila Aloni, "Jukua lipongu la ng'ombi ndaba ji litambiku lukuboa mahakau gaku nakabee jukua likondoo lipongu ndaba jili tambiku laku lukutinii pa mwotu, inyama heyi yoti yiikuba yanga ni kilema. Ndienu gumpiikia litambiku lukutinii kwa mwotu Bambu Sapanga. 3 Gwapwagila Aizilaeli ajukua lipongu limu li mbui ndaba ji litambiku lukuboa mahakau gabu, na ng'ombi jimu ni likondoo limu goti ga saka simu na ganga ni kilema kwa ndaba jukupiiki litambiku lukutinii pa mwotu, 4 ndienu jukua likambaku la ng'ombe ni likondoo lipongu ndaba ji litambiku lulukwali, bukumpikia Bambu Sapanga pamu ni litambiku li ilebi yeihangangini na mahuta. Nhenga hela ndaba lelenu Bambu Sapanga jwiitenda kumpiti."

5 Aizalaeli baleta hindu heyi yoti, palongi ji lihema la sapi ngati Musa ejalagalakia na Aizalaeli boti bajenda kujema palongi jaka Bambu Sapanga. 6 Musa jaapwagila, "Lende ndi lijambu lelule Bambu Sapanga andagalakia mulihenga ili unang'anu waki gubonikana kwinu." 7 Ndienu Musa ampwagila Aloni, "Jenda pandu pukupiiki matambiku, wakapia litambiku laku lukuboa mahakau ni litambiku lukutinii, ndienu ukapia litambiku kwa ndaba ja bandu boti, ukahenga lihengu lakwaajonganisa ndaba jaku na ndaba ja Aizilaeli. Ndienu gupia litambiku lulukwali ngati Bambu Sapanga hejugulagalakia."

8 Enu, Aloni jwahegalia pandu pukupiiki matambiku, jwasinza litoli la ng'ombi kwa ndaba ja mahakau gaki mweni. 9 Bana baki bumpelakiya mwai, najombi jwatobika lukonzi lwaki nkati ja mwai we hogu nukupaki mu manyelu ga pandu pukupiki litambiku. Mwai gogwahigalia jajitala pai kuyongolota pandu pukupiki matambiku. 10 Ndienu, mahuta na figu ni inyama ja sapi ji imani jwatenda kutinii yoti pandu pukupiki litambiku ngati Bambu Sapanga eandagalakia Musa. 11 Lakini, ngosi jela jwatinia pa mwotu kunza ji likambi. 12 Ndienu, Aloni jwasinza likondoo li litambiku lukutini. Ndienu bana mundu andetila mwai, najombi jwamisila pandu pukupiki litambiku mu manyelu goti. 13 Ndienu, bana baki andetila litambiku lukutinii, kipandi simu ni kimutu, najwombi jwatinia panani ja pandu paalenganaki ili kupiki matambiku. 14 Jwagolu baka Sapangala matumbu na magolu baka Sapanga nukuitinii pamu na matambiku gala jukutini panani ja pandu pukupiiki matambiku.

15 Ndienu, Aloni jwabeka palongi matambiku ga bandu bajukua inyama ya matambiku ga bandu gukuboa mahakau, jwasinza imbui jela nukumpia litambiku lukuboa mahakau, ampikia Bambu Sapanga ngati ejahenga kwi imbui ju kutumbuli jela. 16 Ndienu jwabeka palongi litambiku lukutini lela nukulipia litambiku heli ngati Bambu Sapanga eanndagalakiya. 17 Kabee jaleta litambiku lu uwembi nukujuku mbunda jimu ju uwembi nukutini panani ja pandu paalenganaki ili kupiki litambiku pamu ni litambiku lukutinii la kila lukela.

18 Ndienu, Aloni jwasinza ng'ombi jela ni likondoo lipongu kuba litambiku lulukwali ndaba ja bandu. Bana mundu andetila mwai jwamisila pandu paalenganaki ili kupiki matambiku kila upandi. 19 Lakini Aloni jajukua mahuta ga ng'ombi heji na gilipongu lilikondoo na mahuta gumu nkela gwi likondoo na mahuta gagayekale matumbu na figu ni inyama ja sapi jipi imani, 20 kabee jabeka mahuta haga panani jiigamba ji inyama heyi najombi jwitinia pandu pukupiki matambiku. 21 Lakini igamba yela na sema sukunyuma kumalele kola, Aloni jatondabiya palongi jaka Bambu Sapanga ngati Musa eandagalakia. Jahenga hela kulangi inyama heyi yoti juipihiki kwaka Sapanga.

22 Aloni ejajomula kusinza inyama pandu pukupiki matambiku, matambiku gukuboa mahakau, matambiku gukutini nu matambiku gu lukwali, jwatondabiya maboku na kwaapenge, nu kuhuluka pai. 23 Ndipala, Musa na Aloni bajingala nkati ji lihema la sapi pabapita baapengalia bandu, nu unang'anu guka Sapanga gwabonikana kwa bandu boti. 24 Mwotu kuhuma kwaka Bambu Sapanga watinia litambiku na mahuta gagabi panani ja pandu pukupiki litambiku. Bandu boti ebugubona mwotu hogu bajemba iloi nu kupegamagoti nukujinama mbaka pai.