1 Nɛ Yesu bu e kaseli ɔmɛ abɛ nɛ ɔ ke, "Niatsɛ ko hi si nɛ e ngɛ apaatsɛ nɔkɔtɔma ko nɛ e wo ngɔ to e nɔ́ ɔmɛ tsuo a nya. Se e ba na le kaa apaatsɛ nɛ ɔ yi lɛ anɔkuale.

2 Lɔ ɔ he je ɔ, e tsɛ lɛ nɛ e de lɛ ke, ‘I ngɛ nɔ́ komɛ nue ngɛ o he nɛ ngɔɛ ye nya. I na le kaa o ngɛ mi jue. I ma suɔ nɛ o ba bu mi ni ɔmɛ a he akɔtaa, ejakaa i ma he ni tsumi ɔ ngɛ o dɛ.’

3 Apaatsɛ nɛ ɔ de ngɛ e yi mi ke, ‘Tsaatsɛmɛ, i bɔ ahlua! Nɛ ni tsumi nɛ ɔ ngɛ ye dɛ jee nɛ ɔ nɛɛ kɛ i ma pee kɛɛ? I be ni tsumi kpakpataa ko nyɛe ma tsu amlɔ nɛ ɔ; nɛ bɔ nɛ i ngɛ nɛ ɔ, i ya be ni nyɛe ma ba. 4 E he wɛ! I le nɔ́ nɛ ma pee kɛ na huɛmɛ nɛ maa ye kɛ bua mi hwɔɔ se ke i je hiɛmɛ nɛ ɔ.’

5 Apaatsɛ ɔ ya tsɛ niatsɛ ɔ hiɔtsɛ ɔmɛ kakaaka. E bi kekle no ɔ ke, ‘Hiɔ nyɛmɛ o hɛɛ ni tsumitsɛ ɔ?’ 6 Nɛ e ha lɛ heto ke, ‘Ye hiɔ ɔ nya ji, nu bale lafa.’ Apaatsɛ ɔ de hiɔtsɛ ɔ ke, ‘O nɛ, o hiɔ ɔ nɔ odase womi ɔ ji nɛ ɔ nɛ. Moo hi si nɛ o tsake hiɔ ɔ nɛ o pee lɛ nu bale nyingmi enuɔ.’

7 Apaatsɛ ɔ bi hiɔtsɛ enyɔne ɔ hu ke, ‘Nɛ mo nɛɛ, hiɔ nyɛmɛ o hɛɛ ni tsumitsɛ ɔ?’ E de lɛ ke, ‘Ngma kotoku lafa.’ ‘O nɛ, o womi ɔ ji enɛ. Moo hi si nɛ o pee lɛ nyingmi kpaanyɔ.’

8 E ba mi kaa ni tsumitsɛ ɔ kɔ apaatsɛ julɔ nɛ ɔ ngɛ ga nɛ e to nɛ ɔ he je. Nɛ ja i, nimli yaya amɛ a jumi nya wa pe ni kpakpa amɛ a ní. 9 Se kɛ maa pee kɛɛ nɛ i ma de nyɛ ke nyɛ hu nyɛɛ gu sisimi blɔ nɔ kɛ pee huɛ kɛɛ? Anɛ lɔ ɔ ma ha nyɛ neneene sihi he ngɛ hiɔwe hwɔɔ se lo? 10 Dabi! Ejakaa ja nyɛ ye anɔkuale ngɛ ni tsɔwi a mi loko ji nyɛ ma nyɛ maa ye anɔkuale ngɛ ni agbohi a mi. Ke nyɛ fiaa ojo ngɛ ni tsɔwi a mi ɔ, nyɛ be anɔkuale nyɛe maa ye ngɛ blɔ nya agbo nɛ a ma kɛ ha nyɛ ɔ hu mi. 11 Nɛ ke nɔ ko be he nyɛe ma ngɔ fɔ nyɛ nɔ ngɛ je nɛ ɔ mi níhi a mi ɔ nɛɛ, mɛnɔ maa to hiɔwe níhi nɛ ji anɔkuale ni nami ɔ ngɔ wo nyɛ dɛ? 12 Ke nyɛ nyɛ we ni kpahi a sika nɔ nɛ nyɛɛ hyɛ ɔ, kɛ maa pee nɛ a maa to nyɛ nitsɛmɛ nyɛ nɔ́ kɛ wo nyɛ dɛ kɛɛ?

13 Ejakaa nɔ ko be tsɛmɛ enyɔ nyɛe ma sɔmɔ. Bɔ fɛɛ bɔ nɛ ji ɔ, e maa nyɛ nɔ kake nɛ e maa suɔ nɔ kake. Nyɛ be Mawu kɛ sika tsuo nyɛe ma sɔmɔ."

14 Se e munyu ɔ pee Farisi bi ɔmɛ tai, ejakaa a suɔ sika saminya.

15 Nɛ e de mɛ ke, "Nyɛ toɔ nyɛ hɛ mi ngɛ ma hɛ mi kaa nimli kpakpahi, nɛ lɔ ɔ he je ɔ, nihi buu nyɛ; se Mawu lɛɛ e le nyɛ tsui mi yayami ɔmɛ. Nɛ nyɛ osato ni peemi ni ɔmɛ haa nɛ nimli woɔ nyɛ hɛ mi nyami, se Mawu lɛɛ a ji musu ngɛ e hɛ mi. 16 Loko ji Yohane Baptisilɔ ɔ maa je e fiɛmi ɔ sisi ɔ, Mose mlaa amɛ kɛ gbali ɔmɛ a munyu ɔmɛ ji nyɛ blɔ tsɔɔmi níhi. Se Yohane ba fiɛ Manye Munyu ɔ nɛ e de ke, Mawu Matsɛyemi ɔ na nyɛ ta, nɛ lɔ ɔ he je ɔ, nihi fuu bɔni e mi sɛmi blɔ hlae jehanɛ. 17 Se lɔ ɔ tsɔɔ we kaa mlaa be he wami ko hu. Mlaa a daa si kpɛii kaa bɔ nɛ hiɔwe kɛ zugba daa si ɔ. E mi eko tsakee we.

18 Nɛ ja a he je ɔ, nɔ tsuaa nɔ nɛ fieɔ e yo nɛ e ya ngɔɔ yo kpa a, e puɛ gba; nɛ nɔ tsuaa nɔ nɛ ngɔɔ yo nɛ e huno ngmɛɛ e he ɔ, lɛ hu e puɛ gba."

19 Nɛ Yesu de ke, "Nyumu niatsɛ ko hi si nɛ e woɔ tade kpakpa nɛ e yeɔ ni kpakpa. E hi si ngɛ bua jɔmi mi saminya. 20 Ligbi ko ɔ, a wo ohiafo patsɛ ko nɛ a tsɛɛ lɛ ke Lazaro ɔ kɛ ba fɔ niatsɛ nɛ ɔ e we ɔ agbo ɔ nya. 21 Be mi nɛ e fɔɔ si ngɛ lejɛ ɔ nɛ e ngɛ niye ni bibliwi nɛ maa je niatsɛ ɔ okplɔɔ nɔ kɛ pue si hlae nɛ e ye ɔ, gbehi baa nɛ a ba hii e pa amɛ a nɔ lɔe ha lɛ. 22 Nyagbe mi ɔ, Lazaro ba gbo nɛ hiɔwe bɔfo ɔmɛ ba wo lɛ kɛ ho dali nɛ je je mi ɔ a hi he ya ngɛ Abraham mi si. Pee se ɔ niatsɛ ɔ hu ba gbo nɛ a ya to lɛ. 23 Nɛ a wo e susuma a kɛ ho abosiamihi a je ya. Benɛ e ngɛ nɔ́ nae ɔ, e na Lazaro mane jee ngɛ Abraham ngɔ.

24 Nɛ e hia ngmlaa kɛ tsɛ lɛ nɛ e de ke, ‘Tsaatsɛ Abraham, moo na mi mɔbɔ nɛ o ha nɛ Lazaro nɛ e wo e nine nguɛ kɛ ya gbɔ nyu mi nɛ e ba dɛ ngɔ fɔ ye lilɛ nɔ kɛkɛ ha mi, ejakaa i ngɛ nɔ́ nae ngɛ la nɛ ɔ mi.’

25 Se Abraham de lɛ ke, ‘Binyumu, mo kai kaa o wami be ɔ mi ɔ nɔ́ ko he hia we mo; o na nɔ́ tsuaa nɔ nɛ o ngɛ hlae, se Lazaro ye ohia. Nɛ ja a he je ɔ, a ngɛ lɛ hu e bua jɔɔe nɛ mo hu o ngɛ nɔ́ nae nɛ ɔ nɛ. 26 Nɛ lɔ ɔ se hu ɔ, dɔ voo ko po wa kpɛti nɛ nɔ ko be nyɛe maa je wa ngɔ kɛ ba nyɛ ngɔ, nɛ nɔ ko be nyɛe maa je nyɛ ngɔ kɛ ba wa ngɔ.’

27 Niatsɛ ɔ de Abraham ke, ‘Lɛɛ i kpa mo pɛɛ nɛ o tsɔ lɛ kɛ ya tsaatsɛ we ɔ mi. 28 I ngɛ nyɛmimɛ nyumuhi enuɔ ngɛ we ɔ mi nɛ e ya ha nɛ a le bɔ nɛ hiɛmɛ nɛ ɔ ngɛ ha; bɔ nɛ pee nɛ a ko ba hiɛ ɔ hwɔɔ se ke a gbo ɔ.’

29 Se Abraham de lɛ ke, ‘Ngmami ɔmɛ ngɛ a dɛ ngɛ mɛ si hɛlie daa. O nyɛminyumu ɔmɛ ma nyɛ kane be fɛɛ be nɛ a suɔ.’

30 Se niatsɛ ɔ ha heto nɛ e de lɛ ke, ‘Tsaatsɛ Abraham, a be se die nɛ a kane. Se ke nɔ ko je gbeje kɛ ya de mɛ ɔ, lɛɛ a ma pia a he nɛ a ma tsake a tsui.’

31 Abraham de lɛ ke, ‘Ke ji a be Mose kɛ gbali ɔmɛ tue bue ɔ, lɛɛ ke a tsɔ nɔ ko kɛ je gbeje kɛ ya a ngɔ nitsɛ po a be lɛ tue bue.’ "