1 Bambu Sapanga ampwagila ana Musa kukitombi sa Sinai kola, 2 "Waapwagila Aizilaeli ana, emwihika mu nndema gonumpeke nepani Bambu Sapanga gubiya gwinu, kila saka sa saba nndema wiitenda kugolukela mwajilema ili gupomuliya kwa ndaba jukunhenge isima Bambu Sapanga. 3 Kwa yaka sita mwiilema nukupanda, mwiisekuliya mizabibu jinu nukuhusa ilebi yinu. 4 Lakini saka sa saba mwaguleka nndema gupomuliya, ndaba Bambu Sapanga julagalaki ndi kupalika kupomule mu saka hesi. Mwiipanda sokapi wala kusekuli mizabibu jinu. 5 Sindu sokapi sekimela seni mwakihusa wala kutongo zabibu kuhuma mu mikongu janga kusekuli. Hesi ndi sibiya saka sukulupomulesa luhombi kabisa. 6 Nhwesa kula posu jokapi jejimela jeni mu saka sukupomule, mwiikula mwabeti na atumisi bii akanalomi na akambomba na bandu binu bi kibalua na ageni baatama na mwanganya. 7 Kabee inyama yempuga ni inyama yi mwikioli nayombi ikula posu jejimele jeni ja saka hesi.

8 "Mwiibalanga yaka saba mala saba na yoti ndi yibiya yaka alubaini na tisa. 9 Ndienu, mu lisoba la komi la mwei wa saba lelule ndi Lisoba lu Kujonganiswa mwantuma mundu kujemba imbata mu ndema joti. 10 Mwakibeka saka sa hamsini mwaguhengila isima sukutangasa kulekakewa kwa atumwa boti bupunndema. Saka se hesi sibiya lisoba lukukombokeyaka hamusini. Kila jumu sejulombisi jikelubukiya mu sindu saki na alongu baki babaalombisi ku utumwa bitenda kwaakelabu. 11 Ndaba saka hesi ndi sa matola gukukomboka yaka hamusini sibiya saka sa hamsini kwinu mwanganya kulekakewa, mwakikombuka saka hesi nukukitogule ndienu mwiipanda imbeju jokapi wala kuhusa sindu sokapi sekimela seni wala mwiitongo zabibu mwi mikongu ji mizabibu janga kusekuli. 12 Saka hesi ndi sibiya saka sinu, ndienu sibiya saka Sapanga. Enu mwiikula hindu yeimei yeni mu migonda."

13 "Mu saka hesi kila mundu jojalombisi sokapi jiitenda kukelabukiwa. 14 Ana gulomba litui au kulombesa ng'onda luku Nhizilaeli nnzaku wandepa ngati ekupalika. 15 Lupija lukulepe nngonda ndi kwiipalika jilengana na yaka yeihigali kulekewa, saka sukunkelabuki nnzaku nngonda waki. 16 Ana yaka jukuhiki saka sukulekakewa jakona yingi, bei ju nngonda we hogu jibioya ngolongu, lakini yaka anajihigali misoku bei ju nngonda we hogu jibiya nzoku, bei jilengana ni ilebi gagipatikana mu nngonda. 17 Mwiinhuniana, ila pee nyongopa nepani Bambu Sapanga, Sapanga winu."

18 "Ana mwiipwata malagalaki gango nukugatimisa, ili nhesa kuendale kutama nanamu mwiitama su lukwali. 19 Ndema wiipapa ilebi nu mbanganya mwiikula nu kutupi nu kutama homu su lukwali. 20 Lakini mnhwesa kuholale, ‘Kubanga twiikula kike mu saka sa saba ana atenda kutukana kupanda imbeju wala kuhuna ilebi yito?’ 21 Mwiihola, nepani nampengila mu saka sa sita nu nndema wampapila ilebi yingi kwa yaka itatu. 22 Emwipanda mu saka sa nani mwiibiya nkula ilebi ya mwandi nanamu mwiendaliya kabee kula posu hei mbaka mu saka sa tisa emwitumbuliya kabee kuhuna."

23 "Mwiilombesa nndema, ndaba hogu ndi mali gangu nu mbanganya ndi mwaageni na mwempeta mu ndema wangu. 24 Ndaba mu ndema woti gontama mwiibiya na namuna jukugugomboo nndema."

25 "Ana nndongu waku nhagu na julombisi nngonda waki, ndienu ndongu waku wapambipi jwiipalika kugugombo nngonda hogu. 26 Ana mundu hoju ngase jubi nu nndongu waki jojuwesa kugomboo nngonda, lakini mwenikatai ejibiya na mali nukupata uwesu ukugugombo nngonda waki, 27 ndienu jwibalanga yaka yeipalika tumbuka pajalombisa nukunndepa lupija lwaka mundu jojugulombiki jola, mundu jojalomba jola kwiipalika kunkelabuki. 28 Lakini anangasejubii nu uwesu ukujigombola, ndienu, nndema hogu wibiya waka mundu jojulombiki jola mbaka saka sa matola gukukombukee ga yaka amusini. Mu saka hesi ndi kwiipalika mali haga jugaleka nukunkelabuki mundu jojwalombisi jola.

29 "Ana mundu julombisi nyumba jaki jejutama jejibi nkati ja musi goasengiki lumatu, juwesa kujikombo kwi kipindi sa saka simu tumbuka pajwalombisa. Kwa saka hesi soti jwibiya na haki jukugukombola. 30 Ana nyumba jibii nkati ja musi gogusengaliwi nu lumatu na ngase jawesiki kujikomboo ku kipindi sa saka simu, ndienu, jibia mali gaka jojwalombiki jola masoba goti ganga na mwisu mwiibeleku yabu yoti, wala ngabajikelabu mu saka sa matola gukukombuke ga yaka amusini. 31 Lakini nyumba yeibii kuijiji yeyuye ngaseayongulati lumatu jipwata namuna ja malagalaki gu ndema, nyumba heyi awesa kuikomboo mu saka simu ila ndi kwiipalika kwiikelabu kwa beni mu yaka amusini yukukomboka. 32 Hata hela, nyumba yeibii mu misi jabu jeatama Alawi kuwesikana kwiikombo kipindi sokapi. 33 Ana nyumba jokapi atei kulombesa nu Nndawi ngasejijigobwi kupalika akelubua kwaka mweni mu saka sukukomboka yaka amusini, ndaba nyumba yeibii mu misi ya Alawi ikuba yabu ndaba bombi baapeki kuhuma kwa bandu buku Izilaeli. 34 Lakini migonda gukulimi gagayongolota misi ja Alawi giilombeswa ndaba heji ndi migonda jabu masoba goti."

35 "Ana nndongu jubii nhagu na ngasejuwesa kulitunza mweni koni jutama na wehapa, gunzangatia nu kunhenge ngati nngeni jojubii nyumba jaku. 36 Wala wampwagi jugulepa liba. Ila gunzogupa Bambu Sapanga, ili nndongu waku juwesa kutama pamu na weapa. 37 Wankopesa lupija lwa liba au kumpekee posu ili jugulepa lupija lukujonzuke. 38 Nepani ndi Bambu Sapanga, Sapanga waku, nenugupiiki ku ndema uku Misili ili kugupekee nndema uku Kanaani ili mia Sapanga waku.

39 "Ana Nhizilaeli nnzaku jojutama pambipi jubii nhagu na julilombesi kwaku, wanhengesa lihengu ngati ntumwa. 40 Jwiitama na weapa ngati mundu jogumpeki lihengu au mpeta ndela. Jwagutumikia mbaka saka sukukomboka yaka amusini. 41 Saka hesi ndi kupalika kundekake jukelubuka kwa alongu baki nu kupata ulisi wa anyongo na akatati baki, waandeka pamu na akalongu baki. 42 Kwa ndaba Aizilaeli ndi atumisi bangu banaapia kunndema uku Misili, ndienu mwaalombesa hata kulenga ngati atumwa. 43 Wannhenge Nhizilaeli nnzaku su ukatili, ila gunyogopa nepani Bambu Sapanga, Sapanga waku. 44 Ana waapala atumwa guwesa kwaalomba kuhuma kwa bandu bunndema gongi. 45 Guwesa kabee kwaalomba atumwa kuhuma kwa ageni baatama pamu na wehapa na akalongu bu lukoo lwabu baasaliwi mu ndema winu, nabombi bibia binu, 46 Atumwa haba guwesa kwaapeke bana binu akuba mali gabu masoba goti. Lakini Nhizilaeli nnzaku waanhenge su ukatili.

47 "Ana ngeni jogutama naku au mpeta na ndela jubii na mali gingi nu nndongu waku nhagu jipiti kulilombesa kukungeni au mpeta na ndela hoju au kwaka jumu ju lukolu lwa ageni haba, 48 jumu jwa alongu baki juwesa kunkombo, 49 anijaja baki au nhibini waki au undongu waki jwapambipi mu ukoo waki juwesa kunkomboo, juwesa kabee kulikomboo mweni ngati anajubii na mali. 50 Jwombi pamu na joandombiki jola biibalanga yaka tumbuka pajililombisa mbaka saka sukulekakewa. Malepu gukundekake kwaki giilengana na yaka yejuhengi lihengu. Kipindi sejabiya juhengiki lihengu sipemwa nukulenganesa mundu jojihenga lihengu. 51 Ana yaka yeihigali mbaka saka sukukombuke yaka amusini ndi yaka hingi ngamaa, ndienu mundu hoju jiikelubua kiasi sa bei sebunndepila. 52 Ana yaka yeihigali ibi isikipi kuhiki saka sukukomboka yaka amusini, jwiibalanga sekipalika nukulepa ili kulikombo mweni. 53 Masoba goti pajutama kwaka nkolongu waki ndi kupalika anhengila ngati mundu jojulepwa lupija kila saka. Joanndombiki jola anhenge ukatili. 54 Lakini ana mundu hoju na bana baki ngase akombuliwi kwi indela jokapi, enu anndekia mu saka sukukomoka yaka amusini. 55 Aizilaeli ndi atumisi bango, ndaba naapiiki mu ndema uku Misili. Nepani ndi Bambu Sapanga, Sapanga winu."