1 "Mundu jwokapi ana ampiki litambiku li kilebi Bambu Sapanga, ndienu jijukua ilebi nukupola uwembi gogulembuliki. Jwihangangana na mahuta gi mizeituni nu ubani. 2 Ndienu jaapelakiya agolu baka Sapanga bana akanalomi baka Aloni. Jwijukua mbunda jimu ju uwembi we hogu gogulembuliki gohangangini na mahuta gi mizeituni nu ubani nukumpeleke nngolu waka Sapanga jumu kati jabu jojwagutinia panani ja pandu paalenganaki pukupiki litambiku gubia litambiku lu ukombosu kwaka Bambu Sapanga. Heli ndi litambiku heli leatini pa mwotu lelinungi sapi nukunndengane Bambu Sapanga." 3 Litambiku lu uwembi gogwihigaliya biikula Aloni na bana baki. Litambiku heli libiya la sapi ngani ngati leampiki Bambu Sapanga pa mwotu.

4 "Mundu ana ampiki Sapanga litambiku lu uwembi gukujosa pa hinza, jikubi ju uwembi gogulembuliki, mabumunda ganga kujegee amila gaangangini na mahuta gi mizeituni, au mabumunda mapepandau ganga na amila na ganga kupakii mahuta. 5 Ana mundu ampiki Sapanga litambiku la mabumunda gajosiki mu kibega mabumunda haga gabiya gu uwembi gogulembuliki na ganga na amila na goahangangini na mahuta ga zeituni lakini sanga kubeka amila. 6 Mabumunda gehaga biitunulana nu kuhangangana na mahuta, litambiku heli ndi litambiku li ilebi lepihiki kwaka Bambu Sapanga.

7 "Ana mundu ampiki Bambu Sapanga litambiku la mabumunda gaatelika mu kibega, haga gibia matambiku gu uwembi gogulembuliki na goajegi mahuta. 8 Anndetila Bambu Sapanga litambiku li ilebi heli lealenganaki kwa hindu hei nu nngolu waka Sapanga jwipelika pandu pukupiki litambiku. 9 Nngolu waka Sapanga jwiitola pandu pi litambiku heli kuba ngati litambiku lukulangi ndi litambiku lukukombukela nu kutinii pandu paalenganaki ili kupiki litambiku. Heli ndi litambiku lelitiniki pamwotu linungila sapi nukunndengane Bambu Sapanga." 10 Pandu pi litambiku lelihigali li litambiku heli jwiikula Aloni na bana baki. Litambiku heli ndi litambiku la sapi ngani ndaba apiiki kwaka Bambu Sapanga pa mwotu.

11 "Litambiku lokapi li ilebi lewampiikia Bambu Sapanga ndi kupalika liikuba na amila, ndaba goniogu nhilu kubeka amila na busi mu uwembi goumpiki Bambu Sapanga kuba litambiku lukutini pa mwotu. 12 Guwesa kunndete Bambu Sapanga imbeju yaku yu kutumbuli kuba ngati litambiku. Lakini ilebi heyi ngabaipii pandu paalenganaki kupiki litambiku lukutini kuba unungi wa sapi palongi jaka Bambu Sapanga. 13 Jegala mwinyu mu matambiku gaku goti gi imbeju. Mwilihangaliya mwikotoka kujege mwinyu mwi litambiku laku li imbeju, ndaba mwinyu ndi nginyuli yi lilaganu lejahengiki Sapanga pamu na mwanganya.

14 "Ana gumpiki Bambu Sapanga litambiku li imbeju yaku yukutumbuli gwaipia koni biipoliki ni ingonyu yaki, au gwipia mabumunda gukujosa gagalenganakiwi ku uwembi gwi inganu yeapoliki sapi. 15 Gwijegala mahuta nukubeka ubani, heli ndi litambiku li imbeju yebumpiki Bambu Sapanga. 16 Nngolu waka Sapanga jwitinia pandu pi litambiku leheli li imbeju yeapoliki nu kuhangangana na mahuta pamu nu ubani gwaki gwoti, libia litambiku lukukombukela. Litambiku heli ndi lebumpiki Bambu Sapanga pa mwotu."