1 Bambu Sapanga ampwagila Musa, 2 "Waapwagila bandu boti buku Izilaeli, ‘Kupalika mwa bandu boti mbia sapi ngani ngati nepani Bambu Sapanga, Sapanga winu emi. 3 Kila jumu wino ndi jiipalika jwaahengilia isima amabu baki na atati baki, nanamu mukulikamula lisoba Lukupomulela. Nepani ndi na Bambu Sapanga, Sapanga wino. 4 Mwing'anambuka nepani nukuilumbali imong'umong'u yiisapanga, wala mwalilenganake isapanga yikisomasoma. Nepani ndi Bambu Sapanga, Sapanga wino.’"

5 "Embiiki litambiku lulukwali nepani Bambu Sapanga, mwiimbikiya ngati ekupalika ili nanepani nunzetakalia. 6 Inyama ji litambiku heli ndi kwiipalika mwiikula lisoba lele au kilabu jaki. Sokapi sesihigaliya mbaka lisoba la tatu, kwiipalika kitinika pa mwotu. 7 Ana pandu pokapi pi litambiku biikula lisoba la tatu, sindu hesi sibiya sindu sukusukisa, litambiku heli ngalijetakewe, 8 mundu jwokapi jojikula inyama heji, kwiipalika kupata azabu, ndaba jikihengiki sindu hesi kuba sangakutakeka palongi jaka Bambu Sapanga. Mundu hoju bammbeka kutali na bandu baki."

9 "Egwihusa ilebi yu nndema waku, wiihusa mbaka mu mpaka wu ngonda wala wiikelubuki kuholola. 10 Mwiijenda kabee kuholo kila sindu mu ngonda gu mizabibu, wala wiitondoo zabibu yeiabuki pai, zabibu heyi mwaalekila ahagu na ageni. Nepani ndi Bambu Sapanga, Sapanga winu."

11 "Mwiijiba, mwiipwaga isoli wala mwaakonga bandu. 12 Mwiilapa kwii isoli ku liina langu hata kulisapu liina laka Bambu Sapanga, Sapanga wino. Nepani ndi Bambu Sapanga."

13 "Gwaanzulumu nnzaku wala kunyaga. Wiitama na malepu gaka mundu joguhengi lihenga kelukelu mbaka pulukela. 14 Gwanndigi mbamba mundu jwanga kujowa wala kummbeke sindu ili jwiipeta mundu jwanga kulinga, ila gunyogopa nepani Bambu Sapanga, Sapanga waku. Nepani ndi Bambu Sapanga."

15 "Ewatemu bandu watemula ngati hekupalika, wampendale nhagu au jojubi nkolongu. Enu ndi kwiipalika kuntemu wa pambipi waku ngati hekupalika. 16 Gukotuka kujenda ako na ako kwaasonganisa bandu bikilongu saku. Kukuhenga hela wanhenga nnzaku jukuwa kwa ndaba ja malobi gaku. Nepani ndi Bambu Sapanga."

17 "Nkotuka kunsuki nndongu waku, lakini weapa gujongana naku ili nkotuka kuhenga mahakau. 18 Nkotuka kunkelabuki nnzaku sindu kibaja na kotuka kwaayome bandu bikibeleku saku ila gumpala nzilani waku ngati egwilipala wamwete. Nepani ndi Bambu Sapanga, Sapanga winu.

19 "Mwikamula malagalaki gangu. Wajileka mipugu jaku ja aina jimu jibelikana ni mipugu ja aina jengi. Wiipanda imbeju aina ibeli mu nngonda waku. Wiiwata ingobu jeasoni kwa aina ibeli ji itamba.

20 "Mwanalomi anajugoni nu mmbomba ntumwa jojuwe najombi ansumbii mwanalomi jongi, lakini jakona ngaseangombwi wala ngasejulekakiwi jakona ntumwa, kwiipalika kupelelesa. Lakini baakoma ndaba mmbomba hoju jakoli ngase julekakiwi. 21 Mwanalomi hoju jwileta palongi ji litanga li lihema laka Sapanga lipongu li likondoo li litambiku laki lukuboa kihakau nukumbiiki nepani Bambu Sapanga. 22 Nngolu waka Sapanga annzonganisa na sapanga sukutumi likondoo heli palongi paka Bambu Sapanga kwa ndaba ja mahakau gajunhengiki, najombi jwitenda kulekakewa mahakau gajahengiki.

23 "Emwiika kunndema uku Kanaani nu kupanda mikongu aina joti ja matunda, matunda haga ngamwiikuli kwa yaka itatu. 24 Saka su nsesi matunda goti gunkongu hogu gibia sapi, biipia kuba litambiku lukulumbali kabee bilikema litambiku lukunsengu Bambu Sapanga. 25 Nsaka su nhwanu nhwesa kula matunda gunkongu hogu, ni mikongu jinu jipapa matunda gingi nanhengiki hela heji nu kuhusa kwino kwiitenda kujonzukeka. Nepani ndi Bambu Sapanga, Sapanga winu.

26 "Mwiikula inyama jokapi jejibii na mwai. Mwiilondo wala kuhenga uhabi. 27 Nkotuka kumoga majunzu gii mulutengu, wala kumoga indeu yinu. 28 Nkotuka kulilemba nembu mu nhyega jino kwa ndaba jukulobalakela kwa bandu baawii wala kulisola alama jokapi nhyega." Nepani ndi Bambu Sapanga. 29 "Nkotuka kumpoa lihamu kamwali waku sukunhenga nselati, anahengiki hela bandu boti biibia aselati nu ubaja. 30 Mwalikamula Lisoba Lukupomulela nukupahenge isima pandu papuje bandu atenda kunumbali mu lihema laka Sapanga. Nepani ndi Bambu Sapanga.

31 "Nkotuka kwaajendee baalondo sukutumi maoka wala uhabi ili kwaaloba bundongula sukuhenga kwibiya ngasenzetakeka kwangu nepani Bambu Sapanga wino.

32 "Hegukuba palongi ja aseja gujema kwaapeke isima yabu, nanagu gundumbalia Sapanga wako. Nepani ndi Bambu Sapanga.

33 "Ana jubii ngeni mu ndema waku wanhenge majambu gilihaa. 34 Nngeni hoju jojutama na weapa jikuba kwaku ngati Muhizilaeli nnzaku na weapa wantenda kumpala ngati ewilipala gwamwete, kwa ndaba na weapa wabi ungeni ku nndema uku Misili. Nepani ndi Bambu Sapanga, Sapanga winu.

35 "Kotuka kutumi ipemu ihisoli pagupema ulasu nu kupema kutopa wala kutwele kwa indu. 36 Ndi kwiipalika ntumia ipemu yeipalika niipemu yeipalika. Nepani ndi Bambu Sapanga, Sapanga wino nenumpia mu nndema uku Misili. 37 Kupalika nkamula malagalaki gangu nu kuhenga goti ganumpwagila. Nepani ndi Bambu Sapanga, Sapanga winu."